“Xi Ta Tshinela Eka N’wina”

‘Xikwembu a xi le kule ngopfu ni un’wana ni un’wana wa hina.’—MINTIRHO 17:27.

1, 2. (a) Loko hi languta matilo lama lemiweke hi tinyeleti, xana hi nga tivutisa yini hi Muvumbi? (b) Xana Bibele yi hi tiyisekisa hi ndlela yihi leswaku vanhu i va nkoka emahlweni ka Yehovha?

XANA u tshama u languta ehenhla ni vusiku, ku nga ri na mapapa, u vona matilo lama lemiweke hi tinyeleti ma ku hlamarisa ni ku ku tsakisa? Tinyeleti ta ntsandza-vahlayi ni vukulu bya xibakabaka swi endla munhu a chava. Phela, misava a yi nyawuli loko yi pimanisiwa ni vuako lebyi lebyikulu. Xana leswi swi vula leswaku Muvumbi, “La nge Henhla-henhla emisaveni hinkwayo,” u tlakuke ngopfu lerova a nge khathali hi vanhu kumbe u le kule swinene naswona a swi koteki leswaku va n’wi tiva?—Pisalema 83:18.

² Bibele yi hi tiyisekisa leswaku vanhu i va nkoka emahlweni ka Yehovha. Entiyisweni, Rito ra Xikwembu ri hi khutaza leswaku hi n’wi lavisisa, ri ku: ‘A nga le kule ngopfu ni un’wana ni un’wana wa hina.’ (Mintirho 17:27; 1 Tikronika 28:9) Kunene, loko hi tikarhatela ku tshinela eka Xikwembu, na xona xi ta tshinela eka hina. Hi ndlela yihi? Marito ya ndzimana ya hina ya lembe ra 2003 ma hlamula hi ndlela leyi khutazaka ma ku: “Xi ta tshinela eka n’wina.” (Yakobo 4:8) A hi bule hi yin’wana ya mikateko yo hlamarisa leyi Yehovha a yi chululelaka lava va tshinelaka eka yena.

Nyiko Leyi Humaka Eka Yehovha

3. Hi yihi nyiko leyi Yehovha a yi nyikaka lava tshinelaka eka yena?

³ Xo sungula, malandza ya Yehovha ma ni nyiko ya risima leyi a ma vekeleke yona. Mimfumo hinkwayo, rifuwo ni dyondzo ya mafambiselo lawa ya swilo a swi na yona nyiko leyi. I nyiko leyi Yehovha a yi nyikaka ntsena lava tshinelaka eka yena. Nyiko ya kona i yini? Rito ra Xikwembu ra hlamula: “Loko . . . u nyikela rito ra wena eku twisiseni, loko u hambeta u ku lava kukota silivhere, naswona u ku lavisisa kukota xuma lexi fihliweke, hi ndlela yoleyo u ta twisisa ku chava Yehovha, u ta kuma vutivi bya Xikwembu. Hikuva Yehovha u nyika vutlhari.” (Swivuriso 2:3-6) Ehleketa hi vanhu lava nga hetisekangiki va kota ku “kuma vutivi bya Xikwembu”! Nyiko yoleyo—ku nga vutivi lebyi kumekaka eRitweni ra Xikwembu—byi fanisiwa ni “xuma lexi fihliweke.” Ha yini?

4, 5. Ha yini “vutivi bya Xikwembu” byi fanisiwa ni “xuma lexi fihliweke”? Kombisa.

 ⁴ Xo sungula, vutivi bya Xikwembu i bya nkoka swinene. Loko hi ri na byona, hi ta kuma nkateko wa risima ku nga ku langutela vutomi lebyi nga heriki. (Yohane 17:3) Kambe vutivi byolebyo byi antswisa vutomi bya hina hambi ku ri sweswi. Hi xikombiso, hikwalaho ka leswi hi dyondzaka Rito ra Xikwembu hi vukheta, hi kume tinhlamulo ta swivutiso swa nkoka swo fana ni leswi nge: Vito ra Xikwembu i mani? (Pisalema 83:18) Xana vafi va le ka xiyimo xihi? (Eklesiasta 9:5, 10) Hi xihi xikongomelo xa Xikwembu hi misava ni hi vanhu? (Esaya 45:18) Nakambe hi tive leswaku ndlela leyinene leyi hi faneleke hi hanya ha yona i ku tirhisa ndzayo ya Bibele ya vutlhari. (Esaya 30:20, 21; 48:17, 18) Xisweswo hi ni nkongomiso lowu twisisekaka lowu hi pfunaka ku langutana ni swikarhato swa vutomi ni ku hanya hi ndlela leyi tisaka ntsako wa xiviri ni ku eneriseka. Ku tlula kwalaho, ku dyondza ka hina Rito ra Xikwembu ku hi pfune ku tiva timfanelo ta Yehovha leti hlamarisaka ni ku tshinela eka yena. A ku na nchumu wa nkoka swinene ku tlula ku va ni vuxaka lebyikulu na Yehovha lebyi sekeriweke eka “vutivi bya Xikwembu.”

