Eklesiasta 9:1-18
9 Kutani ndzi anakanyisise hi timhaka leti naswona ndzi gimete hi leswaku lavo tlhariha ni lavanene swin’we ni mitirho ya vona va le mavokweni ya Xikwembu xa ntiyiso.+ Vanhu a va swi tivi leswaku loko va nga si va kona a ku ri ni rirhandzu ni rivengo.
2 Lavo lulama ni lavo homboloka,+ lavanene ni lava baseke ni lava nga basangiki, lava gandzelaka ni lava nga gandzeriki, va humeleriwa hi nchumu lowu fanaka.+ Munhu lonene wa fana ni mudyohi; loyi a hlambanyaka wa fana ni loyi a nga laviki ku hlambanya.
3 Nchumu lowu dyisaka mbitsi lowu endlekaka emisaveni hi lowu: Leswi vanhu hinkwavo va humeleriwaka hi nchumu lowu fanaka,+ vanhu va endla swilo swo biha swinene naswona va endla swilo swa vuphukuphuku kutani va fa!
4 Lava hanyaka va ni ntshembo, hikuva mbyana leyi hanyaka ya antswa swinene ku ri ni nghala leyi feke.+
5 Hikuva lava hanyaka va swi tiva leswaku va ta fa,+ kambe lava feke a va tivi nchumu+ naswona a va ha ri na hakelo, hikuva a va ha tsundzukiwi.+
6 Rirhandzu ra vona, rivengo ra vona ni mavondzo ya vona swi herile naswona a ka ha ri na lexi va nga xi endlaka emisaveni.+
7 Famba u ya dya swakudya swa wena u tsakile u tlhela u tiphina hi vhinyo ya wena,+ hikuva Xikwembu xa ntiyiso se xi tsakisiwe hi mitirho ya wena.+
8 Swiambalo swa wena a swi tshame swi ri swo basa naswona u fanele u tola mafurha enhlokweni mikarhi hinkwayo.+
9 Tiphine hi vutomi ni nsati wa wena loyi u n’wi rhandzaka+ emasikwini hinkwawo ya vutomi bya wena bya hava, lawa xi ku nyikeke wona emisaveni, masiku ya wena hinkwawo ya hava, hikuva yoleyo hi yona hakelo ya wena evuton’wini ni le ka ntirho wa wena wa matimba lowu u wu endlaka laha misaveni.+
10 Hinkwaswo leswi u kotaka ku swi endla, swi endle hi matimba ya wena hinkwawo hikuva eSirheni,*+ laha u yaka kona a ka ha ri na ntirho kumbe makungu kumbe vutivi kumbe vutlhari.
11 Ku ni leswi ndzi nga tlhela ndzi swi vona emisaveni, leswaku lava nga ni rivilo a hi mikarhi hinkwayo va hlulaka emphikizanweni, hambi ku ri lava nga ni matimba a hi mikarhi hinkwayo va hlulaka enyimpini+ ni lavo tlhariha a hi mikarhi hinkwayo va nga ni swakudya ni lavo dyondzeka a hi mikarhi hinkwayo va nga ni rifuwo+ hambi ku ri lava nga ni vutivi a hi mikarhi hinkwayo swi va fambelaka kahle,+ hikuva nkarhi ni swiendlakalo leswi nga languteriwangiki swa va wela hinkwavo.
12 Phela munhu a nga wu tivi nkarhi wa yena.+ Ku fana ni tihlampfi leti phasiwaka hi nete ya nsele ni swinyenyana leswi phasiwaka hi ntlhamu, hilaha ku fanaka vanhu va phasiwa hi khombo leri va welaka va nga swi langutelanga.
13 Ndzi tlhele ndzi xiya leswi mayelana ni vutlhari emisaveni naswona swi ndzi tsakisile:
14 A ku ri ni muti lowutsongo lowu vavanuna va wona a va nga talanga; kutani ku fika hosi leyi nga ni matimba yi fika yi wu rhendzela yi aka makhumbi leswaku yi ta wu hlasela.
15 Eka wona a ku ri ni wanuna wa xisiwana loyi a tlharihile swinene kutani a ponisa muti hi vutlhari byakwe. Kambe a ku na munhu loyi a tsundzukeke wanuna yoloye wa xisiwana.+
16 Kutani ndzi tibyela ndzi ku: ‘Vutlhari bya antswa swinene ku tlula matimba;+ kambe vutlhari bya xisiwana byi languteriwa ehansi naswona marito ya xona a ma tekeriwi enhlokweni.’+
17 Swa antswa ku yingisa marito yo rhula ya lavo tlhariha, ku ri ni ku yingisa pongo ra loyi a fumaka swiphukuphuku.
18 Vutlhari bya antswa ku tlula matlhari ya nyimpi kambe mudyohi un’we ntsena a nga onha swo tala.+
Tinhlamuselo ta le hansi
^ Kumbe “eSheol.” Vona Tinhlamuselo.
