Xana Wu Kumeka Kwihi Nchavelelo Wa Xiviri?
Xana Wu Kumeka Kwihi Nchavelelo Wa Xiviri?
“Xikwembu tlhelo Tata wa Hosi ya hina Yesu Kreste [xa hi chavelela] enhlomulweni wa hina hinkwawo.”—2 VAKORINTO 1:3, 4.
1. Hi swihi swiyimo leswi nga endlaka vanhu va lava nchavelelo lowukulu?
VUVABYI lebyikulu byi nga siya munhu a titwa onge vutomi bya yena a byi pfuni nchumu. Ku tsekatseka ka misava, swidzedze ni ndlala swi siya vanhu va ri karhi va xaniseka. Nyimpi yi nga ha dlaya swirho swa mindyangu, yi nga ha onha tiyindlu kumbe yi nga ha endla leswaku vanhu va boheka ku siya makaya ya vona. Vuhomboloki byi nga ha endla vanhu va anakanya leswaku a ku na laha va nga kumaka mpfuno kona. Vanhu lava hlaseriweke hi makhombo yo tano va lava nchavelelo swinene. Xana wu nga kumiwa kwihi?
2. Ha yini nchavelelo lowu nyikeriwaka hi Yehovha wu hlawulekile swinene?
2 Vanhu van’wana ni minhlangano yin’wana va tikarhatela ku nyikela nchavelelo. Marito yo chavelela ma tlangeriwa. Mphalalo wa swilo leswi vonakaka wu pfuna swa xinkarhana. Kambe i Yehovha ntsena, Xikwembu xa ntiyiso, la nga lulamisaka swiyimo leswi hinkwaswo, a tlhela a nyikela mpfuno lowu lavekaka leswaku makhombo yo tano ma nga ha pfuki ma humelerile. Bibele yi vula leswi malunghana na yena: “A ku dzunisiwe Xikwembu tlhelo Tata wa Hosi ya hina Yesu Kreste, Tatana la nga ni tintswalo letikulu tlhelo Xikwembu xa nchavelelo hinkwawo, lexi hi chavelelaka enhlomulweni wa hina hinkwawo, leswaku hi ta swi kota ku chavelela lava nga emahlomulweni ya mixaka-xaka hi nchavelelo lowu Xikwembu xi hi chavelelaka ha wona.” (2 Vakorinto 1:3, 4) Yehovha u hi chavelela njhani?
Ku Tiva Ndzhombo Wa Swiphiqo
3. Xana nchavelelo lowu Xikwembu xi chavelelaka ha wona wu swi tlhantlha njhani swiphiqo swa vanhu?
3 Vanhu hinkwavo va tswariwa va nga hetisekanga hikwalaho ka xidyoho xa Adamu, naswona sweswo swi vanga swiphiqo swa ntsandza-vahlayi leswi eku heteleleni swi vangaka rifu. (Varhoma 5:12) Xiyimo lexi xi nyanyisiwa hileswi Sathana Diyavulosi a nga “mufumi wa misava leyi.” (Yohane 12:31; 1 Yohane 5:19) Yehovha a nga lo khomiwa hi gome ntsena hikwalaho ka xiyimo lexi nga tsakisiki lexi vanhu va langutaneke na xona. U tlhele a rhumela N’wana wa yena la tswariweke a ri swakwe leswaku a ta hi kutsula, naswona U hi byele leswaku hi nga ntshunxiwa eka leswi vangiweke hi xidyoho xa Adamu loko hi kombisa ripfumelo eka N’wana wa Yena. (Yohane 3:16; 1 Yohane 4:10) Xikwembu xi tlhele xi vula ka ha ri emahlweni leswaku Yesu Kreste, loyi a nyikiweke vulawuri hinkwabyo etilweni ni le misaveni, u ta lovisa Sathana ni mafambiselo ya yena hinkwawo layo homboloka ya swilo.—Matewu 28:18; 1 Yohane 3:8; Nhlavutelo 6:2; 20:10.
4. (a) Xana Yehovha u endle yini leswaku a tiyisa ntshembo wa hina eswitshembisweni swa yena swo hi kutsula? (b) Xana Yehovha u hi pfuna njhani leswaku hi tiva nkarhi lowu nkutsulo wu nga ta ta ha wona?
