Yohane 2:1-25
2 Hiloko ku va ni mucato hi siku ra vunharhu emutini wa Kana lowu nga eGaleliya naswona mana wa Yesu a a ri kwalaho.
2 Yesu ni vadyondzisiwa vakwe na vona a va rhambiwile enkhubyeni wolowo.
3 Kuteloko vhinyo yi hela, mana wa Yesu a ku eka yena: “Va heleriwe hi vhinyo.”
4 Kambe Yesu a ku: “Sweswo swi hi khumba njhani mina na wena?? Nkarhi wa mina a wu si fika.”
5 Mana wakwe a byela vatirhi a ku: “Endlani xin’wana ni xin’wana lexi a mi byelaka xona.”
6 A ku ri ni makhuwana ya tsevu kwalaho, lawa a ma laveka hi ku landza nawu wa Vayuda wa ku tibasisa,+ ha rin’we a ri kota ku rhwala mimpimo* yimbirhi kumbe yinharhu ya mati.
7 Yesu a ku eka vona: “Tatani makhuwana hi mati.” Kutani va ma tata ma fika hi le milon’wini.
8 Kutani a ku: “Sweswi kanani man’wana mi ya nyika mufambisi wa nkhuvo.” Hiloko va ma yisa.
9 Kutani mufambisi wa nkhuvo a nwa mati lama hundzuriweke vhinyo kambe a a nga ku tivi lomu yi humaka kona, (hambileswi lava keleleke mati a va swi tiva), hiloko mufambisi wa nkhuvo a vitana muteki
10 ivi a ku: “Vanhu va rhanga hi ku humesa vhinyo leyinene, kutani loko vanhu va pyopyiwile, va humesa leyo phyama. Ya wena ya ha ri yinene ku ta fikela sweswi.”
11 Yesu u endle singita ra yena ro sungula emutini wa Kana lowu nga eGaleliya, leswi swi endle leswaku vanhu va xiya matimba yakwe lama vangamaka,+ kutani vadyondzisiwa vakwe va va ni ripfumelo eka yena.
12 Endzhaku ka sweswo Yesu ni mana wakwe, vamakwavo+ ni vadyondzisiwa vakwe va ya eKapernawume,+ kambe a va tshamanga masiku yo tala.
13 Siku ra Paseka+ ya Vayuda a ri ri kusuhi, hiloko Yesu a ya eYerusalema.
14 Loko a fika etempeleni a kuma lava xavisaka tihomu, tinyimpfu, matuva+ ni vacincisi va mali va tshame kwalaho.
15 Hiloko a luka ximoko hi tintambu, a hlongola hinkwavo lava a va ri ni tinyimpfu ni tihomu etempeleni, a tlhela a hangalasa mali ya nsimbhi ya vacincisi va mali, a wisetela ni matafula ya vona.+
16 A byela lava xavisaka matuva a ku: “Susani swilo leswi laha! Tshikani ku endla yindlu ya Tatana yi va yindlu ya mabindzu!”+
17 Kutani vadyondzisiwa vakwe va tsundzuka leswaku ku tsariwe leswi: “Ku hisekela yindlu ya wena ku ta ndzi dya.”+
18 Hiloko Vayuda va vutisa Yesu va ku: “Xana u ta hi endlela singita rihi,+ ku kombisa leswaku u ni mfanelo yo endla swilo leswi?”
19 Yesu a va hlamula a ku: “Wisani tempele leyi, kutani ndzi ta yi pfuxa hi masiku manharhu.”+
20 Vayuda va ku: “Swi teke malembe ya 46 ku va tempele leyi yi akiwa, xana u nga yi pfuxa hi masiku manharhu?”
21 Kambe a a vula miri wakwe loko a vulavula hi tempele.+
22 Loko a pfuxiwa eku feni, vadyondzisiwa vakwe va tsundzuke leswaku a a hamba a vula marito lawa,+ kutani va tshemba matsalwa ni leswi Yesu a swi vuleke.
23 Hambiswiritano, loko a ri eYerusalema enkhubyeni wa Paseka, vanhu vo tala va ve ni ripfumelo evitweni rakwe, hi ku vona masingita lawa a a ma endla.
24 Kambe Yesu a a nga va tshembi hi ku helela hikuva a a va tiva kahle vanhu
25 a a nga lavi munhu wo n’wi hlamusela leswaku vanhu va njhani hikuva a a va tiva kahle.+
Tinhlamuselo ta le hansi
^ Swi nga endleka mimpimo leyi a yi ringana ni bati leyi a yi ri 22 wa tilitara. Vona Xiengetelo B14.
