Ripfalo Lerinene

CHARLES loyi a tirhaka eyunivhesiti ya le Kenya, siku rin’wana u lahle riqingho rakwe ra le nyongeni loko a ri karhi a ya ekaya a huma entirhweni. EKenya, tiqingho ta le nyongeni ta ha durha swinene.

Charles u ri: “A ndzi nga ehleketi leswaku munhu un’wana a nga tlhela a ri vuyisa.” Hambiswiritano, endzhaku ka masiku ma nga ri mangani, u hlamarile loko a kuma riqingho leri humaka erhavini ra Timbhoni ta Yehovha eKenya. A a twa onge i norho loko a komberiwa ku ta teka riqingho rakwe ra le nyongeni! Charles u kume leswaku mutirheli un’wana wa nkarhi hinkwawo la nga Mbhoni ya Yehovha u fambe hi movha lowu yena a wu tirhiseke kutani a thumba riqingho eka wona. Leswaku a kuma n’wini wa riqingho leri mutirheli loyi u ri yise erhavini, kutani vatirhi va ku tirhandzela va kwalaho va kume Charles hi ku kambisisa nomboro ya n’wini wa riqingho leyi kombisiweke eriqinghweni rero.

Charles u vule marito lama landzelaka epapileni rakwe leri a ri tsaleleke erhavini: “Ndzi tsake ngopfu hikwalaho ka matshalatshala lama endliweke leswaku ndzi laviwa ndzi kala ndzi kumiwa hambileswi ku nga kayakayiwa swinene. Ndzi nkhensa swirho swa nhlengeletano ya n’wina leswi kumeke riqingho leri kutani swi kumisisa n’wini wa rona swi tlhela swi ri tlherisela eka yena. Namuntlha a swi olovi ku kuma munhu la tshembekaka, kambe swa khutaza ku tiva leswaku hi na vanhu vo hlayanyana lava tikombisaka va ri Timbhoni ta ntiyiso ta Yehovha Xikwembu.”

Timbhoni ta Yehovha ta tiveka hinkwako hikwalaho ka vutshembeki bya tona. Ti tekelela muapostola Pawulo la nga te: “Ha tshemba leswaku hi ni ripfalo ro tshembeka, hileswi hi navelaka ku tikhoma hi ku tshembeka eka swilo hinkwaswo.” (Vaheveru 13:18; 1 Vakorinto 11:1) Ta swi xiya leswaku ku tikhoma ko tano ku vangamisa Yehovha Xikwembu, hilaha Yesu a vuleke hakona a ku: “Ku voninga ka n’wina a ku vonakale emahlweni ka vanhu, leswaku va ta vona mintirho ya n’wina leyinene kutani va vangamisa Tata wa n’wina la nge matilweni.”—Matewu 5:16.