⁵ Ku ni xivangelo xin’wana lexi endlaka leswaku vutivi bya Xikwembu byi fanisiwa ni “xuma lexi fihliweke.” Ku fana ni xuma xo tala a byi kumeki hi ku olova emisaveni leyi. Eka vanhu va misava hinkwayo va tsevu wa magidi ya timiliyoni, ko va vanhu va kwalomu ka tsevu wa timiliyoni lava gandzelaka Yehovha kumbe kwalomu ka un’we eka va 1 000 lava kumeke “vutivi bya Xikwembu.” Ku kombisa leswaku ra kala lunghelo ra ku tiva ntiyiso wa Rito ra Xikwembu, xiya xivutiso xin’we ntsena xa le Bibeleni: Ku humelela yini hi vanhu loko va fa? Matsalwa ma hi byela leswaku moya-xiviri wa fa nileswaku vafi a va tivi nchumu. (Ezekiyele 18:4) Kambe, dyondzo ya mavunwa ya leswaku ku ni nchumu wo karhi lowu hambetaka wu hanya endzeni ka munhu loko a file yi dyondzisiwa evukhongerini byo tala bya misava. I xisekelo xa vukhongeri bya Vujagana. Yi kona eka Vubudha, Vuhindu, Vumoslem, Vujayini, Vuyuda, Vushinto, Vusikh ni Vutao. Ehleketa, phela vanhu va magidi ya timiliyoni va kanganyisiwa hi dyondzo leyi ya mavunwa!

6, 7. (a) “Vutivi bya Xikwembu” byi kumiwa hi vanhu va njhani ntsena? (b) Hi xihi xikombiso lexi kombisaka leswaku Yehovha u hi katekisa hi vutlhari lebyi vo tala “lavo tlhariha ni lava nga ni ku twisisa” va nga riki na byona?

⁶ Ha yini vanhu vo tala va nga byi kumanga “vutivi bya Xikwembu”? Hikwalaho ka leswi a nga riki kona ni un’we loyi a nga twisisaka leswi Rito ra Xikwembu ri swi vulaka handle ko pfuniwa hi xona. U nga rivali leswaku vutivi lebyi i nyiko. Yehovha u byi nyika ntsena lava rhandzaka ku lavisisa Rito ra yena hi mbilu hinkwayo ni hi ku titsongahata. Vanhu volavo va nga ha va va nga ‘tlharihanga hi tlhelo ra nyama.’ (1 Vakorinto 1:26) Vo tala va vona, vanhu va misava va nga ha va teka va ‘nga dyondzekanga va ri vanhu lava tolovelekeke.’ (Mintirho 4:13) Kambe, sweswo a hi swa nkoka. Yehovha u hi hakela hi “vutivi” bya yena hikwalaho ka timfanelo leti a ti kumaka etimbilwini ta hina.

⁷ Xiya xikombiso lexi. Swidyondzi swo tala eVujaganini swi tsale tinhlamuselo to tala ta Bibele. Tibuku toleto ti nga ha hlamusela matimu, leswi marito ya Xiheveru ni ya Xigriki ma vulaka swona ni swin’wana swo tala. Eka hinkwaswo leswi swi swi dyondzeke xana swidyondzi swoleswo swi byi kumile “vutivi bya Xikwembu”? Xana swa yi twisisa nhloko-mhaka ya Bibele—ku nga ku lweriwa ka vuhosi bya Yehovha hi ku tirhisa Mfumo wa yena wa le tilweni? Xana swa swi tiva leswaku Yehovha Xikwembu a hi xiphemu xa Vunharhu-un’we? Hambiswiritano, hina hi hambanile na swona, hi ni vutivi bya Xikwembu. Ha yini? Yehovha u hi katekisa hi vutlhari bya ntiyiso wa moya lebyi vo tala “lavo tlhariha ni lava nga ni ku twisisa” va nga riki na byona. (Matewu 11:25) Wa nga vona ndlela leyi Yehovha a katekisaka lava tshinelaka eka yena ha yona!

