Xiviko Xa Vahuweleri Va Mfumo

‘Rito Ra Xikwembu Ri Ni Matimba’

EXIHLALENI lexi hisaka xa Kharibiya le Jamaica, vanhu vo tala va yi toloverile Bibele. Kahle-kahle Bibele ya King James Version yi kumeka kwalomu ka muti wun’wana ni wun’wana, naswona vanhu van’wana va swi vonile leswaku “rito ra Xikwembu ra hanya naswona ri ni matimba.” (Vaheveru 4:12) Matimba lawa ma nga cinca vutomi, hilaha swi kombisiweke hakona hi ntokoto lowu landzelaka.

Wanuna loyi a vitaniwaka Cleveland, u endzele hi Mbhoni ya Yehovha loko a ha ku vuya entirhweni. Endzhaku ka loko yi n’wi byele tinhla leti humaka eMatsalweni, Mbhoni yi n’wi siyele buku yo dyondza Bibele leyi nge Vutivi Lebyi Yisaka eVuton’wini Lebyi Nga Heriki. Cleveland a a nga swi xiyi leswaku Rito ra Xikwembu ri nga va ni matimba hi ndlela yihi evuton’wini byakwe.

Cleveland a a tolovele ku khongela kanharhu hi siku, a kombela Xikwembu leswaku xi n’wi pfuna ku kuma ndlela ya ntiyiso ya ku xi gandzela. Cleveland a a swi vona leswaku vatswari vakwe a va nga gandzeli hi ndlela leyi faneleke, kambe endzhaku ka loko a kambisise vukhongeri byin’wana u hele matimba. Hambileswi a tshame a twa leswaku ku ni Timbhoni ta Yehovha, a a kanakana loko ti ri ni ntiyiso. Cleveland u pfumerile ku dyondza Bibele ni Mbhoni leyi n’wi endzeleke, hambileswi a a kanakana. Ha yini? Hikuva a a lava ku komba Timbhoni leswaku a ti na ntiyiso!

Hi ku hatlisa Cleveland u dyondze leswaku leswi a a rhandzana ni vavasati vambirhi, Xikwembu a xi nga swi tsakeli sweswo. (1 Vakorinto 6:9, 10) Endzhaku ka loko va dyondze kambirhi ntsena, u kanye mbilu a tshika vavasati volavo. U tlhele a sungula ku ya eminhlanganweni ya Vukreste eHolweni ya Mfumo. Kambe lowu a wu ri ndzingo wun’wana.

Cleveland a a ri mutlangi lonkulu wa bolo eka xipano xa le mugangeni wa ka vona, naswona mintlango ya kona a yi kotlana ni minkarhi yo ya eminhlanganweni. Xana a a ta endla yini? Hambileswi a ku ri ni ntshikilelo lowukulu wa vatlangi-kulobye, mudzaberi ni vanghana, Cleveland u kunguhate ku tshika xipano xa bolo. Ina, Rito ra Xikwembu a a ri sungula ku va ni matimba, a ri n’wi susumetela ku endla leswinene!

Matimba ya Rito ra Xikwembu ma tlhele ma vonaka loko Cleveland a sungula ku byela van’wana hi vutivi bya yena bya Bibele. (Mintirho 1:8) Hikwalaho, khale ka vatlangi-kulobye vambirhi va sungule ku ya eminhlanganweni ya Timbhoni ta Yehovha. Endzhaku ka loko Cleveland a faneleke ku va muhuweleri wa mahungu lamanene, a a yi tsakela ngopfu nsimu, loko a ri karhi a pfuna van’wana a tirhisa Rito ra Xikwembu.

Hikwalaho ka matimba ya Rito ra Xikwembu, Cleveland u hetelele a kombise ku tinyiketela ka yena eka Yehovha hi ku khuvuriwa, naswona sweswi i mutirheli wa nkarhi hinkwawo naswona i nandza wa vutirheli evandlheni.

Hakunene le Jamaica ni kun’wana magidi ya vanhu ma dyondzile leswaku Rito ra Xikwembu “ra hanya naswona ri ni matimba.”

[Mepe/Xifaniso lexi nga eka tluka 8]

(Leswaku u vona rungula leri hleriweke hi ku helela, vona nkandziyiso wa kona)

JAMAICA

[Xihlovo Xa Kona]

Map and globe: Mountain High Maps® Copyright © 1997 Digital Wisdom, Inc.