A Wu Ta Lava Ku Xi Vutisa Yini Xikwembu?

EMISAVENI hinkwayo vanhu va ni swivutiso leswi va karhataka malunghana ni vutomi. Xana na wena u na swona? Vo tala va vutise vafundhisi swivutiso leswi va nga na swona kambe a va kumanga tinhlamulo leti enerisaka. Van’wana va kamane na swona va ri voxe. Van’wana va khongele kunene leswaku va kuma vukongomisi. Xana swi nga koteka hakunene leswaku Xikwembu xi ku nyika tinhlamulo ta swivutiso leswi ku karhataka? Swin’wana swa swivutiso leswi vo tala va vuleke leswaku va nga lava ku swi vutisa Xikwembu hi leswi landzelaka.

Kahle-kahle Xikwembu i mani?

Vanhu va languta Xikwembu hi ku ya hi mindhavuko ya vona, vukhongeri bya vatswari ni hi ku ya hi leswi va swi hlawulaka. Van’wana va xi vitana hi vito ra Xikwembu xa vona; van’wana va xi vitana Xikwembu ntsena. Xana swi na mhaka sweswo? Xana ku ni Xikwembu xin’we ntsena xa ntiyiso lexi tihlavutelaka xi tlhela xi hlavutela vito ra xona eka hina?

Ha yini ku ri ni ku xaniseka konghasi?

Loko munhu a tionhela vutomi kumbe a va evuswetini hikwalaho ka mahanyelo yakwe yo biha, a nga sungula ku tiputa. Kambe a nga ha va a swi tiva kahle leswaku ha yini a xaniseka.

Hambiswiritano, van’wana va xaniseka va nga dyanga xa munhu. Van’wana va khomiwe hi vuvabyi lebyi nga tshungulekiki. Van’wana a swi va oloveli hambi ku ri ku kuma ndhawu yo lata rivambu ni ku wundla mindyangu ya vona hi mfanelo. Vanhu va timiliyoni va hlaseriwa hi swigevenga, nyimpi, madzolonga, timhangu ta ntumbuluko kumbe ku dyeleriwa hi valawuri.

Swa twisiseka loko vo tala va vutisa va ku: ‘Ha yini swiyimo swo tano swi khumba vanhu vo tala swonghasi? Ha yini Xikwembu xi pfumelela ku xaniseka loku hinkwako?’

 Ha yini ndzi ri laha? Xikongomelo xa vutomi i yini?

Swivutiso leswi swi tala ku vutisiwa hi munhu loyi a tshovekeke mbilu hikwalaho ka leswi vutomi bya yena bya siku ni siku byi nga n’wi enerisiki—naswona sweswo swi tano eka vo tala. Vanhu van’wana va timiliyoni va tshemba leswaku Xikwembu xi kunguhata vutomi bya munhu un’wana ni un’wana. Xana swi tano? Loko hakunene Xikwembu xi ri ni xikongomelo xo karhi malunghana na wena, a swi kanakanisi leswaku u lava ku tiva leswaku hi xihi xikongomelo xa kona.

Eka tibuku hinkwato emisaveni, ku ni yin’we ntsena leyi vulaka erivaleni leswaku yi huhuteriwe hi Xikwembu. Buku leyi yi kumeka hi tindzimi to tala ku tlula tibuku hinkwato leti nga tshama ti tsariwa, tanihi leswi yi tameleke rungula leri humaka eka Xikwembu ri ya eka vanhu hinkwavo. Buku ya kona i Bibele yo Kwetsima. Eka yona, Muvumbi wa tilo ni misava, ku nga Xikwembu hi xoxe, u tihlavutela leswaku hi yena mani. Xana wa ri tiva vito ra yena? Xana wa swi tiva leswaku Bibele yi ri Xikwembu i Munhu wa muxaka muni? Xana wa swi tiva leswi yi swi vulaka malunghana ni leswi Xikwembu xi swi languteleke eka wena?

 [Laha Xifaniso Xi Humaka Kona eka tluka 2]

COVER: Chad Ehlers/Index Stock Photography

[Laha Xifaniso Xi Humaka Kona eka tluka 3]

Mountain: Chad Ehlers/Index Stock Photography