“Yehovha Wa Va Rindza Hinkwavo Lava N’wi Rhandzaka”

8, 9. (a) Xana Davhida u wu hlamusele njhani nkateko wun’wana wa lava va tshineleke eka Yehovha? (b) Ha yini Vakreste va ntiyiso va lava nsirhelelo wa Xikwembu?

⁸ Lava va tshineleke eka Yehovha va kuma nkateko wun’wana—ku sirheleriwa hi yena. Mupisalema Davhida, loyi a nga va ni swiphiqo swo tala, u tsarile: “Yehovha u le kusuhi ni hinkwavo lava  n’wi vitanaka, eka hinkwavo lava n’wi vitanaka hi ntiyiso. U ta enerisa ku navela ka lava va n’wi chavaka, naswona u ta ku twa ku rila ka vona va kombela ku pfuniwa, u ta va ponisa. Yehovha wa va rindza hinkwavo lava n’wi rhandzaka.” (Pisalema 145:18-20) Ina, Yehovha u le kusuhi ni lava n’wi rhandzaka naswona hi yona mhaka a hatlaka a va pfuna loko va kombela mpfuno.

⁹ Ha yini hi lava nsirhelelo wa Xikwembu? Handle ka ku hanya ‘eminkarhini ya mangava leyi swi nonon’hwaka ku langutana na yona,’ Vakreste va ntiyiso va hlaseriwa swinene hi Sathana Diyavulosi ku nga Nala lonkulu wa Yehovha. (2 Timotiya 3:1) Nala loyi wa mano u tiyimisele ku hi “dya.” (1 Petro 5:8) Sathana wa hi xanisa, wa hi kandziyela a tlhela a hi ringa. U tlhela a languta mianakanyo kumbe mbilu leyi nga ni langutelo leri voyameleke etlhelo ivi a hi hlasela hi ku tirhisa rona. Xikongomelo xakwe i xin’we: i ku tsanisa ripfumelo ra hina a tlhela a dlaya vumoya bya hina. (Nhlavutelo 12:12, 17) Leswi hi nga ni nala loyi wa matimba loyi hi faneleke hi lwa na yena, xana a swi hi nyiki matimba ku tiva leswaku “Yehovha wa va rindza hinkwavo lava n’wi rhandzaka”?

10. (a) Xana Yehovha u va sirhelela njhani vanhu vakwe? (b) Hi wihi nsirhelelo wa nkoka swinene, naswona ha yini wu ri wa nkoka?

¹⁰ Kambe, xana Yehovha u va sirhelela njhani vanhu va yena? Leswi a hi tshembiseke ku hi sirhelela a swi vuli swona leswaku a hi nge vi na swiphiqo emafambiselweni lawa ya swilo; naswona a swi vuli swona leswaku u fanele a endla masingita leswaku a hi sirhelela. Nilokoswiritano, Yehovha u sirhelela vanhu va yena. Phela, a nge pfumeleli Diyavulosi leswaku a herisa vagandzeri va ntiyiso emisaveni! (2 Petro 2:9) Ku tlula kwalaho, Yehovha wa hi sirhelela hi tlhelo ra moya. U hi hlomisa hi leswi hi swi lavaka leswaku hi kota ku tiyisela miringo ni ku sirhelela vuxaka bya hina na yena. Eku heteleleni, nsirhelelo wa moya i nchumu wa nkoka ngopfu wo hi sirhelela. Ha yini? Loko hi ri ni vuxaka na Yehovha ku hava nchumu lowu nga hi vavisaka hilaha ku nga heriki—hambi ku ri rifu.—Matewu 10:28.

11. Hi wahi malunghiselelo lawa Yehovha a ma endleke leswaku a sirhelela vanhu vakwe hi tlhelo ra moya?

¹¹ Yehovha u endle malunghiselelo yo tala ya moya leswaku a va sirhelela hi tlhelo ra moya lava tshinelaka eka yena. ERitweni ra yena, ku nga Bibele, u hi nyike vutlhari byo langutana ni miringo yo hambana-hambana hi ndlela leyi humelelaka. (Yakobo 1:2-5) Loko hi tirhisa ndzayo leyi twisisekaka leyi kumekaka eMatsalweni swi ta hi sirhelela. Ku engetela kwalaho, Yehovha u nyika ‘moya lowo kwetsima eka lava n’wi kombelaka.’ (Luka 11:13) Moya wolowo i matimba lamakulu swinene evuakweni hinkwabyo, xisweswo wu nga hi endla hi kota ku wu tiyisela hi ndlela leyi humelelaka ndzingo wun’wana ni wun’wana lowu hi nga langutanaka na wona. Yehovha u hi nyike “tinyiko leti nga vanhu” ha Kreste. (Vaefesa 4:8) Vavanuna lava va fanelekaka hi tlhelo ra moya va tikarhatela ku kombisa ntwela-vusiwana lowukulu wa Yehovha loko va pfuna vagandzeri-kulobye.—Yakobo 5:14, 15.