4 Leswaku xi tiyisa ntshembo wa hina eswitshembisweni swa xona, Xikwembu xi tsale swilo swo tala leswi tiyisekisaka leswaku xin’wana ni xin’wana lexi xi xi vulaka ka ha ri emahlweni xa humelela. (Yoxuwa 23:14) EBibeleni xi katse ni leswi xi swi endleke leswaku xi kutsula malandza ya xona loko ma langutane ni swiyimo leswi munhu a nga ta ka a nga koti ku swi endla. (Eksoda 14:4-31; 2 Tihosi 18:13–19:37) Naswona hi ku tirhisa Yesu Kreste, Yehovha u kombise leswaku xikongomelo xa yena xi katsa ku horisa vanhu va “vulema bya mixaka hinkwayo,” hambi ku ri ku pfuxa vafi. (Matewu 9:35; 11:3-6) Xana leswi hinkwaswo swi ta endleka rini? Loko Bibele yi hlamula yi vulavula hi masiku ya makumu ya mafambiselo lawa ya swilo, lama nga ta va kona loko matilo lamantshwa ni misava leyintshwa ya Xikwembu swi nga si fika. Nhlamuselo ya Yesu yi fambisana kahle ni minkarhi leyi hi hanyaka eka yona.—Matewu 24:3-14; 2 Timotiya 3:1-5.
Ku Chavelela Vanhu Lava Tshikilelekeke
5. Loko Yehovha a chavelela Vaisrayele va khale, xana u kongomise nyingiso wa yena eka yini?
5 Loko hi xiya ndlela leyi Yehovha a va khomeke ha yona Vaisrayele va khale, hi dyondza ndlela leyi a va chaveleleke ha yona loko va tshikilelekile. U va tsundzuxe leswaku yena i Xikwembu xa muxaka muni. Leswi swi tiyise ntshembo wa vona eswitshembisweni swa yena. Yehovha u susumetele vaprofeta va yena leswaku va kombisa ku hambana lokukulu loku nga kona eka yena loyi a nga Xikwembu xa ntiyiso lexi hanyaka ni swifaniso leswi nga kotiki ku tipfuna kumbe ku pfuna vagandzeri va swona. (Esaya 41:10; 46:1; Yeremiya 10:2-15) Loko a byela Esaya a ku, “Chavelelani, chavelelani vanhu va mina,” Yehovha u susumetele muprofeta wa yena ku tirhisa swifaniso ni tinhlamuselo ta mintirho Yakwe ya ku tumbuluxa leswaku a ta kandziyisa vukulu bya Yehovha tanihi Xikwembu xi ri xin’we xa ntiyiso.—Esaya 40:1-31.
6. Hi swihi swikombiso leswi Yehovha a swi nyikelaka minkarhi yin’wana malunghana ni nkarhi lowu ku kutsuriwa ku nga ta endleka ha wona?
6 Minkarhi yin’wana loko Yehovha a chavelela a a vulavula hi nkarhi wo karhi wa le kusuhi kumbe wa le kule lowu a a ta kutsula vanhu va yena ha wona. Loko Vaisrayele lava tshikilelekeke va ri kusuhi ni ku kutsuriwa aEgipta, u va byele leswi: “Ndzi tisa khombo rin’wana nakambe ehenhla ka Faro na Egipta. Endzhaku ka sweswo u ta mi tshika mi famba mi suka laha.” (Eksoda 11:1) Loko matiko manharhu lama endleke ntwanano ma hlasele Yuda emasikwini ya Hosi Yehoxafati, Yehovha u va byele leswaku U ta va pfuna “mundzuku.” (2 Tikronika 20:1-4, 14-17) Hi hala tlhelo, ku kutsuriwa ka vona eBabilona ku tsariwe hi Esaya ka ha sele malembe ya kwalomu ka 200, naswona vuxokoxoko lebyi engetelekeke byi nyikeriwe hi Yeremiya ka ha sele malembe ya kwalomu ka dzana leswaku va kutsuriwa. Wa nga vona ndlela leyi vuprofeta lebyi byi ma khutazeke ha yona malandza ya Xikwembu loko nkarhi wa ku kutsuriwa ka wona wu tshinela!—Esaya 44:26–45:3; Yeremiya 25:11-14.
7. Hi wihi nchumu lowu a wu tala ku katsiwa eka switshembiso swa nkutsulo, naswona sweswo swi va khumbe njhani vanhu vo tshembeka va le Israyele?
