Ezekiyele 19:1-14
-
Risimu ra xirilo leri vulavulaka hi tindhuna ta Israyele (1-14)
19 “U fanele u yimbelela risimu ra xirilo leri vulavulaka hi tindhuna ta Israyele,
2 u ku,‘Mana wa wena a a ri yini? Nghala ya xisati exikarhi ka tinghala.
U etlele exikarhi ka swinghalana swa matimba a kurisa swinghalana swakwe.
3 U kurise xin’wana xa swinghalana swakwe kutani xi va nghala ya matimba.+
Xi dyondze ku hlota,Xi tlhela xi dya ni vanhu.
4 Matiko ma twe hi ta xona kutani ma xi phasa emugodini wa wona,Ma nghenisa muhalo* enhompfini ya xona ma xi tisa etikweni ra Egipta.+
5 Mana wa xona u rindzile kutani a hetelela a swi vona leswaku a xi nge he vuyi.
Hiloko a teka xinghalana xin’wana xakwe a xi kurisa kutani xi va nghala ya matimba.
6 Xi tlhela xi fambafamba exikarhi ka tinghala kutani xi va nghala leyi nga ni matimba.
Xi dyondze ku hlota xi tlhela xi dya ni vanhu.+
7 Xi nyandlamele exikarhi ka swihondzo swa vona kutani xi onhetela miti ya vona,Lerova etikweni leri nga rhumbi a ko twala ku vomba ka xona.+
8 Vanhu va le matikweni ya le kusuhi va tile va ta lwa na xona kutani va xi hoxa hi nete ya vona,Hiloko xi phaseka emugodini wa vona.
9 Va xi nghenise muhalo* va xi hoxa endzeni ka sefo kutani va xi yisa eka hosi ya le Babilona.
Va fika va xi pfalela kwalaho leswaku rito ra xona ri nga ha pfuki ri twiwile etintshaveni ta Israyele.
10 Mana wa wena a a fana ni murhi wa madiriva+ engatini ya wena,* lowu byariweke ekusuhi ni mati.
Wu tswale mihandzu naswona wu ni marhavi yo tala hikwalaho ka leswi wu kumaka mati yo tala.
11 Wu va ni marhavi* lama tiyeke lama fanelaka ku endla tinhonga ta tihosi.
Wu kurile wu leha ku tlula mirhi leyin’wana,A wu vonaka hikwalaho ka ku leha ka wona ni hikwalaho ka matluka ya wona yo tala.
12 Kambe wu tsuvuriwile+ hi tihanyi wu lahleriwa emisaveni,Moya wa le vuxeni wu omise mihandzu ya wona.
Marhavi ya wona lama tiyeke ma tshoviwile kutani ma oma+ ivi ma hisiwa hi ndzilo.+
13 Sweswi wu byariwe emananga,Etikweni leri nga riki na mati, leri omeke.+
14 Ndzilo wu suke emarhavini* ya wona wu ya hisa swirhabyana ni mihandzu ya wona,A ku nga ha ri na rhavi leri tiyeke leri saleke, a ku nga ha ri na nhonga yo fuma ha yona.+
“‘Leri i risimu ra xirilo naswona ri ta va risimu ra xirilo.’”
Tinhlamuselo ta le hansi
^ Ku nga ntambhu leyi boheleriwaka enhompfini.
^ Ku nga ntambhu leyi boheleriwaka enhompfini.
^ Kumbexana “ku fana ni murhi wa madiriva ensin’wini ya wena ya madiriva.”
^ Kumbe “tinhonga.”
^ Kumbe “etinhongeni.”