12, 13. (a) Xana Yehovha u hi phamela njhani swakudya swa moya hi nkarhi lowu faneleke? (b) Xana u titwisa ku yini hi malunghiselelo ya Yehovha yo khathalela vumoya bya hina?

¹² Yehovha u tlhela a hi sirhelela hi ndlela yin’wana: u hi nyika swakudya swa moya hi nkarhi lowu faneleke. (Matewu 24:45) Yehovha u hi nyika leswi hi faneleke hi swi kuma hi nkarhi wa kona hi ku tirhisa tibuku leti kandziyisiweke, ku katsa ni timagazini ta Xihondzo xo Rindza na Xalamuka!, swin’we ni minhlangano ya vandlha, tinhlengeletano  ni mintsombano. Xana u tsundzuka swin’wana leswi u swi tweke enhlanganweni wa Vukreste, enhlengeletanweni kumbe entsombanweni leswi khumbeke mbilu ya wena swi tlhela swi ku tiyisa kumbe swi ku chavelela? Xana u tshama u hlaya xihloko eka wun’wana wa timagazini leti boxiweke laha henhla kutani u swi xiya leswaku xi lo tsaleriwa wena?

¹³ Tlhari rin’wana leri Sathana a ri tirhisaka ngopfu i ku heta vanhu matimba, naswona na hina a nga hi heta matimba. U swi tiva kahle leswaku loko hi nga ri na ntshembo hi nga ha hela matimba hi tlhela hi hlaseleka hi ku olova. (Swivuriso 24:10) Leswi Sathana a ringetaka ku hi heta matimba, ha wu lava mpfuno. Minkarhi hinkwayo timagazini ta Xihondzo xo Rindza na Xalamuka! ti kandziyisa swihloko leswi hi pfunaka leswaku hi lwisana ni ku hela matimba. Malunghana ni xihloko xo tano, Mukreste un’wana wa xisati u tsarile: “A ndzi hlaya xihloko lexi siku ni siku, kambe ni sweswi ndza ha khapakhapa mihloti loko ndzi xi hlaya. Ndzi tshama ndzi xi veke etlhelo ka mubedo leswaku ndzi ta xi hlaya loko ndzi ri ni gome. Eka swihloko swo fana nileswi, ndzi twa onge Yehovha wa ndzi angarha a ndzi sirhelela.” * Xana a hi n’wi tlangeli Yehovha leswi a hi phamelaka swakudya swa moya hi nkarhi lowu faneleke? Tsundzuka leswaku malunghiselelo ya yena yo khathalela vumoya bya hina i vumbhoni bya leswaku u le kusuhi na hina naswona wa hi sirhelela.

Ndlela Yo Tshinela Eka “Mutwi Wa Xikhongelo”

14, 15. (a) Yehovha u va katekise hi yini lava nga ekusuhi na yena? (b) Ha yini ri ri lunghelo lerikulu ku khongela eka Yehovha hi ku ntshunxeka?

¹⁴ Xana u tshama u swi xiya leswaku loko vanhu va va ni matimba ni vulawuri, hakanyingi a va ha tshineleleki hi ku olova hi lava va lawuriwaka? Kambe, xana ku vuriwa yini hi Yehovha Xikwembu? Xana u le kule swinene lerova a nga tikarhata a yingisela swikhongelo swa vanhu lava nga nyawuriki? A swi tano nikatsongo! Nyiko ya xikhongelo i nkateko wun’wana lowu Yehovha a wu nyikaka lava nga ekusuhi na yena. I lunghelo lerikulu swinene ku va hi kota ku vulavurisana ni “Mutwi wa xikhongelo” hi ku ntshunxeka. (Pisalema 65:2) Ha yini?