7 Lexi xiyekaka hileswaku switshembiso leswi chaveleleke vanhu va Xikwembu hakanyingi a swi ri ni rungula leri vulavulaka hi Mesiya. (Esaya 53:1-12) Ku suka eka xitukulwana xin’wana ku ya eka xitukulwana xin’wana, rungula leri ri endle leswaku vanhu vo tshembeka va va ni ntshembo loko va langutane ni miringo yo tala. Eka Luka 2:25, ha hlaya: “Waswivo, eYerusalema a ku ri ni munhu loyi a a vuriwa Simiyoni, naswona munhu loyi a a lulamile, a ri ni xichavo, a rindzele ku chaveleriwa ka Israyele [kahle-kahle ku ta ka Mesiya], naswona moya lowo kwetsima a wu ri ehenhla ka yena.” Simiyoni a a wu tiva ntshembo wa Mesiya lowu nga eMatsalweni, naswona leswi wu nga ta swi hetisisa swi khumbe vutomi bya yena. A a nga swi twisisi leswaku wu ta swi hetisisa njhani naswona a nga hanyanga kukondza a vona ku ponisiwa loku profetiweke, kambe u tsakile loko a vona Munhu loyi a nga ta va “ndlela ya [Xikwembu] yo ponisa.”—Luka 2:30.
Nchavelelo Lowu Nyikeriweke Ha Kreste
8. Mpfuno lowu nyikeriweke hi Yesu wu hambana njhani ni leswi vanhu vo tala a va swi lava?
8 Loko Yesu Kreste a ri karhi a hetisisa vutirheli bya yena bya laha misaveni, a hi minkarhi hinkwayo a a nyikela mpfuno lowu vanhu a va ehleketa leswaku va wu lava. Van’wana a va langutele Mesiya loyi a a ta va ntshunxa eka joko leri a va ri venga ra Varhoma. Kambe Yesu a nga pfurhetelanga moya wa ku lwisana ni vuhosi; u va byele leswaku va ‘tlherisela swilo swa Khezari eka Khezari.’ (Matewu 22:21) Xikongomelo xa Xikwembu a ku nga ri ku ntshunxa vanhu eka vulawuri bya tipolitiki ntsena. Vanhu a va lava ku endla Yesu hosi, kambe u vule leswaku a a ta “nyikela moya-xiviri wakwe wu va nkutsulo wa lavo tala.” (Matewu 20:28; Yohane 6:15) A wu nga si fika nkarhi wa leswaku a vekiwa ku va hosi, naswona vuhosi bya yena a a ta nyikiwa byona hi Yehovha ku nga ri hi mintshungu leyi nga lawulekiki.
9. (a) Hi rihi rungula ro chavelela leri Yesu a ri twariseke? (b) Yesu u swi kombise njhani leswaku rungula ra yena i ra nkoka eka swiyimo leswi vanhu a va langutana na swona? (c) Vutirheli bya Yesu byi veke xisekelo xa yini?
9 Nchavelelo lowu Yesu a wu tiseke wu kombisiwe eka “mahungu lamanene ya mfumo wa Xikwembu.” Leri a ku ri rungula leri Yesu a a ri twarisa kun’wana ni kun’wana laha a ya kona. (Luka 4:43) U kandziyise ndlela leyi rungula rero ri nga ra nkoka ha yona eka swiphiqo swa vanhu swa siku na siku hi ku kombisa leswi yena tanihi Mufumi la nga Mesiya a nga ta swi endlela vanhu. U endle leswaku vanhu lava xanisekaka va tlhela va va ni xivangelo xo tsakela vutomi hi ku endla leswaku mabofu ma vona ni timbheveve ti vulavula (Matewu 12:22; Marka 10:51, 52), a tshungula swilema (Marka 2:3-12), a horisa Vaisrayele-kulobye lava khomiweke hi vuvabyi lebyi nyenyetsaka (Luka 5:12, 13) a tlhela a va horisa emavabyini man’wana lamakulu. (Marka 5:25-29) U herise gome ra mindyangu yin’wana hi ku pfuxa vana va vona lava feke. (Luka 7:11-15; 8:49-56) U kombise vuswikoti bya yena byo lawula swidzedze leswi nga ni khombo a tlhela a nyika mintshungu leyikulu swakudya. (Marka 4:37-41; 8:2-9) Ku tlula kwalaho, Yesu u va dyondzise misinya ya milawu ya mahanyelo leyi a yi ta va pfuna leswaku va langutana ni swiphiqo leswi nga kona hi ndlela leyi humelelaka naswona a yi ta endla leswaku timbilu ta vanhu ti va ni ntshembo wa vulawuri lebyinene bya Mesiya. Xisweswo loko Yesu a endla vutirheli bya yena, a nga chavelelanga lava n’wi yingiseke hi ripfumelo ntsena, kambe u tlhele a veka xisekelo xo khutaza vanhu eka magidi ya malembe lawa a ma ta landzela.
