Bibele yi khutaza ku va ni langutelo lerinene hi ku humelela. A yi dyondzisi leswaku ku humelela ku kumiwa hi vanhu va nga ri vangani ntsena lava nga ni nkateko. Hi hala tlhelo, a yi seketeli milorho leyi nga eka buku ya mintsheketo ya leswaku loko u ‘landzela milorho ya wena’ hinkwaswo leswi u swi navelaka swi ta endleka. Marito wolawo lama talaka ku byeriwa vana ku sukela loko va ha ri vatsongo, hakanyingi a ma hetiseki.

Ntiyiso wa mhaka hi leswaku ku humelela ka xiviri ku nga kumiwa hi vanhu hinkwavo, kambe swi lava matshalatshala. Xiya milawu leyi landzelaka.

• LESWI BIBELE YI SWI VULAKA:

  “La rhandzaka silivhere ntsena a nge enerisiwi hi silivhere, hambi ku ri la rhandzaka rifuwo a nge enerisiwi hi vuyelo.”—Eklesiasta 5:10.

  LESWI SWI VULAKA SWONA. Ku va ni rifuwo a swi vuli swona leswaku munhu u ta eneriseka. Entiyisweni a nga eneriseki. Dokodela Jean M. Twenge, eka buku yakwe leyi nge Generation Me, u tsale a ku: “Vanhu lava hlongorisaka mali va tala ku tshikileleka naswona va khomiwa hi ntshikilelo wa mianakanyo ku tlula vanhu lava va tekaka ku va ni vuxaka ni vanhu van’wana swi ri swa nkoka.” U tlhele a ku: “Vulavisisi byi kombisa leswaku mali a yi nge wu xavi ntsako—hikuva hambi loko u kuma mali yoleyo, a wu eneriseki evuton’wini.”

  LESWI U NGA SWI ENDLAKA. Tivekele pakani yo kuma nchumu lowu nga ta ku vuyerisa swinene ku tlula rifuwo. Yesu u te: “[Tivoneleni] eka muxaka wun’wana ni wun’wana wa ku navela, hikuva hambiloko munhu a ri ni swo tala, vutomi byakwe a byi humi eka swilo leswi a nga na swona.”—Luka 12:15.

•  LESWI BIBELE YI SWI VULAKA:

  “Ku tinyungubyisa ku le kusuhi ni ku wa, ni moya lowu titlakusaka wu le kusuhi ni ku khunguvanyeka.”—Swivuriso 16:18.

  LESWI SWI VULAKA SWONA. Ku navela ku fuwa ni ku tikukumuxa a swi nge ku pfuni leswaku u kuma ku humelela ka xiviri. Kahle-kahle, buku leyi nge Good to Great yi vula leswaku varhangeri va tikhampani leti swi ti fambeleke kahle nkarhi wo leha “va tikomba va titsongahata, va nga titlakusi naswona a va tilaveli ndhuma. Hi hala tlhelo, tikhampani timbirhi eka tinharhu leti a ku pimanisiwa na tona a ti ri ni varhangeri lava tikukumuxaka swinene, leswi endleke leswaku tikhampani teto ti wa kumbe swi ti fambela ximatsi.” Hi dyondza yini eka leswi? Hi dyondza leswaku ku titlakusa swi tala ku endla leswaku swilo swi ku fambela ximatsi ku ri na ku va swi ku fambela kahle.

  LESWI U NGA SWI ENDLAKA. Hlakulela moya wo titsongahata ematshan’weni yo tilavela ndhuma. Bibele yi ri: “Loko munhu a ehleketa leswaku yena i nchumu kasi a hi nchumu, u xisa mianakanyo yakwe”—sweswo a swi kombisi ku humelela ka xiviri.—Vagalatiya 6:3.

•  LESWI BIBELE YI SWI VULAKA:

  “Malunghana ni munhu a ku na nchumu xo antswa ku tlula . . . [ku] vona leswinene hikwalaho ka ku tikarhata kakwe.”—Eklesiasta 2:24.

  LESWI SWI VULAKA SWONA. Loko u tirha hi ku tiyimisela, swi ta endla leswaku u ya u wu rhandza swinene ntirho wa wena. Dokodela Madeline Levine, ebukwini yakwe leyi nge Teach Your Children Well, u tsale a ku: “Xin’wana lexi endlaka munhu a titwa a humelerile eka nchumu wo karhi, i ku va a wu endla kahle nchumu wa kona naswona leswaku munhu a kota ku wu endla kahle nchumu wo karhi swi lava matshalatshala ni ku tiyimisela.” Sweswo swi katsa ni ku tiyisela loko a langutana ni swiphiqo.

  LESWI U NGA SWI ENDLAKA. Tirha hi matimba leswaku u tiva kahle ntirho wa wena naswona u nga wi mapa loko u hlangavetana ni swihinga. Loko u ri ni vana, (hi ku ya hi malembe ni vuswikoti bya vona) va nyike nkarhi wo titlhantlhela swiphiqo swa vona. U nga hatliseli ku nghenelela u va tlhantlhela swiphiqo swa vona hinkwaswo. Vantshwa va eneriseka kahle ni ku kuma ndzetelo lowunene lowu nga ta va pfuna loko se va kurile—loko va dyondza ku tiyisela.

• LESWI BIBELE YI SWI VULAKA:

  “Mbyana leyi hanyaka ya antswa swinene ku ri ni nghala leyi feke.”—Eklesiasta 9:4.

  LESWI SWI VULAKA SWONA. Loko u tirha ntirho wa ku tihanyisa, ntirho wa wena wu fanele wu va xiphemu xa vutomi bya wena—kambe ku nga ri ku hanyela wona. Xana u nga titwa u humelerile hakunene loko u wu endla kahle ntirho wa wena kambe wu ri karhi wu ku vangela mavabyi kumbe ndyangu wa wena wu nga ha ku xiximi? Vanhu lava humeleleke hakunene va tikarhatela ku ringanisela loko swi ta etimhakeni ta ntirho, rihanyo ni vutomi bya ndyangu.

  LESWI U NGA SWI ENDLAKA. Ti khathalele. Kuma nkarhi lowu eneleke wo wisa. A swi pfuni nchumu ku tshama u khomekile hi ntirho lerova u nga ha ri na mhaka ni swilo swin’wana, swo tanihi rihanyo, ndyangu ni ku va ni xinghana ni vanhu van’wana, leswaku u va la humeleleke hi ndlela leyi nga riki ya xiviri.

• LESWI BIBELE YI SWI VULAKA:

  “Va tsaka lava khathalaka hi xilaveko xa vona xa moya.”—Matewu 5:3.

  LESWI SWI VULAKA SWONA. Ku dyondza Bibele ni ku tirhisa milawu ya yona swi pfuna ngopfu loko swi ta emhakeni ya ku humelela ka xiviri. Entiyisweni, Timbhoni ta Yehovha ta timiliyoni tikume leswaku ku rhangisa ntirho wa Xikwembu evuton’wini bya tona swi endle leswaku ti hunguta ntshikilelo lowu vangiwaka hi ku hlongorisa rifuwo.—Matewu 6:31-33.

  LESWI U NGA SWI ENDLAKA. Dyondza ndlela leyi Bibele yi nga ku pfunaka ha yona leswaku u kuma ku humelela ka xiviri. Leswaku u kuma rungula leri engetelekeke, tihlanganise ni Timbhoni ta Yehovha ta laha u tshamaka kona, kumbe u nghena eka Web site ya hina leyi nge www.isa4310.com/ts.