Tihosi Ta Vumbirhi 9:1-37
9 Muprofeta Elixa a vitana un’wana wa vana va vaprofeta a ku eka yena: “Tikhame hi swiambalo swa wena, u hatlisa u teka gula leri ra mafurha u ya eRhamoti-giliyadi.+
2 Loko u fika kwalaho, lava Yehu+ n’wana wa Yehoxafati ntukulu wa Nimxi; nghena u n’wi teka exikarhi ka vamakwavo u ya na yena ekamareni ra le ndzenindzeni.
3 Kutani u teka gula u n’wi chela mafurha enhlokweni yakwe u ku, ‘Yehovha u ri: “Ndzi ku chela mafurha leswaku u va hosi ya Israyele.”’+ Endzhaku ka sweswo u hatla u pfula nyangwa u baleka.”
4 Hiloko nandza wa muprofeta a khoma ndlela a ya eRhamoti-giliyadi.
5 Loko a fika, tindhuna ta nyimpi a ti tshame kwalaho. A ku: “Ndzi ku khomele rito, hosi yanga.” Yehu a vutisa a ku: “I ra mani exikarhi ka hina?” Yena a ku: “I ra wena, hosi yanga.”
6 Hiloko Yehu a suka a yima, va nghena endlwini; kutani nandza a n’wi chela mafurha enhlokweni, a ku eka yena, “Yehovha Xikwembu xa Israyele u ri: ‘Ndza ku tota leswaku u va hosi ya vanhu va Yehovha, ku nga Israyele.+
7 U fanele u dlaya ndyangu wa Akabu hosi ya wena naswona ndzi ta rihisela ngati ya malandza ya mina ku nga vaprofeta ni ngati ya malandza hinkwawo ya Yehovha lama dlayiweke hi Yezabele.+
8 Ndyangu hinkwawo wa Akabu wu ta lovisiwa; naswona ndzi ta herisa vavanuna* hinkwavo emutini wa Akabu, ku katsa ni lava nga pfuniki nchumu ni lava tsaneke eIsrayele.+
9 Ndzi ta endla ndyangu wa Akabu ku fana ni ndyangu wa Yerobuwamu+ n’wana wa Nebati ni ndyangu wa Baxa+ n’wana wa Ahiya.
10 Loko ku ri Yezabele u ta dyiwa hi timbyana ensin’wini ya le Yizriyele,+ a nge lahliwi.’” Loko nandza a heta ku vula sweswo, a pfula nyangwa a baleka.+
11 Loko Yehu a tlhelela eka malandza ya hosi yakwe, ma n’wi vutise ma ku: “Swi lo yini? Xana a xi lava yini xipengi lexiya?” A va hlamula a ku: “Na n’wina ma swi tiva leswaku wa penga, leswi a swi vulavulaka a swi twisiseki.”
12 Kambe va ku: “Wa hemba! Hi kombela u hi byela.” Hiloko a ku: “U ndzi byele leswi, a tlhela a ku, ‘Yehovha u ri: “Ndza ku tota leswaku u va hosi ya Israyele.”’”+
13 Loko va twa sweswo, hiloko va hatla va teka swiambalo swa vona va swi andlala ivi va n’wi veka ehenhla ka swona eswitepisini+ kutani va ba nanga va ku: “Yehu i hosi!”+
14 Hiloko Yehu+ n’wana wa Yehoxafati ntukulu wa Nimxi a sungula ku bohela Yehorama xikungu.
Yehorama a a ri eRhamoti-giliyadi+ ni tiko hinkwaro ra Israyele va ri eku lweni na Hosi Hazayele+ wa Siriya.
15 Endzhaku ka sweswo, Hosi Yehorama a tlhelela eYizriyele+ leswaku a ya tshunguriwa timbanga leti a vangeriweke tona hi Vasiriya loko a lwa na Hosi Hazayele wa Siriya.+
Kutani Yehu a ku: “Loko swi ri swinene eka n’wina, mi nga pfumeleli munhu leswaku a baleka emutini a ya vika mhaka leyi eYizriyele.”
16 Hiloko Yehu a khandziya kalichi yakwe a ya eYizriyele, hikuva Yehorama a a etlele kona a vavisekile naswona Hosi Ahaziya wa Yuda a a ri kwalaho ku ta pfuxela Yehorama.
17 Loko murindzi a ha yime ehenhla ka xihondzo eYizriyele, a vona ntshungu wa vavanuna va Yehu va tshinela. Xikan’wekan’we a ku: “Ndzi vona ntshungu wa vavanuna.” Yehorama a ku: “Rhumela mugadi wa hanci a va hlanganisa, u n’wi byela leswaku a va vutisa a ku, ‘Xana mi ta hi ku rhula?’”
18 Kutani mugadi wa hanci a ya n’wi hlanganisa a fika a ku: “Hosi yi ri, ‘Xana u ta hi ku rhula?’” Kambe Yehu a ku: “Swa ‘ku rhula’ a swi lavi wena. Ndzi landzele!”
Murindzi a vika, a ku: “Murhumiwa u fikile eka vona kambe a nga si vuya.”
19 Hiloko a rhuma mugadi wa hanci wa vumbirhi loyi loko a fika eka vona, a nga te: “Hosi yi ri, ‘Xana u ta hi ku rhula?’” Kambe Yehu a ku: “Swa ‘ku rhula’ a swi lavi wena. Ndzi landzele!”
