1. Hikwalaho ka yini swi fanerile ku vula leswaku swilo hinkwaswo i swa Yehovha? (Vona xifaniso lexi nga eku sunguleni.)

HINKWASWO i swa Yehovha! “Matilo ya matilo, misava ni hinkwaswo leswi nga eka yona,” i swa yena. (Det. 10:14; Nhlav. 4:11) Leswi vanhu hinkwavo va vumbiweke hi Yehovha, hinkwavo i va yena. (Ps. 100:3) Hambiswiritano, ematin’wini hinkwawo ya vanhu, Xikwembu xi hlawule ntlawa wo karhi wa vanhu tanihi vanhu va xona hi ndlela yo hlawuleka.

2. I va mani eBibeleni lava ku vuriwaka leswaku i va Yehovha hi ndlela yo hlawuleka?

² Hi xikombiso, loko Pisalema 135 yi vulavula hi vagandzeri va Yehovha vo tshembeka va le Israyele wa khale yi ri, i “ndzhaka yakwe yo hlawuleka.” (Ps. 135:4) Nakambe buku ya Hosiya yi profete leswaku van’wana lava nga riki Vaisrayele a va ta va vanhu Yehovha. (Hos. 2:23) Vuprofeta bya Hosiya byi hetiseke loko Yehovha a katse ni lava nga riki Vayuda, loko a hlawula vanhu lava nga ta fuma na Kreste. (Mint. 10:45; Rhom. 9:23-26) ‘Tiko leri, ro kwetsima’ i “nhundzu yo hlawuleka” ya Yehovha hi ndlela leyi hlamarisaka hikuva swirho swa yona swi totiwe hi moya lowo kwetsima naswona swi hlawuriwe ku ya hanya etilweni. (1 Pet. 2:9, 10) Ku vuriwa yini hi Vakreste vo tala vo tshembeka lava nga ni ntshembo wo hanya  laha misaveni? Na vona Yehovha u va vitana “vanhu” vakwe ni “vahlawuriwa” vakwe.—Esa. 65:22.

3. (a) I va mani lava namuntlha va nga ni vuxaka byo hlawuleka na Yehovha? (b) Hi ta kambisisa yini exihlokweni lexi?

³ Namuntlha “ntlhambinyana” lowu nga ni ntshembo wo hanya etilweni ni lava “tinyimpfu tin’wana” lava nga ni ntshembo wo hanya laha misaveni va vumba “ntlhambi wun’we” naswona Yehovha u va teka va ri vanhu vakwe. (Luka 12:32; Yoh. 10:16) Hakunene, hi lava ku kombisa Yehovha leswaku ha khensa leswi a hi pfumeleleke hi va ni vuxaka byo tano byo hlawuleka na yena. Eka xihloko lexi, hi ta kambisisa tindlela leti hi nga kombisaka Yehovha ha tona leswaku ha tlangela leswi a hi nyikeke lunghelo ro hlawuleka.

4. Hi yihi ndlela leyi hi nga kombisaka Yehovha ha yona leswaku hi tlangela lunghelo ro va ni vuxaka na yena naswona Yesu u endle leswi fanaka hi ndlela yihi?

⁴ Hi kombisa Yehovha leswaku ha tlangela loko hi ku tirhandzela hi nyiketela vutomi bya hina eka yena. Loko hi khuvuriwa, hi swi kombisa erivaleni leswaku hi lava ku lawuriwa hi Yehovha ni leswaku hi tiyimisele ku n’wi yingisa. (Hev. 12:9) Yesu u endle leswi fanaka loko a khuvuriwa hikuva u byele Yehovha a ku: “Oho Xikwembu xanga, ndzi tsakisiwe hi ku endla ku rhandza ka wena.” (Ps. 40:7, 8) Hambileswi Yesu a tswaleriweke eka tiko leri tinyiketeleke eka Xikwembu kambe u tinyiketele eka Yehovha leswaku a ta endla ku rhandza kakwe.

5, 6. (a) Xana Yehovha u titwe njhani loko Yesu a khuvuriwa? (b) Kombisa leswaku hikwalaho ka yini Yehovha a tlangela ku tinyiketela ka hina hambileswi swilo hinkwaswo swi nga swa yena.

