Planti Tokples na Wanpela Musik
Em hatwok tru long trensletim wanpela singsing i go long narapela tokples. So em i hatwok moa long trensletim wanpela singsing buk i gat 135 singsing.
Ol Witnes Bilong Jehova i wok strong na trensletim nupela singsing buk insait long 3-pela yia, em Singsing Long Jehova, i go long 116 tokples. Narapela 55 tokples i gat dispela singsing buk we i gat 55 singsing tasol long en. Ol i wokim tu ol edisen bilong singsing buk long planti moa tokples.
Trensletim na Raitim Ol Tok Bilong Singsing
Ol Witnes Bilong Jehova i trensletim pinis ol litresa bilong Baibel long 600 tokples samting, na klostu 400 bilong ol i stap pinis long Intenet. Tasol wok bilong trensletim singsing buk i gat bikpela hatwok moa. Wai? Bikos tiun bilong musik bilong Singsing Long Jehova i no inap senis, maski ol i trensletim ol tok bilong singsing i go long planti tokples.
Pasin bilong raitim ol wed bilong singsing em i no wankain long pasin bilong trensletim ol tok bilong wanpela nius. Kain olsem, taim ol trensleta i laik trensletim ol tok bilong nius Wastaua, ol i save wok strong long trensletim mining bilong tok long Inglis. Tasol musik em i no wankain.
Hau Ol i Wokim
Ol trensleta bilong ol singsing i save bihainim narapela wei long trensletim ol tok bilong singsing na bai ol tok i gat wankain mining, tok i krai gut, na isi long tingim.
Ol tok bilong singsing i mas isi long man i kliagut long mining na save long risen na ol i raitim dispela singsing. Long olgeta tokples, ol tok na musik i mas ron gut wantaim na i no paul, na i olsem ol dispela tok i bilong man i raitim singsing.
Hau ol trensleta i save mekim olsem? Ol i no trensletim ol tok bilong Singsing Long Jehova, nogat, ol i kisim instraksen long raitim nupela tok bilong singsing i gat wankain mining olsem bilong orijinel singsing. Ol trensleta i tingim gut mining bilong ol Skripsa em ol i kisim ol singsing long en, na ol i yusim ol tok em ol manmeri i mekim tokples bilong ol i save mekim long olgeta taim, long dispela rot, em isi long kliagut na tingim ol tok bilong en.
Fes samting em ol i save trensletim stret ol tok bilong singsing i stap long Inglis. Bihain, wanpela Witnes i gat save long raitim ol tok bilong singsing i save stretim ol tok ol i trensletim na bai singsing i krai gut na i gat mining long nupela tokples. Bihain ol trenslesen tim i save sekim gen ol tok bikos ol singsing olgeta i mas kamapim mining bilong ol Skripsa em ol i kisim ol singsing long en.
Ol Witnes Bilong Jehova long olgeta hap i amamas long kisim nupela singsing buk, na ol i wet tu long kisim long ol narapela tokples.