YAKOBO na Yudha a va ri vamakwavo va Yesu hi manana. Petro na Yohane a va ri van’wana va vaapostola va Yesu lava 12. Vavanuna volavo va mune va tsale mapapila ya nkombo lama kumekaka eMatsalweni ya Vukreste ya Xigriki. Papila rin’wana ni rin’wana ri vitaniwa hi vito ra mutsari wa rona. Xitsundzuxo lexi huhuteriweke lexi kumekaka eka mapapila lawa a xi ri xa ku pfuna Vakreste leswaku va tshama va tshembekile eka Yehovha ni le ka Mfumo wa yena.

Vakreste va fanele va va ni ripfumelo. Ku vula ntsena leswaku u ni ripfumelo a swi enelanga. Ripfumelo ra xiviri ri kombisiwa hi mintirho. Yakobo u tsarile: “Kunene, . . . ripfumelo leri nga riki na mintirho ri file.” (Yakobo 2:26) Ku va ni ripfumelo loko u langutane ni miringo swi endla leswaku u tiyisela. Leswaku Mukreste a kota ku tiyisela u fanele a kombela Xikwembu leswaku xi n’wi nyika vutlhari naswona a khorwiseka leswaku Xikwembu xi ta n’wi nyika byona. Ku tiyisela swi endla leswaku munhu a amukeleka eka Xikwembu. (Yakobo 1:2-6, 12) Loko mugandzeri la nga ni ripfumelo a tshama a tshembekile, Yehovha Xikwembu u ta n’wi pfuna. Yakobo u ri: “Tshinelani eka Xikwembu, kutani xi ta tshinela eka n’wina.”—Yakobo 4:8.

Ripfumelo ra Mukreste ri fanele ri va leri tiyeke swinene leswaku ri n’wi pfuna a lwisana ni miringo ni minkucetelo yo biha. Nkucetelo lowu a wu ri kona wa mahanyelo yo biha wu susumetele Yudha ku khutaza vapfumeri-kulobye ku “lwa hi matimba [va] lwela ripfumelo.”—Yudha 3.

Vakreste va fanele va va ni mahanyelo lama tengeke. Yehovha u lava leswaku vagandzeri va yena va va lava kwetsimaka, hileswaku va basa hi tindlela hinkwato. Petro u tsarile: “Kwetsimani na n’wina eku tikhomeni ka n’wina hinkwako, hikuva ku tsariwile: ‘Mi fanele mi kwetsima, hikuva mina [Yehovha] ndza kwetsima.’” (1 Petro 1:15, 16) Vakreste va ni xikombiso lexi va faneleke va xi tekelela. Petro u te: “Kreste u xanisekele n’wina, a mi siyela ntila leswaku mi landzelerisisa mikondzo yakwe.” (1 Petro 2:21) Hambiloko Vakreste vo xanisiwa hikwalaho ka leswi va hanyaka hi milawu leyi kongomisaka ya Xikwembu, va ni “ripfalo lerinene.” (1 Petro 3:16, 17) Petro u khutaza Vakreste leswaku va tikhoma hi ndlela yo kwetsima va kombisa swiendlo swo tala swa ku tinyiketela ka ku chava Xikwembu loko va ha rindzele siku ra Xikwembu ra ku avanyisa ni misava leyintshwa leyi tshembisiweke laha ‘ku nga ta va ni ku lulama.’—2 Petro 3:11-13.

Vakreste va fanele va va ni rirhandzu. Yohane u tsarile: “Xikwembu i rirhandzu.” Muapostola loyi u kombise leswaku Xikwembu xi kombise rirhandzu ra xona lerikulu hi ku rhumela Yesu tanihi “gandzelo . . . ra swidyoho swa hina.” Xana Vakreste va fanele va endla yini? Yohane wa hlamusela: “Varhandziwa, loko leyi ku ri ndlela leyi Xikwembu xi hi rhandzeke ha yona, kutani hina hi boheka ku rhandzana.” (1 Yohane 4:8-11) Ndlela yin’wana yo kombisa rirhandzu rolero i ku va ni malwandla eka vapfumeri-kulorhi.—3 Yohane 5-8.

Kambe, xana vagandzeri va Yehovha va nga swi kombisa njhani leswaku va n’wi rhandza? Yohane wa hlamula: “Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.” (1 Yohane 5:3; 2 Yohane 6) Lava va yingisaka Xikwembu va tiyisekisiwa leswaku va ta hambeta va rhandziwa hi Xikwembu va “ri ni xikongomelo xa vutomi lebyi nga heriki.”—Yudha 21.

—Xi sekeriwe eka Yakobo; 1 Petro; 2 Petro; 1 Yohane; 2 Yohane; 3 Yohane; Yudha.