⁵ Xana Yehovha u titwe njhani loko Yesu a khuvuriwa? Rungula leri nga eBibeleni ri ri: “Loko Yesu a khuvuriwile, a huma hi ku hatlisa ematini; kutani waswivo, matilo ma pfuleka, a vona moya wa Xikwembu wu xika ku fana ni tuva wu ta ehenhla ka yena. Waswivo! Nakambe, ku huma rito ematilweni, ri ku: ‘Loyi i N’wananga, la rhandzekaka, loyi ndzi n’wi amukeleke.’” (Mat. 3:16, 17) Hambileswi ni khale Yesu a ri wa Yehovha kambe Tata wakwe wa le tilweni a tsakile loko a vona N’wana wakwe a tiyimisele ku endla ku rhandza Kakwe ntsena. Hi ndlela leyi fanaka, Yehovha wa tsaka loko hi tinyiketela eka yena naswona u ta hi katekisa.—Ps. 149:4.

⁶ Hi xikombiso, a hi nge wanuna u byale swiluva swo saseka exirhapeni xakwe. Kutani siku rin’wana xinhwanyetana xakwe xi kha xiluva xin’we exirhapeni xolexo kutani xi n’wi nyika xona tanihi hi nyiko. Xana swiluva sweswo a swi nga ri swa yena wanuna loyi? Hikwalaho ka yini xi n’wi nyike nchumu lowu nga wa yena tanihi nyiko? Tatana la nga ni rirhandzu a nge swi ehleketi swivutiso sweswo. Ematshan’wini ya sweswo, u ta amukela nyiko yoleyo hi ntsako tanihi leswi yi kombisaka leswaku n’wana wakwe wa n’wi rhandza. U ta xi rhandza swinene xiluva xexo lexi humaka eka xinhwanyetana xakwe ku tlula swiluva hinkwaswo leswi nga exirhapeni xakwe. Yehovha na yena wa tsaka loko hi tinyiketela eka yena hi ku tirhandzela.—Eks. 34:14.

7. Xana Malakiya u yi hlamusela njhani ndlela leyi Yehovha a titwaka ha yona hi vanhu lava n’wi tirhelaka hi ku tirhandzela?

⁷ Hlaya Malakiya 3:16. Loko u nga si tinyiketela ni ku khuvuriwa, anakanyisisa hi nkoka wo teka xiboho xexo. Tsundzuka, ku sukela loko u ve kona u ve wa Yehovha, ku katsa ni vanhu hinkwavo. Kambe anakanya ndlela leyi Yehovha a nga ta tsaka ha yona, loko u pfumela ku lawuriwa hi yena naswona u tinyiketela eka yena leswaku u endla ku rhandza kakwe. (Swiv. 23:15) Yehovha na yena wa va tiva lava n’wi tirhelaka hi ku swi rhandza naswona u tsala mavito ya vona eka “buku ya xitsundzuxo.”

8, 9. I yini leswi Yehovha a swi languteleke eka lava mavito ya vona ma tsariweke eka “buku ya xitsundzuxo”?

 ⁸ Leswaku vito ra hina ri tsariwa eka “buku ya xitsundzuxo” ya Yehovha swi fambisana ni vutihlamuleri byo karhi. Malakiya u vule hi ku kongoma leswaku hi fanele hi ‘chava Yehovha ni ku anakanyisisa hi vito ra yena.’ Loko hi gandzela nchumu wo karhi kumbe munhu un’wana, vito hina ri ta susiwa ebukwini ya vutomi yo fanekisela ya Yehovha.—Eks. 32:33; Ps. 69:28.

⁹ Hikwalaho, ku tinyiketela ka hina eka Yehovha a swi katsi ntsena ku endla xitshembiso xo endla ku rhandza kakwe ni ku khuvuriwa ematini. Swiendlo sweswo i swa xinkarhana naswona swi hundza hi ku hatlisa. Hambiswiritano, ku tinyiketela ka hina eka Yehovha a hi swa xinkarhana kambe swi lava leswaku hi tshama hi tshembekile eka yena, loko ntsena ha ha hanya.—1 Pet. 4:1, 2.

10. I ku hambana kwihi loku faneleke ku va erivaleni exikarhi ka lava va gandzelaka Yehovha ni lava nga n’wi gandzeriki?

¹⁰ Xihloko lexi hundzuke xi kambisise rungula ra Bibele ra Kayini, Solomoni na Vaisrayele. Hinkwavo a va vula leswaku va gandzela Yehovha kambe a va nga tshembekanga. Swikombiso leswi, swi swi veka erivaleni leswaku lava hakunene va nga va Yehovha, va fanele va rhandza leswinene ni ku venga leswo biha. (Rhom. 12:9) Swa fanele hikuva endzhaku ka loko Malakiya a boxe “buku ya xitsundzuxo,” Yehovha u vulavule hi ku “hambana exikarhi ka lowo lulama ni lowo homboloka, exikarhi ka loyi a tirhelaka Xikwembu ni loyi a nga xi tirheliki.”—Mal. 3:18.