20 Murindzi a tlhela a vika a ku: “U fikile eka vona, kambe a nga si vuya naswona matsutsumelo ya kona ma fana ni matsutsumelo ya Yehu ntukulu wa Nimxi, hikuva u chayela onge wa penga.”
21 Yehorama a ku: “Panani kalichi ya mina!” Kutani va pana kalichi yakwe ya nyimpi, Hosi Yehorama wa Israyele na Hosi Ahaziya+ wa Yuda va huma, un’wana ni un’wana a khandziye kalichi yakwe ya nyimpi va hlanganisa Yehu. Va hlangana na yena ensin’wini ya Naboti+ wa Muyizriyele.
22 Loko Yehorama a vona Yehu, a n’wi vutisa a ku: “Yehu, xana u ta hi ku rhula?” Kambe Yehu a ku: “Ku nga va ni ku rhula njhani ku ri ni vunghwavava bya Yezabele+ mana wa wena ni vuloyi byakwe byo tala?”+
23 Hiloko Yehorama a jikisa kalichi leswaku a baleka, kutani a byela Ahaziya a ku: “Ahaziya, hi kanganyisiwile!”
24 Yehu a humesa vurha* byakwe a copa Yehorama enhlaneni nseve wu ya huma hi le mbilwini, kutani a wa ekalichini yakwe ya nyimpi.
25 Hiloko a byela Bidikara ndhuna yakwe a ku: “N’wi tlakule u n’wi lahlela ensin’wini ya Naboti wa Muyizriyele.+ Tsundzuka leswaku mina na wena a hi ri swin’we hi khandziye kalichi hi landzela Akabu tata wakwe, loko Yehovha a n’wi avanyisa a ku:+
26 ‘“Leswi tolo ndzi voneke ngati ya Naboti+ ni ya vana vakwe,” ku vula Yehovha, “ndzi ta tirihisela+ kona ensin’wini leyi,” ku vula Yehovha.’ Kutani sweswi n’wi tlakule u n’wi lahlela ensin’wini hilaha Yehovha a vuleke hakona.”+
27 Loko Hosi Ahaziya+ wa Yuda a vona leswi humeleleke, a baleka a famba hi ndlela leyi hundzaka hi le ntangeni lowukulu.* (Endzhaku ka sweswo, Yehu a n’wi hlongorisa, a ku: “N’wi dlayeni, na yena!” Hiloko va n’wi tlhava a ri ekalichini a ri endleleni leyi yaka eGuru, eIbileyamu.+ Kambe u ye emahlweni a baleka a ya fika eMegido laha a feleke kona.
28 Hiloko malandza yakwe ma n’wi rhwala hi kalichi ma n’wi yisa eYerusalema, ma n’wi lahla esirheni rakwe ni vakokwa wakwe eMutini wa Davhida.+
29 Ahaziya+ u ve hosi ya Yuda hi lembe ra vu-11 ra ku fuma ka Yehorama n’wana wa Akabu.)
30 Loko Yehu a ta eYizriyele+ Yezabele+ u swi twile leswaku u le ku teni. Hiloko a titota matihlo hi swo tisasekisa swa ntima, a tilunghisa misisi kutani a hlometela ehansi hi fasitere.
31 Loko Yehu a nghena egedeni, Yezabele a ku: “Xana u rivele leswi endlekeke eka Zimri mudlayi wa hosi yakwe?”+
32 Hiloko Yehu a languta ehenhla efasitereni a ku: “I mani a yimaka na mina? I mani?”+ Xikan’wekan’we vatirhi vambirhi kumbe vanharhu va le hubyeni va languta ehansi eka yena.
33 A ku: “N’wi lahleleni ehansi!” Hiloko va n’wi lahlela ehansi, ngati yin’wana yakwe yi phyandlakela ekhumbini ni le tihancini, kutani a n’wi kandziyela.
34 Endzhaku ka sweswo Yehu a nghena emutini a fika a dya ni ku nwa. Kutani a ku: “Ndzi kombela mi ya lahla wansati loyi, loyi a rhukaniweke. Phela, i n’wana wa hosi.”+
35 Kambe loko va ya leswaku va ta n’wi lahla, a va kumanga nchumu handle ka xipalapala* xakwe ni milenge yakwe ni swandla swa mavoko yakwe.+
36 Loko va vuya va n’wi byela, Yehu a ku: “Ku hetiseka rito ra Yehovha+ leri a ri vuleke hi ku tirhisa nandza wakwe Eliya wa le Tixibe a ku, ‘Timbyana ti ta dya nyama ya Yezabele+ ensin’wini ya le Yizriyele.
37 Ntsumbu wa Yezabele wu ta va manyoro ensin’wini ya le Yizriyele, leswaku va nga vuli va ku: “Loyi i Yezabele.”’”
Tinhlamuselo ta le hansi
^ Hi Xiheveru, “un’wana ni un’wana loyi a tsakamiselaka ekhumbini.” I xivulavulelo xa Xiheveru xo nyaja loko ku vulavuriwa hi vavanuna.
^ Kumbe “mpaxu.”
^ Hi Xiheveru, “yindlu ya ntanga.”
^ Ku nga rhambu ra nhloko.
