Igor: Havumbirhi bya hina a hi hlanganyela eka ntlawa wa Timbhoni lowu a wu tshama edorobeni ra Tkvarcheli, le Abkhazia. Tanihi leswi vandlha leri ntlawa wa hina a wu ri eka rona a ri ri ekule hi kwalomu ka tikhilomitara ta 85 ku suka edorobeni ra Jvari, n’hweti ni n’hweti a ndzi ya eTkvarcheli ndzi ya tekela ntlawa wolowo minkandziyiso leyi sekeriweke eBibeleni. Hi 1992, endzhaku ka loko Soviet Union yi wile, xifundzha lexi tifumaka xa le Abkhazia xi ringete ku tiyimela xoxe. Nyimpi leyi veke kona exikarhi ka vanhu lava a va lava ku ti sungulela mfumo ni vuthu ra le Georgia, yi endle leswaku swi tika swinene.

Gizo: Ndzi khuvuriwe ndzi ri ni malembe ya 21, a ka ha sele lembe nyimpi yi nga si sungula. Loko nyimpi yi sungula, vamakwerhu a va chuhile swinene naswona a va nga swi tivi leswaku va ta chumayela njhani. Kambe Igor, loyi minkarhi hinkwayo a a ri murisi lonene a tshamela ku hi khutaza a ku: “Lowu i nkarhi lowu vanhu va lavaka ku  chaveleriwa. Nchumu wun’we ntsena lowu nga endlaka leswaku hi tshama hi ri ni vuxaka lebyi tiyeke na Yehovha i ku ya emahlweni hi chumayela.” Hi vuxiyaxiya, siku ni siku hi ye emahlweni hi byela vanhu rungula leri chavelelaka leri humaka eRitweni ra Xikwembu.

Igor: Hikwalaho ka nyimpi, a hi nga swi koti ku tirhisa ndlela leyi a hi tolovele ku yi tirhisa loko hi landza minkandziyiso eJvari. Tanihi leswi a ndzi kulele eka xifundzha lexi, a ndzi kota ku hundza hi le ndleleni leyi sirhelekeke emasin’wini ya tiya ni le tintshaveni. Kambe a ndzi ta tiveka ekhombyeni ro hlangana ni ntlawa wa vavanuna lava hlomeke kumbe ndzi famba ehenhla ka ndhawu leyi ku fuhlekiweke bomo. Hambiswiritano, a ndzi nga lavi ku veka vutomi bya vamakwerhu ekhombyeni, kutani a ndzi famba ndzi ri ndzexe kan’we hi n’hweti. Hi ku pfuniwa hi Yehovha, minkarhi hinkwayo a ndzi swi kota ku kuma minkandziyiso hi nkarhi lowu faneleke leyi hi pfuneke leswaku hi tshama hi ri ni vuxaka na yena.

Hambileswi a ku nga ri na nyimpi eTkvarcheli, doroba ra hina a ri nga pfumeleriwi ku nghenisa swilo swo karhi, sweswo swi endle leswaku swiyimo swi tika hi nkarhi wa nyimpi. Tanihi leswi xixika a xi tshinela, swakudya a swi hela, kutani hinkwerhu a hi vilela swinene hi vutomi bya hina. A hi tsake swinene loko hi twa leswaku vamakwerhu va le Jvari va hlele tsima ro phalala leswaku va hi pfuna.

Gizo: Siku rin’wana, Igor u kombele ndyangu wa mina loko swi ta koteka leswaku yindlu ya hina yi tirhiseriwa ku veka ni ku va ndhawu ya mphakelo wa swakudya leswi a swi huma eka vamakwerhu. A a kunguhate ku kuma swakudya eJvari. A hi karhatekile hi vuhlayiseki byakwe, hi ku tiva leswaku a ta hundza etindhawini to hambanahambana a ri karhi a sechiwa, a hlangana ni vavanuna lava hlomeke ni makhamba.—Yoh. 15:13.

A hi tsake ngopfu loko hi vona Igor a vuya endzhaku ka masikunyana a hlayisekile naswona a ri karhi a chayela movha lowu a wu ri ni swakudya leswi eneleke leswi a hi ta swi tirhisa eka tinh’weti ta xixika leti a ti ta landzela. Hi minkarhi yoleyo yo tika, hi swi vonile leswaku Vakreste va ntiyiso va kombisana rirhandzu minkarhi hinkwayo.—1 Kor. 13:8.