“Nyoka ya khale, leyi vuriwaka Diyavulosi na Sathana, [yi xisa] misava hinkwayo leyi akiweke.”—Nhlavutelo 12:9.

LESWI VANHU VA SWI VULAKA

Vanhu van’wana va vula leswaku Sathana Diyavulosi a hi xivumbiwa xa xiviri, kambe i moya wo biha lowu kumekaka endzeni ka munhu un’wana ni un’wana.

LESWI BIBELE YI SWI VULAKA

Sathana i xivumbiwa xa xiviri. I ntsumi leyi xandzukeke, ku nga xivumbiwa xa moya lexi lwisanaka ni Xikwembu. Bibele yi vula leswaku Sathana i “mufumi wa misava leyi.” (Yohane 12:31) U tirhisa “mahlori ya mavunwa” ni “vuxisi” leswaku a hetisisa swikongomelo swakwe.—2 Vatesalonika 2:9, 10.

EBibeleni ku ni mbulavurisano lowu veke kona etilweni exikarhi ka Sathana ni Xikwembu. Loko ku ri leswaku Sathana i moya wo biha lowu kumekaka endzeni ka munhu un’wana ni un’wana, xana Xikwembu lexi hetisekeke naswona xi nga solekiki, xi nga vulavurisa ku yini ni moya wo biha lowu kumekaka endzeni ka xona? (Deteronoma 32:4; Yobo 2:1-6) Kutani, swi le rivaleni leswaku Sathana i xivumbiwa xa xiviri, ku nga ri moya wo biha lowu ku vuriwaka leswaku wu kumeka endzeni ka munhu un’wana ni un’wana.

HA YINI MHAKA LEYI YI FANELE YI VA YA NKOKA EKA WENA?

Swivangelo swa Sathana swo lava ku ku endla u kholwa leswaku a nga hanyi nikatsongo, swi fana ni swa xigevenga lexi tifihlaka leswaku xi ta hambeta xi tlula nawu xi nga kumiwi. Leswaku u kota ku tisirhelela eka Sathana, u fanele u sungula u tiva leswaku u kona hakunene.

“Khombo eka misava . . . hikuva Diyavulosi u xikele eka n’wina.”—Nhlavutelo 12:12.

 LESWI VANHU VA SWI VULAKA

Vanhu vo tala va pfumela leswaku Sathana u tshama emugodini wa ndzilo lowu nga tihele. Van’wana va pfumela leswaku u tshama endzeni ka vanhu vo homboloka.

LESWI BIBELE YI SWI VULAKA

Sathana i xivumbiwa xa moya, hikwalaho u tshama exivandleni lexi nga vonakiki. Ku ringana nkarhi wo karhi, Sathana a a pfumeleriwe ku tirhendzelekela hi ku tirhandzela laha Xikwembu a xi tshama kona ni tintsumi ta xona to tshembeka. (Yobo 1:6) Hambiswiritano, sweswi u hlongoriwile emahlweni ka Xikwembu swin’we ni swivumbiwa swin’wana swo homboloka, u lahleriwe emisaveni.—Nhlavutelo 12:12.

Xana leswi swi vula leswaku Sathana u tshama endhawini yin’we ntsena laha misaveni? Hi xikombiso, swi nga ha endleka u tshame u hlaya leswaku muti wa khale wa Pergamo a wu vuriwa “laha Sathana a tshamaka kona.” (Nhlavutelo 2:13) Entiyisweni, xiga xexo a xi kombetela eka vugandzeri bya Sathana lebyi a byi tinyike matimba emutini wolowo. Sathana a nga tshami endhawini yin’we laha misaveni. Ematshan’weni ya sweswo, Bibele yi vula leswaku “mimfumo hinkwayo ya misava” i ya yena.—Luka 4:5, 6.

“Misava hinkwayo yi le hansi ka matimba ya lowo homboloka.”—1 Yohane 5:19.

LESWI BIBELE YI SWI VULAKA

Vanhu vo tala va pfumele ku kuceteriwa hi vuxisi bya Sathana hikwalaho se va lawuriwa hi yena. (2 Vakorinto 11:14) Mhaka leyi yi swi kombisa kahle leswi endlaka vanhu va tsandzeka ku antswisa swiyimo swa misava leyi.

Nakambe, Bibele yi ni rungula ro tala leri twisaka ku vava swinene, laha Sathana kumbe tintsumi tin’wana leti xandzukeke va lawuleke vanhu kumbe ku va twisa ku vava.—Matewu 12:22; 17:15-18; Marka 5:2-5.

LESWI U NGA SWI ENDLAKA

A wu fanelanga u chava matimba ya Sathana. Leswaku u kota ku papalata ku kuceteriwa kumbe ku lawuriwa hi yena, u fanele u dyondza hi ndlela leyi a kucetelaka vanhu ha yona, leswaku u ta “tiva makungu yakwe.” (2 Vakorinto 2:11) Loko u hlaya Bibele, u nga kuma vutivi bya risima swinene lebyi nga ku pfunaka leswaku u tiva marhengu ya Sathana kutani u papalata ku phasiwa hi wona.

Cukumeta swilo hinkwaswo leswi fambisanaka ni madimona. (Mintirho 19:19) Swilo swa kona swi katsa switshungulo, tikopi ta swilo leswi printiweke, tivhidiyo, vuyimbeleri ni swilo hinkwaswo leswi u nga kotaka ku swi vona eka khompyuta leswi hlohlotelaka vungoma.

Bibele yi ri: “Mi kaneta Diyavulosi, kutani u ta mi balekela.” (Yakobo 4:7) Loko u yingisa xitsundzuxo xa vutlhari lexi kumekaka eBibeleni, u nga kota ku tisirhelela eka marhengu ya Sathana.—Vaefesa 6:11-18.