10. I yini leswi kumekaka hikwalaho ka gandzelo ra Yesu?
10 Endzhaku ka malembe ya 60 Yesu a nyikele vutomi bya yena tanihi gandzelo naswona a pfuxeriwe evuton’wini bya le tilweni, muapostola Yohane u huhuteriwe ku tsala a ku: “Vana vanga lavatsongo, ndzi mi tsalela swilo leswi leswaku mi nga tshuki mi endla xidyoho. Kambe, loko mani na mani a endla xidyoho, hi ni mupfuni eka Tatana, a nga Yesu Kreste, loyi a lulameke. Naswona yena i gandzelo ra ku vuyelelana ra swidyoho swa hina, kambe ku nga ri swa hina ntsena, ni swa misava hinkwayo.” (1 Yohane 2:1, 2) Ha chaveleriwa swinene hikwalaho ka vuyelo bya gandzelo ra vutomi bya Yesu lebyi hetisekeke. Ha swi tiva leswaku hi nga rivaleriwa swidyoho, hi va ni ripfalo leri baseke, hi va ni vuxaka lebyinene na Xikwembu hi tlhela hi va ni ntshembo wa vutomi lebyi nga heriki.—Yohane 14:6; Varhoma 6:23; Vaheveru 9:24-28; 1 Petro 3:21
Muchaveleri La Nga Moya Lowo Kwetsima
11. Hi rihi lunghiselelo rin’wana ro chavelela leri Yesu a ri tshembiseke loko a nga si fa?
11 Loko a ri ni vaapostola va yena hi madyambu yo hetelela loko a nga si nyikela vutomi tanihi gandzelo, Yesu u vulavule hi lunghiselelo rin’wana leri Tata wa yena wa le tilweni a ri lunghiseleleke leswaku a va chavelela. Yesu u te: “Ndzi ta kombela Tatana kutani u ta mi nyika mupfuni un’wana [muchaveleri; hi Xigriki pa·raʹkle·tos] leswaku a va na n’wina hi masiku, moya wa ntiyiso.” Yesu u va tiyisekisile a ku: “Mupfuni, la nga moya lowo kwetsima, . . . u ta mi dyondzisa swilo hinkwaswo ni ku mi tsundzuxa swilo hinkwaswo leswi ndzi mi byeleke swona.” (Yohane 14:16, 17, 26) Xana moya lowo kwetsima wu va chavelele njhani?
12. Xana moya lowo kwetsima lowu tsundzuxeke vadyondzisiwa va Yesu leswi a va byeleke swona wu va pfune njhani leswaku va chavelela vo tala?
12 Yesu a a va dyondzise swilo swo tala vaapostola va yena. A va nga ta xi rivala xiendlakalo xexo, kambe xana a va ta swi tsundzuka hinkwaswo leswi a swi vuleke? Leswi a va ri ni mianakanyo leyi nga hetisekangiki, xana a va ta rivala swileriso swa nkoka? Yesu u va tiyisekisile leswaku moya lowo kwetsima wu ta ‘va tsundzuxa swilo hinkwaswo leswi a va byeleke swona.’ Xisweswo, kwalomu ka malembe ya nhungu endzhaku ka ku fa ka Yesu, Matewu u kote ku tsala Evhangeli yo sungula, leyi katsaka Dyondzo ya le Ntshaveni ya Yesu leyi khutazaka, swifaniso swa yena swo tala malunghana ni Mfumo ni nhlamuselo leyi enteke ya xikombiso xa vukona bya yena. Endzhaku ka malembe lama tlulaka 50, muapostola Yohane u kote ku tsala rungula leri tshembekaka leri ma hlamuseleke hi vuenti masiku yo hetelela ya vutirheli bya Yesu bya laha misaveni. Wa nga vona ndlela leyi swiviko leswi leswi huhuteriweke swi khutazaka ha yona ku ta fikela esikwini ra hina!
