NATALYA ni xifanyetana xakwe xa malembe ya kaye lexi vuriwaka Aslan, va tikume va kukuvale ekusuhi na Zarina ni xinhwanyetana xakwe xa malembe ya khumembirhi lexi vuriwaka Anzhelika. Kwalaho a ku ri ni vanhu vo tlula 1 000 lava a va katsa vana ni vanhu lavakulu, va tshamisiwe swin’we va rindziwe hi vahlaseri lava hlomeke.

Hi Ravunharhu nimixo, hi September 1, 2004, vana ni vatswari a va ri handle, va ri karhi va lunghiselela ku tlangela siku ro pfula ka xikolo eBeslan, exidorobaneni xa Alania le Rhaxiya. Hi xitshuketa, ku humelele vavanuna lava hlomeke hi swibamu ni lava hakarheke tibomo exikarhi ka ntshungu, va ri karhi va balesela emoyeni ni ku huwelela. Vahlaseri volavo vo tlula 30 va khayime ntshungu lowu a wu chuhile va wu nghenisa etlilasini yo endlela vutiolori va tlhela va rhiya tibomo etlilasini yoleyo.

Vahlaseri ni varindzi va sungule ku jamelana ku ringana masiku manharhu va tshwukiselane mahlo. Natalya loyi a a dyondza Bibele ni Timbhoni ta Yehovha u ri: “A ndzi si tshama ndzi khongela hi ndlela leyi ndzi khongeleke ha yona.”

A ku ri ximumu naswona tlilasi yoleyo yo endlela vutiolori a yi hisa swinene. Hi xa mundzuku wa kona, vahlaseri a va va nyikanga swakudya kumbe mati vanhu lava tlhakisiweke naswona hi siku ra vunharhu va ri kwalaho, ku nga Ravuntlhanu, vanhu lava tlhakisiweke va boheke ku nwa mitsakamiso va tlhela va dya swiluva leswi vana a va swi tisele vadyondzisi va vona. Natalya u ri: “Xifanyetana lexi a xi tshame etlhelo ka mina xi ndzi nyike kamba kutani ndzi ri pheme hi le xikarhi, ndzi teka hafu leyin’wana ndzi yi nyika Anzhelika ivi leyin’wana ndzi yi nyika Aslan.”

 Nimadyambu hi siku ra vunharhu, ku tlhekeke nyimpi. Natalya u ri: “Ku buluke tibomo hiloko ndzi wa. Musi lowu dzwihaleke wu tate hinkwako kutani masocha ni matherorisi ma sungule ku duvulana.” Natalya na Aslan va kase va baleka loko masocha ni matherorisi va ri karhi va duvulana. Muakatiko un’wana wa le ndhawini yoleyo ya Ossetia loyi a vuriwaka Alan, u va kokile a va yisa endhawini leyi sirhelelekeke. Vo tala a va swi kotanga ku baleka.

Vana va madzanadzana swin’we ni vanhu lavakulu va file ku katsa na Anzhelika. Ku hele mavhiki yo tala vanhu va ri karhi va rila ni ku konya eBeslan. Kaya ra Natalya a ri ri ekusuhi ni xikolo naswona hambi loko se xikolo lexintshwa xi akiwile ekusuhi ni kwalaho, Aslan a a nga lavi ni ku vona nyangwa wa xikolo xolexo. A a chava hambi ku ya tlanga ehandle. Natalya u ri: “Hi kombele Yehovha leswaku a n’wi pfuna ku hlula ku chava.” Hi ku famba ka nkarhi u ve ni xivindzi xo tlhelela exikolweni.

Ndzingo lowukulu lowu Natalya a a ri na wona a ku ri ku ya eminhlanganweni ya Vukreste eHolweni ya Timbhoni ta Yehovha. U ri: “Nkarhi ni nkarhi loko ndzi tikuma ndzi ri ni vanhu vo tala hi ri emuakweni wun’we, a ndzi twa onge wu ta hlaseriwa. Kutani a ndzi khongela leswaku ku nga endleki nchumu. Endzhaku ka nkarhi ndzi tshike ku ya eminhlanganweni, nakambe a swi ndzi karhata ku tiva leswaku vanhu vo tala a va ponanga.”

Natalya u ri: “Ndza va nkhensa swinene lava evandlheni va yeke emahlweni va ndzi pfuna. Nakambe Tatyana loyi a nga Mbhoni ya Yehovha a a ndzi endzela endzhaku ka masiku man’wana ni man’wana manharhu a nga karhali. Loko se nkarhi wu ri karhi wu famba, u te na Ulyana loyi na yena a nga Mbhoni ya Yehovha loyi a a ri ni musa, a tlharihile, a ri ni rito ra le hansi, naswona a a yi tiva ngopfu Bibele. U ndzi bumabumerile hikwalaho ka matshalatshala lawa ndzi ma endleke naswona a a rhiya ndleve loko ndzi vulavula.

“Ulyana u ndzi hlayele marito ya Mukreste loyi a vuriwaka muapostola Pawulo lama kumekaka eka 2 Vakorinto 1:9. Endzhaku ko xaniseka le Asia, Pawulo u te: ‘A hi titwa endzeni ka hina leswaku hi kume xigwevo xa rifu.’ U tlhele a ndzi hlayela tsalwa ra Esaya 40:31 leri nge: ‘Kambe lava tshembaka Yehovha va ta tlhela va kuma matimba. Va ta tlakuka hi timpapa ku fana ni magama.’ Matsalwa lawa swin’we ni ku seketeriwa nkarhi ni nkarhi hi Ulyana ni van’wana, swi ndzi chavelerile leswaku ndzi tlhela ndzi ya eminhlanganweni ya Vukreste swin’we ni vana va mina. Hambiswiritano, swa ha ndzi tikelanyana ku va eholweni.”

Hi ku famba ka nkarhi Zarina u ve Mbhoni ya Yehovha naswona u swi langutele hi mahlongati ku hlanganisa Anzhelika loko a pfuxiwa eku feni emisaveni yo saseka, leyi nga ni ku rhula ehansi ka Mfumo wa Xikwembu. (Matewu 6:9, 10; Mintirho 24:15) Natalya ni vana vakwe va khuvuriwe hi 2009. Va ha tshama ekusuhi na rhumbi ra tlilasi yo endlela vutiolori kambe sweswi va hlakarherile. Natalya u ri: “Sweswi ndza swi kota ku vulavula hi ta siku leriya handle ko karhateka ni ku chava. Xikwembu xi le ku hi pfuneni leswaku hi hlakarhela.”