11. Hikwalaho ka yini swi fanele swi va erivaleni eka vanhu van’wana leswaku hi gandzela Yehovha?

¹¹ Leyi i ndlela yin’wana leyi hi nga kombaka Yehovha ha yona leswaku hi khensa leswi a hi hlawuleke tanihi vanhu vakwe. Leswaku hi gandzela Yehovha, swi fanele swi “vonaka eka vanhu hinkwavo.” (1 Tim. 4:15; Mat. 5:16) Tivutise: ‘Xana van’wana va swi xiya leswaku ndzi tshembekile eka Yehovha? Xana ndzi tshama ndzi lunghekele ku titivisa eka van’wana leswaku ndzi Mbhoni ya Yehovha?’ Yehovha a nga twa ku vava loko hi khomiwa hi tingana ku titivisa leswaku hi va yena, endzhaku ka loko a hi  hlawurile tanihi hi vanhu vakwe.—Ps. 119:46; hlaya Marka 8:38.

12, 13. Xana van’wana va endle yini leswi endlaka swi tika ku va hlawula tanihi Timbhoni ta Yehovha?

¹² Swa vava ku xiya leswaku ku ‘hambana exikarhi ka loyi a tirhelaka Xikwembu ni loyi a nga xi tirheliki,’ a ka ha vonaki eka Timbhoni tin’wana hikwalaho ka leswi ti tekeleleke “moya wa misava.” (1 Kor. 2:12) Wolowo i moya lowu enerisaka “ku navela ka nyama ya hina.” (Efe. 2:3) Hi xikombiso, van’wana va ha hlawula ku ambala ni ku tisasekisa hi ndlela leyi nga xiximekiki, ku nga khathariseki ndzayo leyi tshamelaka ku nyikeriwa emhakeni yoleyo. Va ambala swiambalo leswi manyaka kumbe leswi vonikelaka hambiloko va ya eminhlanganweni ya Vukreste. Kumbe va tekelela fexeni ya misava leyi yo tsemeta misisi ni yo luka. (1 Tim. 2:9, 10) Hikwalaho, loko va ri exikarhi ka ntshungu swi nga ha tika ku hambanisa lava tirhelaka Yehovha ni lava nga ni “xinakulobye ni misava.”—Yak. 4:4.

¹³ Hi ndlela yin’wana, Timbhoni tin’wana a ti yi tshikanga mikhuva ya misava. Matikhomelo ya tona swin’we ni ndlela leyi ti cinaka ha yona eswinkhubyanini a yi amukeleki eka Vakreste. Van’wana eka social media va veka swifaniso ni ku tsala marungula lama kombisaka langutelo ra misava. Swi nga endleka va nga si tshama va tshinyiwa evandlheni hikwalaho ko endla xidyoho lexikulu kambe va nga va ni nkucetelo wo biha eka tintangha ta vona leti tikarhatelaka ku tikhoma kahle exikarhi ka vanhu va Yehovha.—Hlaya 1 Petro 2:11, 12.

14. Hi fanele hi endla yini leswaku hi sirhelela vuxaka bya hina byo hlawuleka na Yehovha?

¹⁴ Misava yi hlohlotela vanhu ku rhangisa “ku navela ka nyama ni ku navela ka mahlo ni ku bombisa rifuwo ra munhu ra vutomi.” (1 Yoh. 2:16) Kambe, leswi hi nga va gandzeri va Yehovha, hi lemukisiwa leswaku hi “hambana ni ku nga xiximi Xikwembu ni ku navela ka misava, ni ku hanya hi mianakanyo yo hluteka ni ku lulama ni ku tinyiketela loku nga ni vukwembu exikarhi ka mafambiselo lawa ya swilo ya sweswi.” (Tito 2:12) Swilo hinkwaswo leswi hi swi endlaka, ndlela leyi hi vulavulaka ha yona, hi dyaka ha yona, hi nwaka ha yona ni ku ambala ha yona swi fanele swi swi veka erivaleni eka vanhu van’wana leswaku hi gandzela Yehovha.—Hlaya 1 Vakorinto 10:31, 32.

15. Hikwalaho ka yini hi fanele hi khoma vamakwerhu hi musa na hi rirhandzu?

¹⁵ Ndlela leyi hi byi tlangelaka ha yona vuxaka bya hina byo hlawuleka na Yehovha, yi nga vonaka eka ndlela leyi hi khomaka vamakwerhu ha yona. Na vona i va Yehovha. Loko hi tshama hi ri ni langutelo ro tano, mikarhi hinkwayo hi ta khoma vamakwerhu hi musa na hi rirhandzu. (1 Tes. 5:15) Yesu u byele valandzeri vakwe a ku: “Hinkwavo va ta tiva leswaku mi vadyondzisiwa va mina, loko mi rhandzana.”—Yoh. 13:35.

