Nhlayo ya vatekani lava dlayaka vukati eBeijing yi tlakuke hi 41 wa tiphesente etin’hwetini to sungula ta kaye ta 2013 loko ti ringanisiwa ni ta 2012. Vatshila va pfumela leswaku ku tlakuka koloko ku nga ha va ku vangiwe hi mimpatswa leyi ringetaka ku balekela ku hakela xibalo xa 20 wa tiphesente, lexi yi sindzisiwaka ku xi hakela eka mali leyi kumiwaka loko ku xavisiwa tiyindlu. Ehansi ka swiyimo swo karhi, mpatswa wun’wana ni wun’wana lowu dlayeke vukati lowu xavisaka yindlu ya vumbirhi, wu hunguteriwa xibalo xexo.

Nhlangano wa Matiko wu ringanyeta leswaku vanhu vo tala va dya switsotswana leswaku va nga siki. Swi ni rihanyo swinene naswona switsotswana leswi dyiwaka swi dya swilo leswi vanhu va tsandzekaka ku swi dya. Xiviko xa sweswinyana xi vula leswaku “vanhu va nga dya swona ematshan’weni ya nyama.” Hambiswiritano xiviko xexo xi tlhela xi vula leswaku “etindhawini tin’wana switsotswana swa nyenyiwa swinene.”

Titliniki leti pfunaka vanhu leswaku vava ni vana, ti le khombyeni ra ku nga tivi leswaku ti ta endla yini hi switumbulukwa leswi omisiweke swi va ayisi leswi vini va swona a va tiviwi lomu va nga kona. Eka tliniki yin’wana ku vuriwa leswaku ku ni switumbulukwa swa 1 000 swa vanhu lava va endleriweke vana hi ku tirhisa endlelo leri vuriwaka vitro fertilization laha ku hlanganisiwaka tandza ra wansati ni mbewu ya wanuna elaboratori naswona vini va kona a va tiviwi lomu va nga kona.

Makhatoliki lama cataka eIreland, ma fanele ma hlawula leswaku ma ta tekana hi ku ya hi nawu wa kereke kumbe ma ta ya tsarisa eka majistarata kukondza ku hela lembe ra 2013 loko se ku ri ni lunghiselelo ra ku catisa leri endliwaka hi vanhu lava nga ngheniki kereke. Xiviko xa mahungu ya Reuters xi vula leswaku “lava lavaka ku tsarisa mucato wa vona eka mfumo kambe va tlhela va lava ku endla nkhuvo lowu nga sekeriwangiki eka vukhongeri, va endle leswaku ku va ni ntlimbano eka lunghiselelo rin’wana lerintshwa.