TSHAMANI MI RINDZILE!

Nyimpi Leyi Nga Kona eUkraine Yi Endla Leswaku Ku Kayivela Ka Swakudya Ku Ya Ku Andza eMisaveni Hinkwayo

TLANGA

Hi May 19, 2022, 75 wa vachaviseki va byele Xiyenge xa Vuhlayiseki xa Nhlangano wa Matiko leswaku “ku kayivela ka swakudya loku nyanyisiweke hi ntungu wa COVID-19 ni ku cinca ka maxelo ni nyimpi leyi nga kona le Ukraine swi endla leswaku matiko yo tala ma sika hi ndlala.” Endzhakunyana ka loko ku vuriwe sweswo, Mutivi Un’wana Wa Ikhonomi u vule leswaku “emisaveni leyi, leyi nga ni swiphiqo ku ta ya ku va ni vanhu vo tala lava nga ta sika hi ndlala hikwalaho ka nyimpi leyi nga kona.” Bibele yi vule khale leswaku a ku ta va ni ku kayivela ka swakudya emikarhini ya hina naswona yi tlhela yi hi byela leswi nga hi pfunaka ku langutana ni xiyimo lexi.

Bibele yi vule leswaku ku ta va ni ku kayivela ka swakudya

Yesu u te: “Matiko ma ta hlaselana ni mifumo yi ta hlaselana, ku ta va ni ku kayivela ka swakudya.”—Matewu 24:7.
Buku ya le Bibeleni ya Nhlavutelo yi hlamusela leswi vagadi va mune va tihanci va yimelaka swona. Un’wana wa vagadi volavo va tihanci u yimela nyimpi. U landzeriwa hi mugadi wa hanci loyi a yimelaka ndlala, ku nga nkarhi lowu swakudya a swi ta kayivela swinene swi tlhela swi durha. “Ndzi vona hanci ya ntima naswona loyi a tshameke ehehla ka yona a a khome xikalo. Hiloko ndzi twa rito . . . ri ku: ‘Litara ya koroni yi ta xaviwa hi denari ni tilitara tinharhu ta maxalana ti ta xaviwa hi denari.’”—Nhlavutelo 6:5, 6, Bibele Ya Matsalwa Yo Kwetsima Ya Misava Leyintshwa.

Vuprofeta lebyi bya le Bibeleni mayelana ni ku kayivela ka swakudya bya hetiseka namuntlha emikarhini leyi Bibele yi yi vulaka ‘masiku yo hetelela.’ (2 Timotiya 3:1) Leswaku u dyondza swo tala mayelana ni ‘masiku yo hetelela’ ni vagadi va mune va tihanci va le bukwini ya Nhlavutelo, hlalela vhidiyo leyi nge, Misava Yi Cincile Ku Sukela Hi 1914 u tlhela u hlaya nhlokomhaka leyi nge: “I Vamani Vagadi Va Mune Va Tihanci?”

Ndlela leyi Bibele yi nga hi pfunaka hayona

Bibele yi hi nyika switsundzuxo leswi nga hi pfunaka hi kota ku langutana ni swiphiqo, leswi katsaka ku durha ka swakudya ni ku kayivela ka swona. Vona swin’wana swa switsundzuxo sweswo eka nhlokomhaka leyi nge, “Ndlela Yo Hanya Hi Swimalana.”
Bibele yi tlhela yi hi nyika ntshembo wa leswaku swilo hinkwaswo swi ta lungha. Yi hi tshembisa hi nkarhi lowu ku nga “ta va ni ndzalo ya mavele emisaveni” naswona vanhu hinkwavo va ta va ni swakudya swo tala. (Pisalema 72:16) Leswaku u dyondza swo tala hi switshembiso swa Bibele hi vumundzuku nileswaku hikwalahokayini u fanele u yi tshemba, hlaya nhlokomhaka leyi nge, “A Real Hope for a Better Tomorrow.”