Vakorinto Wo Sungula 11:1-34
11 Tekelelani mina, tanihi leswi na mina ndzi tekelelaka Kreste.+
2 Vamakwerhu, ndza tsaka hikuva eka swilo hinkwaswo ma ndzi tsundzuka ni leswaku mi endla swilo hinkwaswo hilaha ndzi mi dyondziseke hakona.
3 Kambe ndzi lava mi swi tiva leswaku nhloko ya wanuna un’wana ni un’wana i Kreste;+ kasi nhloko ya wansati i wanuna;+ nhloko ya Kreste i Xikwembu.+
4 Wanuna loyi a khongelaka kumbe a profetaka a tifunengete nhloko u khomisa loyi a nga nhloko yakwe tingana;
5 kambe wansati loyi a khongelaka kumbe ku profeta+ a nga funengelanga nchumu enhlokweni u khomisa loyi a nga nhloko yakwe tingana, hikuva swi fana ni loko a byevule nhloko.
6 Hikuva loko wansati a nga tifunengeti nchumu, u fanele a tsemeta ni misisi; kambe loko wansati a nyuma ku tsemeta misisi kumbe ku yi byevula, u fanele a tifunengeta nhloko.
7 Hikuva wanuna a nga fanelanga a funengeta nhloko yakwe, tanihi leswi a nga xifaniso+ ni ku vangama ka Xikwembu, kambe wansati i ku vangama ka wanuna.
8 Hikuva wanuna a nga humi eka wansati kambe i wansati a humeke eka wanuna.+
9 Naswona ku tlula kwalaho, wanuna a nga tumbuluxeriwanga wansati kambe i wansati a tumbuluxeriweke wanuna.+
10 Hikwalaho ka tintsumi, wansati u fanele ku va ni xikombiso enhlokweni yakwe xa leswaku wa titsongahata eka nuna wakwe.+
11 Handle ka sweswo, exikarhi ka valandzeri va Hosi, wansati a hi nchumu handle ka wanuna ni wanuna a hi nchumu handle ka wansati.
12 Hikuva wansati u huma eka wanuna,+ ni wanuna u kona hikwalaho ka wansati; kambe swilo hinkwaswo swi huma eka Xikwembu.+
13 Avanyisani hi n’wexe: Xana swa fanela leswaku wansati a khongela eka Xikwembu a nga funengelanga nchumu enhlokweni?
14 Xana ntumbuluko a wu mi dyondzisi leswaku loko wanuna a ri ni misisi yo leha swa n’wi tsongahata,
15 kambe loko wansati a ri ni misisi yo leha, xana swa n’wi vangamisa? Hikuva u nyikiwe misisi ematshan’weni ya xifunengeto xa nhloko.
16 Hambiswiritano, loko ku ri ni loyi a nga pfumelelaniki ni mhaka leyi a lava ku landzela ndhavuko wo karhi, hina ku katsa ni mavandlha ya Xikwembu a hi swi amukeli leswi va swi endlaka.
17 Ku hlengeletana ka n’wina a ku mi pfuni kambe ka mi vavisa, hikwalaho a ndzi mi bumabumeli loko ndzi vula swilo leswi.
18 Hikuva xo sungula, ndzi twa leswaku loko mi hlengeletana evandlheni ku ni ku avana exikarhi ka n’wina; naswona ndza swi tshemba hi mpimo wo karhi.
19 Hikuva ku ta va ni lava hambukaka exikarhi ka n’wina,+ leswaku ku ta vonaka lava Xikwembu xi va amukelaka.
20 Loko mi hlengeletana leswaku mi ta dya Xilalelo xa Hosi a mi swi endli hi ndlela leyi faneleke.+
21 Hikuva loko mi xi dya, un’wana ni un’wana u va a rhange hi ku dya xilalelo xakwe, lerova un’wana u va a khome hi ndlala kasi un’wanyana u va a pyopyiwile hikuva u nwe ngopfu.
22 Xana a mi na tona tiyindlu to dyela ni ku nwela eka tona? Kumbe, xana mi ri langutela ehansi vandlha ra Xikwembu ivi mi endla leswaku lava nga riki na nchumu va khomiwa hi tingana? Xana ndzi ta ku yini eka n’wina? Xana ndzi fanele ndzi mi bumabumela? Emhakeni leyi a ndzi mi bumabumeli.
23 Hikuva leswi ndzi mi dyondzisaka swona swi huma eka Hosi. Hosi Yesu hi vusiku lebyi+ a a ta xavisiwa ha byona u teke xinkwa,
24 endzhaku ka loko a khongerile, a xi phema kutani a ku: “Xinkwa lexi xi fanekisela miri+ wa mina lowu nyikeriwaka hikwalaho ka n’wina. Tshamani mi ri karhi mi endla leswi leswaku mi ndzi tsundzuka.”+
25 U endle hilaha ku fanaka ni hi xinwelo,+ endzhaku ka loko va dye xilalelo, a ku: “Xinwelo lexi xi fanekisela ntwanano lowuntshwa+ lowu tiyisekisiwaka hi ngati ya mina.+ Tshamani mi ri karhi mi endla leswi loko mi xi nwa leswaku mi ndzi tsundzuka.”+
26 Hikuva mikarhi hinkwayo loko mi dya xinkwa lexi ni ku nwa exinwelweni lexi, mi huwelela rifu ra Hosi yi kondza yi ta.
27 Hikwalaho un’wana ni un’wana loyi a dyaka xinkwa kumbe a nwaka exinwelweni xa Hosi swi nga fanelanga, u ta va ni nandzu wo dyohela miri ni ngati ya Hosi.
28 Munhu a a rhange a tikambela ku vona loko a faneleka,+ kutani hi kona a nga dyaka xinkwa ni ku nwa exinwelweni.
29 Hikuva loyi a dyaka ni ku nwa kambe a nga swi twisisi leswi miri wu yimelaka swona wa tiavanyisa.
30 Hi yona mhaka leyi vo tala exikarhi ka n’wina va tsaneke ni ku vabya, kasi vo hlayanyana va file.*+
31 Kambe loko a hi tikambisisa a hi nga ta avanyisiwa.
32 Hambiswiritano, loko hi avanyisiwa, hi tshinyiwa hi Yehovha,*+ leswaku hi nga gweviwi ni misava.+
33 Hikwalaho, vamakwerhu, loko mi hlengeletana leswaku mi dya xilalelo, yimelani van’wana.
34 Loko un’wana a khomiwe hi ndlala, a a dye ekaya leswaku loko mi hlengeletana mi nga avanyisiwi.+ Kambe timhaka leti saleke ndzi ta ti lulamisa loko ndzi fika kwalaho.
Tinhlamuselo ta le hansi
^ Swi tikomba ku vulavuriwa hi ku fa hi tlhelo ra moya.
^ Vona Xiengetelo A5.
