SWA tsakisa ku vona ndlela leyi ha yona Yehovha a hatlisisaka ku ndlandlamuxiwa ka vugandzeri bya ntiyiso emisaveni hinkwayo! (Esa. 60:22) Hikwalaho, ku hambeta ku va ni xilaveko lexikulu xa Tiholo ta Mfumo. Emisaveni hinkwayo, ku fanele ku akiwa Tiholo to tlula 13 000 kumbe ti pfuxetiwa.

Leswaku ku hatlisisiwa ntirho hi ndlela leyi nga durhiki, Huvo leyi Fumaka yi endle ku cinca eka tindzawulo ta hina to hambanahambana to aka. Ndzawulo Yo Pulana Ni Ku Aka eMisaveni Hinkwayo, (Worldwide Design/Construction Department [WDC]), leyi nga entsindza wa misava hinkwayo eBrooklyn, le New York, yi le ku tirheni hi matimba leswaku yi hatlisisa ntirho wo aka swin’we ni matsima yo pfuxeta emisaveni hinkwayo. Tindzawulo  to Pulana ni ku Aka eka Matikonkulu, (Regional Design/Construction Departments [RDC]) leti nga eAustralasia, Central Europe, Afrika Dzonga ni le United States ti langutela matsima ya le migangeni ya ka vona, hi xikongomelo xo aka Tiholo ta Mfumo hi ndlela yo hatlisa ni leyi nga durhiki. Nakambe RDC yi letela marhavi ya le migangeni ya ka vona leswaku ma khathalela miako ya nhlengeletano leyi nsimu ya kona yi languteriwaka hi rhavi ra vona. Eka rhavi rin’wana ni rin’wana, ku ni Ndzawulo yo Pulana ni ku Aka ya le Tikweni (Local Design/Construction Department [LDC]) leyi langutelaka ku akiwa ni ku khathaleriwa ka Tiholo ta Mfumo swin’we ni Tiholo ta Tinhlengeletano.

Hi January 2015, vakulu hinkwavo va le United States a va ri eka nhlangano wo tsakisa lowu a va wu hlalela eka Internet, lowu hlamuseleke lunghiselelo lerintshwa ro hlela, ku aka ni ku khathalela Tiholo ta Mfumo. Leswi hi leswi va swi dyondzeke.

• Ku Aka: Tipulani leti va pfunaka ku aka hi ndlela yo olova swin’we ni leswi nga ta tirhisiwa swi ta fambisana ni swiyimo swa ndhawu ya kwalaho naswona swi ta va swi sekeriwe eka swiletelo leswi humaka eka Komiti ya Vukandziyisi ya Huvo leyi Fumaka. Swi ta olova ku khathalela miako naswona yi ta va yi tiyile, kambe yi ta va yi sasekile ni ku tlhela yi nga durhi.

• Ku Yi Khathalela: Ku ta leteriwa vatirhi va ku tirhandzela eka vandlha rin’wana ni rin’wana leswaku va khathalela ni ku endla leswaku tindhawu ta hina ta vugandzeri ti tshama nkarhi wo leha.

I ntiyiso leswaku ntirho wo aka ni wo khathalela i wukulu. Kambe matshalatshala ya vanhu va Xikwembu ma ta hoxa xandla swinene leswaku ku hatlisisiwa ntirho hi ndlela leyi nga ta endla leswaku ku tirhisiwa mali leyi nyikeriweke hi vutlhari.