16. Hi xihi xikombiso lexi nga eNawini wa Muxe lexi kombisaka ndlela leyi Yehovha a titwaka ha yona hi vanhu vakwe?

¹⁶ Hi xikombiso, leswaku hi twisisa ndlela leyi hi faneleke hi khoma vamakwerhu ha yona evandlheni, a hi xiyeni leswi landzelaka. Swibya leswi a swi ri etempeleni ya Yehovha, a swi nyiketeriwile kumbe a swi tirhisiwa ntsena evugandzerini lebyi tengeke. Nawu wa Muxe wu nyikele vuxokoxoko bya ndlela leyi swibye leswi swi faneleke swi khathaleriwa ha yona naswona lava tlulaka nawu wolowo a va dlayiwa. (Tinhl. 1:50, 51) Leswi Yehovha a a khathala hi ndlela leyi swibya a swi fanele swi khomiwa ha yona, swi le rivaleni leswaku u khathala hi laha ku tlurisaka hi vanhu lava tinyiketeleke eka yena, lava n’wi gandzelaka hi ku tshembeka lava a va hlawuleke tanihi vanhu vakwe! Hikwalaho, loko Yehovha a vulavula hi vanhu va yena u ri: “Loyi a mi khumbaka u khumba ndzololo ya tihlo ranga.”—Zak. 2:8.

17. Xana Yehovha u “rhiya ndleve, a yingisa” yini?

¹⁷ Lexi tsakisaka, Malakiya u vule leswaku Yehovha u “rhiya ndleve, a yingisa” loko vanhu Vakwe va ri karhi va vulavurisana. (Mal. 3:16) Swi le rivaleni leswaku Yehovha “wa va tiva lava nga vakwe.” (2 Tim. 2:19) U swi tiva hinkwaswo swilo leswi hi swi vulaka ni ku swi endla. (Hev. 4:13) Loko hi nga va khomi kahle vamakwerhu, Yehovha u “rhiya ndleve, a yingisa.” Kambe hi nga tiyiseka leswaku Yehovha wa swi vona ni loko hi kombisa malwandla, hi hanana, hi rivalela ni ku va ni musa.—Hev. 13:16; 1 Pet. 4:8, 9.

18. Hi nga swi kombisa njhani leswaku ha swi tlangela ku va vanhu va Yehovha?

¹⁸ Hakunene hi lava ku kombisa Yehovha leswaku ha ri tlangela lunghelo ro va vanhu vakwe. Ha swi tiva leswaku i vutlhari ku pfumela ku lawuriwa hi yena hi ku nyiketela vutomi bya hina eka yena. Hambileswi hi hanyaka “exikarhi ka xitukulwana xo homboloka ni lexi gombonyokeke,” hi lava leswaku vanhu va vona leswaku hi ‘pfumala xisandzu ni ku kala nandzu, . . . hi voninga kukota mavoningo emisaveni.’ (Filp. 2:15) Hi tiyimisela ku papalata ku endla swilo swo biha. (Yak. 4:7) Naswona ha va rhandza ni ku va xixima vamakwerhu hikuva ha swi tiva leswaku na vona i vanhu va Yehovha.—Rhom. 12:10.

19. Xana Yehovha u va katekisa njhani vanhu vakwe?

¹⁹ Bibele yi tshembisa yi ku: “Yehovha a nge va fularheli vanhu vakwe.” (Ps. 94:14) Lexi i xitshembiso, ku nga khathariseki maxangu lama hi nga langutanaka na wona sweswi. Hambi ku ri rifu a ri nge swi koti ku hi hambanisa ni rirhandzu ra Yehovha. (Rhom. 8:38, 39) “Loko hi hanya hi hanyela Yehovha, ni loko hi fa, hi fela Yehovha. Hikokwalaho loko hi hanya ni loko hi fa, hi va Yehovha.” (Rhom. 14:8) Hakunene hi ri langutele hi mahlongati siku leri Yehovha a nga ta pfuxa vanghana vakwe vo tshembeka hinkwavo lava feke. (Mat. 22:32) Hambi ku ri sweswi, hi tiphina hi mikateko yo tala. Hilaha Bibele yi vulaka ha kona, “ra tsaka tiko leri Xikwembu xa rona ku nga Yehovha, Vanhu lava a va hlawuleke va va ndzhaka ya yena.”—Ps. 33:12.