¹⁵ Hi xikombiso: Mininjhere wa feme leyikulu u ni vutihlamuleri byo tala. Hi yena a kunguhataka leswaku hi swihi swilo leswi a nga ta swi endla hi yexe nileswaku hi swihi swilo leswi a nga ta swi nyika van’wana va swi endla. Hilaha ku fanaka, Mufumi la Tlakukeke wa vuako hinkwabyo wa swi kota ku hlawula leswaku hi swihi swilo leswi a nga ta swi endla hi yexe nileswaku hi swihi leswi a nga ta swi nyika van’wana leswaku va swi endla. Anakanya hi swilo hinkwaswo leswi Yehovha a swi nyikeke Yesu, N’wana wa yena la rhandzekaka leswaku a swi endla. N’wana u nyikiwe “matimba ya ku avanyisa.” (Yohane 5:27) Tintsumi ti “vekiwe ehansi ka yena.” (1 Petro 3:22) Yesu u nyikiwe moya lowo kwetsima wa Yehovha lowu nga ni matimba leswaku wu n’wi pfuna ku kongomisa vadyondzisiwa va yena emisaveni. (Yohane 15:26; 16:7) Hikwalaho Yesu u swi kotile ku vula a ku: “Ndzi  nyikiwe vulawuri hinkwabyo etilweni ni le misaveni.” (Matewu 28:18) Kambe loko swi ta emhakeni ya swikhongelo swa hina, Yehovha u hlawule ku swi yingisa hi yexe. Hi yona mhaka Bibele yi hi byelaka leswaku hi khongela eka Yehovha hi vito ra Yesu.—Pisalema 69:13; Yohane 14:6, 13.

16. Ha yini hi fanele hi tiyiseka leswaku hakunene Yehovha wa swi yingisa swikhongelo swa hina?

¹⁶ Xana Yehovha wa swi yingisa swikhongelo swa hina hakunene? Loko a a nga swi yingisi, a nga ta hi khutaza ku “phikelela exikhongelweni” kumbe ku lahlela ndzhwalo ni mivilelo ya hina eka yena. (Varhoma 12:12; Pisalema 55:22; 1 Petro 5:7) Malandza yo tshembeka ya le minkarhini ya Bibele a ma swi tshemba hilaha ku heleleke leswaku Yehovha wa swi yingisa swikhongelo. (1 Yohane 5:14) Xisweswo, mupisalema Davhida u te: “[Yehovha] u yingisa rito ra mina.” (Pisalema 55:17) Na hina a hi kanakani leswaku Yehovha u le kusuhi na hina, naswona u tshama a lunghekele ku yingisela hinkwaswo leswi hi swi phofulaka naswona wa hi khathalela.

Yehovha Wa Ma Vuyerisa Malandza Ya Yena

17, 18. (a) Xana Yehovha u titwisa ku yini hi ntirho wa swivumbiwa swa yena leswo tshembeka? (b) Hlamusela ndlela leyi Swivuriso 19:17 yi kombisaka hakona leswaku Yehovha wa swi vona swiendlo swa hina swa musa.

¹⁷ Leswi vanhu lava nga nyawuriki va swi endlaka kumbe va alaka ku swi endla a swi xi khumbi helo xikhundlha xa Yehovha xa ku va Hosi ya Vuako Hinkwabyo. Nilokoswiritano, Yehovha i Xikwembu lexi tshamaka xi lunghekele ku yingisa. Ntirho wa swivumbiwa swakwe leswi tshembekaka u wu teka wu ri wa nkoka—kahle-kahle wa wu tlangela. (Pisalema 147:11) Leyi hi yin’wana ya mikateko leyi tsakeriwaka hi lava nga ekusuhi na Yehovha: U vuyerisa malandza yakwe.—Vaheveru 11:6.

¹⁸ Bibele yi swi veka erivaleni leswaku Yehovha u swi teka swi ri swa nkoka leswi malandza ya yena ma swi endlaka. Hi xikombiso, ha hlaya: “Loyi a kombisaka xisiwana tintswalo u lomba Yehovha, naswona ndlela leyi a xi khomaka ha yona U ta yi tlherisela eka yena.” (Swivuriso 19:17) Leswaku Yehovha u khathalela swisiwana swi kombisiwe eNawini wa Muxe. (Levhitika 14:21; 19:15) Xana  Yehovha u titwisa ku yini loko hi tekelela musa wa yena loko hi ri karhi hi hanyisana ni swisiwana? Loko hi nyika swisiwana, hi nga langutelanga leswaku swi hi tlherisela, Yehovha u teka sweswo ku ri ku N’wi lomba. Yehovha u hi tshembisa leswaku u ta hi komba tintswalo a tlhela a hi katekisa loko hi kombisa musa wolowo. (Swivuriso 10:22; Matewu 6:3, 4; Luka 14:12-14) Ina, loko hi kombisa ntwela-vusiwana eka vagandzeri-kulorhi lava pfumalaka, sweswo swi tsakisa mbilu ya Yehovha. Vona ndlela leyi swi tsakisaka ha yona ku tiva leswaku Tata wa hina wa le tilweni wa swi vona swiendlo swa hina swa musa!— Matewu 5:7.

