Mitirho 11:1-30
11 Vaapostola ni vapfumeri* lava a va ri eYudiya va twa leswaku vanhu va matiko na vona va amukele rito ra Xikwembu.
2 Xisweswo loko Petro a ya eYerusalema, lava seketelaka mhaka ya ku yimba+ va sungula ku n’wi solasola*
3 va ku: “U nghene endlwini ya vavanuna lava nga yimbangiki u fika u dya na vona.”
4 Hiloko Petro a sungula ku va hlamusela vuxokoxoko bya kona a ku:
5 “A ndzi ri emutini wa Yopa ndzi ri karhi ndzi khongela, kutani loko ndza ha biwe hi riphume ndzi vona xivono, nchumu* lowu xikaka lowu fanaka ni lapi lerikulu wu xikisiwa hi le tilweni hi tikhona ta wona ta mune, wu fika eka mina.+
6 Loko ndzi wu langutisisa, ndzi vone mixaka hinkwayo ya swiharhi leswi nga ni milenge ya mune, swivandzana, swiharhi leswi kokovaka ni swinyenyana.
7 Ndzi tlhele ndzi twa rito ri ku: ‘Petro, suka u yima, u tlhava u dya!’
8 Kambe ndzi te: ‘A ndzi nge swi koti Hosi, hikuva a ndzi si tshama ndzi dya nchumu lowu nyameke kumbe lowu nga basangiki.’
9 Ra vumbirhi, rito leri humaka etilweni ri ku: ‘Tshika ku vula leswaku swilo leswi Xikwembu xi swi basiseke swi nyamile.’
10 Leswi swi humelele ra vunharhu, hiloko hinkwaswo leswi ndzi swi voneke swi tlakuseriwa etilweni.
11 Hi nkarhi wolowo a ku yime vavanuna vanharhu endlwini leyi a hi tshama eka yona, lava a va rhumiwe eka mina va huma eKhezariya.+
12 Hiloko moya wu ndzi byela leswaku ndzi famba na vona, ndzi nga kanakani. Kambe vamakwerhu lava va tsevu na vona va fambe na mina, hiloko hi ya nghena endlwini ya wanuna luya.
13 “U hi byele hi ta ndlela leyi a voneke ntsumi yi yime endlwini yakwe yi ku: ‘Rhuma vanhu va ya eYopa va ya vitana Simoni loyi a tiviwaka hi vito ra Petro,+
14 kutani u ta ku byela swilo leswi wena ni ndyangu wa wena hinkwawo mi nga swi endlaka leswaku mi ta ponisiwa.’
15 Kambe loko ndzi sungula ku vulavula, moya lowo kwetsima wu xikela ehenhla ka vona hilaha wu endleke hakona ni le ka hina eku sunguleni.+
16 Ndzi nambe ndzi tsundzuka marito ya Hosi, hilaha a yi hamba yi vula hakona yi ku: ‘Yohane a a khuvula hi mati,+ kambe n’wina mi ta khuvuriwa hi moya lowo kwetsima.’+
17 Hikokwalaho, loko Xikwembu xi va nyike nyiko leyi fanaka ya mahala hilaha na hina xi hi nyikeke hakona, hina lava pfumeleke eka Hosi Yesu Kreste, xana mina a ndzo va mani lerova ndzi nga kota ku sivela Xikwembu?”+
18 Loko va twa mhaka yoleyo, va yi amukerile, kutani va dzunisa Xikwembu va ku: “Leswi swi vula leswaku Xikwembu xi lava ni vanhu va matiko va hundzuka leswaku va ta kuma vutomi.”+
19 Hi nkarhi wolowo lava hangalakeke+ hikwalaho ka ku xanisiwa loku veke kona endzhaku ka rifu ra Stefano va fambe va ya fika ni le Fenikiya, eKipra ni le Antiyoka, kambe a va chumayela Vayuda+ ntsena.
20 Hambiswiritano, van’wana va vavanuna lava a va ri na vona, lava a va huma eKipra ni le Kirena, va ye eAntiyoka va fika va vulavula ni vanhu lava vulavulaka Xigriki, va chumayela mahungu lamanene ya Hosi Yesu.
21 Ku tlula kwalaho, Yehovha* a a va seketela naswona vo tala va ve vapfumeri va landzela Hosi.+
22 Mhaka ya vona yi fike etindleveni ta vandlha leri a ri ri eYerusalema, hiloko ri rhuma Barnaba+ ku ya fika ni le Antiyoka.
23 Loko a fika a vona musa lowukulu lowu Xikwembu xi wu kombeke vadyondzisiwa, a tsaka kutani a sungula ku va khutaza leswaku va ya emahlweni va tirhela Hosi hi mbilu hinkwayo;+
24 hikuva a a ri wanuna lonene naswona a a tele hi moya lowo kwetsima ni ripfumelo. Hikwalaho ka sweswo, ku ve ni ntshungu lowu veke valandzeri va Hosi.+
25 Hiloko a ya eTarso a ya lavisisa Sawulo.+
26 Loko a n’wi kumile, a ya na yena eAntiyoka. A va hamba va hlengeletana ni vandlha ra kwalaho lembe hinkwaro, va dyondzisa ntshungu naswona swi sungule eAntiyoka leswaku vadyondzisiwa va vitaniwa Vakreste hi ku kongomisiwa hi Xikwembu.+
27 Emasikwini wolawo vaprofeta+ a va suka eYerusalema va ya eAntiyoka.
28 Un’wana wa vona la vuriwaka Agabo,+ a tlakuka a profeta hi moya lowo kwetsima leswaku ku ta va ni ndlala leyikulu emisaveni hinkwayo+ naswona hakunene ndlala leyi yi ve kona hi nkarhi wa ku fuma ka Klawudiyo.
29 Kutani vadyondzisiwa va tiboha ku rhumela mphalalo+ eka vamakwavo lava tshamaka eYudiya, ha un’we a a ta humesa leswi a nga swi kotaka;+
30 va endle tano, va wu rhumela eka vakulu hi voko ra Barnaba na Sawulo.+
Tinhlamuselo ta le hansi
^ Hi Xigriki, “vamakwavo.”
^ Kumbe “holovisa.”
^ Hi Xigriki, “xibya xo karhi.”
^ Vona Xiengetelo A5.
