Swivutiso Swa Vahlayi

Xana ku ni lexi nga endliwaka loko Mukreste la totiweke a nga swi koti ku ta tlangela nkhuvo wa Xilalelo xa Hosi evandlheni?

Ina, xi kona lexi nga endliwaka naswona i swa nkoka ku anakanyela Mukreste la totiweke la lamaleke kumbe la vabyaka hikwalaho a nga swi koti ku ta wu tlangela swin’we ni vandlha nkhuvo wa Xitsundzuxo xa ku fa ka Kreste. Loko swi te tano, huvo ya vakulu yi nga ha avela nkulu kumbe Mukreste un’wana la wupfeke wa xinuna leswaku a yisa swifanekiselo swa xinkwa ni vhinyo eka mupfumeri-kulobye yoloye hi vusiku byebyo ri nga si xa.

Loko swiyimo swi pfumela, nkulu la averiweke kumbe makwerhu un’wana a nga vula marito ma nga ri mangani kumbe a hlaya matsalwa lama faneleke. A nga ha landzela ndlela leyi Yesu a yi sunguleke loko A simeka Xilalelo xa Hosi. Hi xikombiso, ku nga ha hlayiwa Matewu 26:26 kutani endzhaku ka xikhongelo ku fambisiwa xinkwa xo kala comela. Endzhaku ka sweswo, makwerhu la averiweke a nga ha hlaya Matewu ndzima 26 ndzimana 27 na 28, kutani endzhaku ka xikhongelo xin’wana ku fambisiwa vhinyo. Ku nga ha vuriwa marito yo koma lama hlamuselaka xifanekiselo ha xin’we naswona ku fanele ku pfariwa hi xikhongelo.

I ntiyiso leswaku munhu u fanele a endla matshalatshala hinkwawo lama kotekaka leswaku a va kona loko vandlha ri tlangela nkhuvo wa Xilalelo xa Hosi. Kambe ku vuriwa yini loko swiyimo swo fana ni ku vabya ngopfu, ku va exibedlhele kumbe swin’wana, swi nga n’wi pfumeleli nikatsongo Mukreste la totiweke ku tlangela Xitsundzuxo loko dyambu ri pela hi Nisan 14? Mutotiwa yoloye a nga ha landzela xikombiso lexi nga eNawini wa Muxe kutani a tlangela xiendlakalo xexo a ri yexe endzhaku ka masiku ya 30.—Tinhlayo 9:9-14.