19. (a) Hi nga tiyiseka njhani leswaku Yehovha u swi teka swi ri swa nkoka leswi hi swi endlaka entirhweni wo chumayela ni ku endla vadyondzisiwa? (b) Xana Yehovha u yi hakela njhani mintirho leyi endleriwaka ku seketela Mfumo?

¹⁹ Yehovha u swi teka swi ri swa nkoka ngopfu leswi hi swi endlaka hikwalaho ka Mfumo wa yena. Loko hi tshinela eka Yehovha, hi susumeteleka ku tirhisa nkarhi wa hina, matimba ni rifuwo ra hina leswaku hi hlanganyela hilaha hi nga kotaka ha kona entirhweni wo chumayela hi Mfumo ni ku endla vadyondzisiwa. (Matewu 28:19, 20) Minkarhi yin’wana, hi nga vona onge a hi tirhi swi nyawula. Mbilu ya hina leyi nga hetisekangiki yi nga ha hi endla leswaku hi tivutisa loko Yehovha a eneriseka hi matshalatshala ya hina lawa hi ma endlaka. (1 Yohane 3:19, 20) Kambe Yehovha u tsakela xihi na xihi lexi hi n’wi nyikaka xona—hambi xo va xitsongo ngopfu—ntsena loko xi huma embilwini leyi susumetiwaka hi rirhandzu. (Marka 12:41-44) Bibele ya hi tiyisekisa: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.” (Vaheveru 6:10) Hakunene, Yehovha a nga wu rivali ntirho lowu endleriwaka Mfumo wa yena. Ku tlhandlekela eka mikateko ya moya leyi hi nga na yona sweswi, hi nga langutela vutomi lebyi tsakisaka emisaveni leyintshwa leyi taka, laha Yehovha a nga ta pfula xandla xa yena a enerisa ku navela lokunene ka hinkwavo lava nga ekusuhi na yena!—Pisalema 145:16; 2 Petro 3:13.

20. Eka lembe hinkwaro ra 2003, hi nga ma tsundzuka njhani marito ya ndzimana ya hina ya lembe, naswona hi ta vuyeriwa hi yini?

²⁰ Eka lembe hinkwaro ra 2003, a hi tivutiseni loko hi endla matshalatshala yo tshinela eka Tata wa hina wa le tilweni. Loko hi ma endla, hi ta tiyiseka leswaku u ta endla hilaha a tshembiseke hakona. Phela, ‘Xikwembu a xi hembi.’ (Tito 1:2) Loko u tshinela eka xona, na xona xi ta tshinela eka wena. (Yakobo 4:8) Endzhaku ka sweswo ku ta humelela yini? Hi ta kuma mikateko yo tala sweswi ni ntshembo wo tshama hi ri ekusuhi na Yehovha hilaha ku nga heriki!

[Nhlamuselo ya le hansi]

Wa Tsundzuka Xana?

• Hi yihi nyiko leyi Yehovha a yi nyikaka lava va tshinelaka eka yena?

• Hi wahi malunghiselelo lawa Yehovha a ma endlaka ku sirhelela vanhu vakwe hi tlhelo ra moya?

• Ha yini ku khongela eka Yehovha hi ku ntshunxeka ku ri lunghelo lerikulu?

• Xana Bibele yi swi kombisa njhani leswaku Yehovha u tlangela ntirho lowu endliwaka hi swivumbiwa swa yena leswo tshembeka?

[Swivutiso Swa Dyondzo]

[Xifaniso lexi nga eka tluka 15]

Yehovha u hi katekise hi ku twisisa mintiyiso ya moya

[Swifaniso leswi nga eka tluka 16, 17]

Yehovha wa hi sirhelela hi tlhelo ra moya

[Xifaniso lexi nga eka tluka 18]

Yehovha u le kusuhi, u tshama a lunghekele ku twa xikhongelo xin’wana ni xin’wana