13. Moya lowo kwetsima wu ve mudyondzisi eka Vakreste vo sungula hi ndlela yihi?
13 Handle ko va pfuna ku tsundzuka marito lawa va byeriweke wona, moya lowo kwetsima wu dyondzise vadyondzisiwa wu tlhela wu va kongomisa leswaku va xi twisisa kahle xikongomelo xa Xikwembu. Loko Yesu a ha ri ni vadyondzisiwa va yena, u va byele swilo leswi a va nga swi twisisi kahle hi nkarhi wolowo. Hambiswiritano, endzhaku Yohane, Petro, Yakobo, Yudha na Pawulo va susumetiwe hi moya lowo kwetsima leswaku va tsala hi swilo leswi engetelekeke leswi khumbaka xikongomelo xa Xikwembu. Xisweswo leswi moya lowo kwetsima wu va dyondziseke, wu va nyike xitiyisekiso lexikulu xa leswaku a va kongomisiwa hi Xikwembu.
14. Moya lowo kwetsima wu va pfune njhani vanhu va Yehovha?
14 Tinyiko ta moya ta singita ti tlhele ti swi kombisa kahle leswaku Xikwembu a xa ha n’wi amukeli Israyele wa nyama kambe xi amukela vandlha ra Vukreste. (Vaheveru 2:4) Mihandzu ya moya a yi ri ya nkoka evuton’wini bya vanhu volavo hikuva a yi hlawula lava nga vadyondzisiwa va Yesu hakunene. (Yohane 13:35; Vagalatiya 5:22-24) Moya lowu wu tlhele wu tiyisa swirho swa vandlha rolero leswaku swi va timbhoni leti nga ni xivindzi.—Mintirho 4:31.
Mpfuno Lowu Nyikeriweke eHansi Ka Ntshikilelo Lowukulu
15. (a) Hi yihi mintshikilelo leyi Vakreste va khale ni va manguva lawa va langutaneke na yona? (b) Ha yini lava va khutazaka van’wana va pfa va lava xikhutazo na vona?
15 Vanhu hinkwavo lava tinyiketeleke eka Yehovha ni lava tshembekaka eka yena va xanisiwa hi ndlela yo karhi. (2 Timotiya 3:12) Hambiswiritano, Vakreste vo tala va tiyisele minxaniso leyikulu. Eminkarhini ya manguva lawa, van’wana va cinisiwe gija hi mintshungu leyi kanetaka va tlhela va pfaleriwa etikampeni ta nxaniso, emakhotsweni ni le tikampeni leti va nyikiwaka mintirho yo tika laha a va khomiwa ku fana ni swiharhi. Tihulumendhe hi tona ti xaniseke vanhu swinene, kumbe ti pfumelele vanhu lava kalaka nawu leswaku va vanga madzolonga kutani ti nga va xupuli. Ku engetela kwalaho, Vakreste va karhatiwa hi vuvabyi kumbe swiphiqo swa ndyangu. Mukreste la wupfeke la pfunaka vapfumeri-kulobye vo tala leswaku va langutana ni swiyimo swo tika na yena a nga va ni ntshikilelo. Etimhakeni to tano, munhu loyi a khutazaka van’wana na yena a nga ha lava xikhutazo.
16. Loko Davhida a ri ehansi ka ntshikilelo lowukulu, u wu kume njhani mpfuno?
16 Loko Hosi Sawulo a hlongorisa Davhida a lava ku n’wi dlaya, Davhida u khongele eka Xikwembu tanihi Mupfuni wakwe, a ku: “Oho Xikwembu, yingisa xikhongelo xa mina. . . . Endzhutini wa timpapa ta wena, ndzi tumbele kona.” (Pisalema 54:2, 4; 57:1) Xana Davhida u pfuniwile? Ina, u pfuniwile. Hi nkarhi wolowo, Yehovha u tirhise Gadi lowa muprofeta na muprista Abiyatara leswaku va nyika Davhida nkongomiso, a tlhela A tirhisa Yonathani n’wana wa Sawulo leswaku a tiyisa jaha leri. (1 Samuwele 22:1, 5; 23:9-13, 16-18) Yehovha u tlhele a pfumelela Vafilista leswaku va hlasela tiko hi xitshuketa, a endlela leswaku Sawulo a tlhelela endzhaku.—1 Samuwele 23:27, 28.
