Kan’we hi lembe, Timbhoni ta Yehovha swin’we ni vanhu va timiliyoni lava ti va rhambaka emisaveni hinkwayo ta hlengeletana leswaku va tsundzuka rifu ra Yesu, tanihi laha a leriseke hakona. (Luka 22:19) Xiendlakalo lexi xi hi pfuna ku twisisa nkoka wa leswi Yesu a swi endleke loko a nyikela hi vutomi byakwe hikwalaho ka vanhu. Xi tlhela xi kombisa ndlela leyi xitlhavelo lexi xi vulaka swona eka hina sweswi swin’we ni le nkarhini lowu taka.—Yohane 3:16.

 U nga vuyeriwa njhani eka xitlhavelo xa rifu ra Yesu swi nga ri na mhaka ku u swi kotile ku va kona eXitsundzuxweni lembe leri kumbe u tsandzekile? Yesu u dyondzise leswaku hi fanele hi endla swilo swimbirhi swa nkoka:

1.  1. Dyondza hi Xikwembu na Yesu. Loko Yesu a khongela eka Tata wakwe wa le matilweni u te: “Va ta kuma vutomi lebyi nga heriki loko va ya emahlweni va kuma vutivi hi wena Xikwembu xi ri xin’we xa ntiyiso na Yesu Kreste loyi u n’wi rhumeke.”—Yohane 17:3.

2.  2. Hanya hi leswi u swi dyondzaka. Yesu u kandziyise leswaku hi fanele hi hanya hi ku fambisana ni tidyondzo takwe. Hi xikombiso, loko a gimeta dyondzo yakwe ya le ntshaveni u bumabumele un’wana ni un’wana loyi a ‘twaka marito ya yena a tlhela a endla leswi a swi vulaka.’ (Luka 6:46-48) Hilaha ku fanaka, eka xiendlakalo xin’wana u te: “Loko mi tiva swilo leswi, mi ta tsaka loko mi swi endla.”—Yohane 13:17.

 Xana u nga tsakela ku dyondza swo tala hi Xikwembu na Yesu? Xana u lava switsundzuxo leswi nga ku pfunaka leswaku u tirhisa leswi u swi dyondzaka? Hi leswi swin’wana laha hansi leswi nga ku pfunaka.

 Dyondzo ya hina ya Bibele ya mahala yi pfune vanhu vo tala leswaku va kambisisa Bibele ni ku tlhela va hanya hi leswi yi swi dyondzisaka.

•   Nghena eka tluka ra Dyondzo Ya Bibele Leyi Nga Ni Mupfuni leswaku u dyondza swo tala mayelana ni nongonoko lowu.

•   Hlalela vhidiyo leyi nge Ha Ku Amukela Eka Dyondzo Ya Wena Ya Bibele ku vona leswaku Timbhoni ta Yehovha ti yi fambisa njhani dyondzo ya Bibele.

 Kambirhi hi vhiki, Timbhoni ta Yehovha ti hlangana swin’we endhawini leyi ti gandzelaka eka yona leyi vuriwaka Holo ya Mfumo. Eka tinhlengeletano leti, hi bula swinene hi Bibele ni ndlela yo tirhisa leswi yi hi dyondzisaka swona evuton’wini bya hina.

 Eka tinhlengeletano leti, ku ya mani na mani hambi u nga ri Mbhoni. U nga ha va kona hi xiviri kumbe hi ku tirhisa endlelo ra thekinoloji, swi ta ya hi xiyimo xa ndhawu leyi u nga eka yona.

•   Leswaku u kuma nkatsakanyo wa leswi u nga swi langutelaka eka tinhlengeletano leti, hlalela vhidiyo leyi nge Ku Endliwa Yini eHolweni Ya Mfumo?

•   Kuma ndhawu leyi hi hlanganaka eka yona leyi nga ekusuhi na wena hi ku nghena eka tluka leri nge, Tinhlengeletano Ta Vandlha Ta Timbhoni Ta Yehovha.

 Tinhlokomhaka to tala ni tivhidiyo leti kumekaka eka website leyi, ti nga ku pfuna u dyondza swo tala hi tidyondzo ta Yesu ni nkoka wa xitlhavelo xa rifu rakwe.

 Hi xikombiso, dyondza ku swi kotekisa ku yini leswaku hi rifu ra munhu un’we ku vuyeriwa timiliyoni ta vanhu hi ku hlaya nhlokomhaka leyi nge “Yesu Wa Ponisa—Njhani?” ni leyi nge “Ha Yini Yesu A Xanisekile A Tlhela A Fa?” kumbe u hlalela vhidiyo leyi nge Hikwalaho Ka Yini Yesu A File?