Swivutiso Swa Vahlayi

Ha yini Elixa a kombele “swiphemu swimbirhi” swa moya lowu a wu ri eka Eliya?

Emahlweninyana ka ku va Eliya a heta xiavelo xakwe xa ku va muprofeta wa le Israyele, Elixa muprofeta lontsongo u endle xikombelo eka yena a ku: “Ndzi kombela leswaku swiphemu swimbirhi swa moya wa wena swi ta eka mina.” (2 Tihosi 2:9) Hi tlhelo ra moya, swi tikomba onge Elixa a a kombela nkavelo lowu andzisiweke kambirhi wo tanihi lowu a wu nyikiwa n’wana wa xinuna wa mativula. (Deteronoma 21:17) Ku kambisisanyana mhaka leyi swi ta endla leswaku hi yi twisisa kahle naswona hi ta dyondza swo karhi eka yona.

Hilaha Yehovha a leriseke hakona, muprofeta Eliya u hlawule Elixa leswaku a va mutlhandlami wa yena. (1 Tihosi 19:19-21) Elixa u hete malembe ya kwalomu ka tsevu a ri nandza la tshembekaka wa Eliya, naswona a a tiyimisele ku n’wi tirhela ku fikela emakumu. Hambi ku ri esikwini leri Eliya a heteleleke ha rona ku va muprofeta wa Israyele, Elixa a nga tshikanga ku n’wi namarhela. Loko Eliya a kombela Elixa leswaku va nga ha fambi swin’we, muprofeta loyi lontsongo u vule kanharhu a ku: “A ndzi nge ku siyi.” (2 Tihosi 2:2, 4, 6; 3:11) Kunene, Elixa a a languta muprofeta loyi lonkulu tanihi tata wakwe wa moya.—2 Tihosi 2:12.

Hambiswiritano, Elixa a a nga ri yena ntsena n’wana wa moya wa Eliya. Eliya na Elixa a va fambisana ni ntlawa wa vavanuna lava a va tiviwa va ri “vana va vaprofeta.” (2 Tihosi 2:3) Mhaka leyi nga eka Tihosi ta Vumbirhi yi kombisa leswaku “vana” lava na vona a va ri ni vuxaka lebyikulu na Eliya loyi a a ri tata wa vona wa moya. (2 Tihosi 2:3, 5, 7, 15-17) Kambe tanihi mutlhandlami la hlawuriweke, Elixa a a ri yena lonkulu eka vana va Eliya va moya—a a fana ni mativula. Le Israyele wa khale, n’wana wa xinuna wa mativula a a kuma nkavelo lowu andzisiweke kambirhi wa ndzhaka ya tata wakwe, kasi vana lavan’wana a va kuma nkavelo wun’we-wun’we. Hikwalaho, Elixa u kombele nkavelo lowu andzisiweke kambirhi wa ndzhaka ya Eliya ya moya.

Ha yini Elixa a endle xikombelo lexi hi nkarhi wolowo? Hikuva a a ta byarha vutihlamuleri byo tika—bya ku va muprofeta wa Israyele endzhaku ka Eliya. Elixa u swi xiyile leswaku loko a ta hetisisa vutihlamuleri byakwe lebyi fambisanaka ni xiavelo lexi lexikulu, a a fanele a kuma matimba lamakulu swinene ku tlula vuswikoti bya yena n’wini, matimba lawa ma humaka eka Yehovha ntsena. A a fanele a va ni vurhena ku fana na Eliya. (2 Tihosi 1:3, 4, 15, 16) Kutani u kombele nkavelo lowu andzisiweke kambirhi wa moya wa Eliya, ku nga moya wa vurhena ni wa ku va ni “rilaveta lerikulu hikwalaho ka Yehovha”—timfanelo letinene leti humesiwaka hi moya wa Xikwembu. (1 Tihosi 19:10, 14) Xana Eliya u angurise ku yini?

Eliya a a swi tiva leswaku Elixa u kombele nchumu lowu a nga nyikiwaka wona hi Xikwembu ku nga ri hi yena. Kutani Eliya u hlamule hi ku titsongahata a ku: “U kombele nchumu wo nonon’hwa. Loko wo ndzi vona loko ndzi susiwa eka wena, swi ta endleka hi ndlela yoleyo eka wena.” (2 Tihosi 2:10) Kunene, Yehovha u pfumelele Elixa leswaku a vona Eliya loko a tlhandlukela ehenhla a ri exidzedzeni. (2 Tihosi 2:11, 12) Elixa u nyikiwe leswi a kombeleke swona. Yehovha u n’wi nyike moya lowu a a wu lava leswaku a sungula ntirho wakwe lowuntshwa ni ku langutana ni miringo leyi a yi ta n’wi wela endzhakunyana.

Namuntlha Vakreste lava totiweke (lava minkarhi yin’wana va vuriwaka ntlawa wa Elixa) kun’we ni malandza ya Xikwembu hinkwawo va nga khutaziwa swinene hi rungula leri ra le Bibeleni. Minkarhi yin’wana hi nga titwa hi hela matimba ni ku vona hi nga faneleki loko hi nyikiwe xiavelo lexintshwa, kumbe hi nga heleriwa hi vurhena bya ku hambeta ni ntirho wa hina wa ku chumayela hi ta Mfumo loko vanhu vo tala va le nsin’wini ya hina va nga tsakeli kumbe va hi kaneta. Kambe loko hi kombela Yehovha leswaku a hi pfuna, u ta hi nyika moya lowo kwetsima lowu hi wu lavaka leswaku hi hlangavetana ni mintlhontlho ni swiyimo leswi hundzukaka. (Luka 11:13; 2 Vakorinto 4:7; Vafilipiya 4:13) Ina, tanihi leswi Yehovha a tiyiseke Elixa eka vutihlamuleri byakwe lebyikulu, u ta hi pfuna hinkwerhu ka hina, lavatsongo ni lavakulu, leswaku hi hetisisa vutirheli bya hina.—2 Timotiya 4:5.