17. Xana Yesu u wu kume kwihi mpfuno loko a ri ehansi ka ntshikilelo lowukulu?
17 Yesu Kreste na yena a a ri ehansi ka ntshikilelo lowukulu loko a ri ekusuhi ni ku fa loko a ha ri emisaveni. A a yi tiva kahle ndlela leyi mahanyelo yakwe ma nga ri khumbaka ha yona vito ra Tata wa yena la nga etilweni nileswi ma nga ta vula swona eka vumundzuku bya vanhu hinkwavo. U khongele swi huma embilwini, a kala a “fikeriwa hi maxangu.” Xikwembu xi tiyisekile leswaku Yesu u kuma nseketelo lowu a wu lava enkarhini wolowo wa maxangu.—Luka 22:41-44.
18. Xikwembu xi va chavelele njhani Vakreste vo sungula lava a va xanisiwa swinene?
18 Endzhaku ka ku simekiwa ka vandlha ra lembe-xidzana ro sungula, Vakreste va xanisiwe swinene lerova va hangalaka eYerusalema handle ka vaapostola. Vavanuna ni vavasati va huduriwile emakaya ya vona. Xana Xikwembu xi va chavelele njhani? Xi va tiyisekise hi Rito ra xona leswaku va ni “swilo swo antswa ni leswi tshamaka hi masiku,” ku nga ndzhaka ya ku hanya hi masiku etilweni va ri na Kreste. (Vaheveru 10:34; Vaefesa 1:18-20) Loko va ya emahlweni va chumayela, va vone vumbhoni bya leswaku moya wa Xikwembu wu na vona, naswona leswi swi va humeleleke swi endle leswaku va hambeta va tsaka.—Matewu 5:11, 12; Mintirho 8:1-40.
19. Hambileswi Pawulo a xanisiweke swinene, xana u titwise ku yini hi nchavelelo lowu Xikwembu xi wu nyikaka?
19 Sawulo (Pawulo) loyi a a ri muxanisi wa tihanyi, eku heteleleni u xanisiwile hileswi a hundzukeke Mukreste. Le xihlaleni xa Kipra, a ku ri ni noyi loyi a ringeta ku kavanyeta vutirheli bya Pawulo hi ku tirhisa vukanganyisi ni mavunwa. Loko a ri eGalatiya, Pawulo u khandliwe hi maribye kutani a tshikiwa kwalaho ku anakanyiwa leswaku u file. (Mintirho 13:8-10; 14:19) EMakedoniya u bukuteriwe hi tinhonga. (Mintirho 16:22, 23) Endzhaku ko xanisiwa hi ntshungu lowu kanetaka aEfesa, u tsale a ku: “A hi ri ehansi ka ntshikilelo lowukulu ngopfu lowu tlulaka ntamu wa hina, lerova a hi nga tiyiseki nikatsongo ni hi vutomi bya hina. Entiyisweni, a hi titwa endzeni ka hina leswaku hi kume xigwevo xa rifu.” (2 Vakorinto 1:8, 9) Kambe epapileni rero, Pawulo u tsale marito lama chavelelaka lama tshahiweke eka ndzimana 2 ya xihloko lexi.—2 Vakorinto 1:3, 4.
20. Hi ta bula hi yini eka xihloko lexi landzelaka?
20 Xana u nga hlanganyela njhani eku nyikeleni ka nchavelelo wo tano? Ku ni vo tala namuntlha lava wu lavaka lava nga ni gome, hikwalaho ka khombo leri hlaselaka vanhu vo tala kumbe nhlomulo lowu welaka vona ntsena. Eka xihloko lexi landzelaka, hi ta bula hi ndlela leyi hi nga va chavelelaka ha yona vanhu vo tano.
Wa Tsundzuka Xana?
• Ha yini nchavelelo lowu humaka eka Xikwembu wu ri wa nkoka swinene?
• Hi wihi nchavelelo lowu tisiweke hi Kreste?
• Xana moya lowo kwetsima wu ve muchaveleri hi ndlela yihi?
• Nyika swikombiso swa nchavelelo lowu nyikeriweke hi Xikwembu loko malandza ya xona ma ri ehansi ka nxaniso lowukulu.
[Swivutiso Swa Dyondzo]
[Swifaniso leswi nga eka tluka 15]
Bibele yi hi komba leswaku Yehovha u chavelele vanhu va yena hi ku va kutsula
[Swifaniso leswi nga eka tluka 16]
Yesu u chavelele hi ku dyondzisa, hi ku hanyisa ni hi ku pfuxa vafi
[Xifaniso lexi nga eka tluka 18]
Yesu u kume mpfuno lowu humaka etilweni