Ol Witnes Bilong Jehova long Briten i kirap pinis long wokim nupela brens ofis bilong ol klostu long Chelmsford, long distrik bilong Essex. Dispela naispela ples long Yunaitet Kingdom i gat kain kain wel animal na ol i stap aninit long lukaut bilong 1981 Lo Bilong Wel Animal na Kantri Sait. Long taim bilong konstraksen, ol Witnes Bilong Jehova i mekim wanem na bai ol inap bihainim dispela Lo na lukautim ol animal?

Wanpela bilong ol dispela animal em hazel rat. Ol Witnes i yusim sampela olpela timba long wokim ol liklik boks we bai stap olsem haus bilong ol dispela rat, na dispela bai pulim ol i go longwe na ol bai lusim ples bilong wok konstraksen. Ol i wokim tu wanpela kain bris we ol dispela rat inap yusim long i go i kam long ples ol i save raun long en, namel long ol lain diwai na ol lain plaua i stap klostu long hap bilong wok konstraksen. Na tu, ol Witnes i tingim gut ol rat, olsem na taim ol i kliaim ples, ol i no save katim olgeta plaua i stap long wanpela grup. Ol i save wet inap long taim bilong kol, em taim we ol rat i save slip tasol insait long haus bilong ol. Long dispela taim, ol Witnes i save katim ol plaua i stap long narapela grup. Dispela pasin i no save distebim ol rat, na tu, dispela i lukautim ples we ol rat inap raun long en, na i gat kain kain samting i stap yet long ol inap kisim olsem kaikai.

Ol Witnes i lukautim tu laip bilong ol snek bilong gras, ol palai, na ol liklik palai i no gat ol bun long ol—ol man i kolim ol dispela palai olsem aipaswem. Ol saveman i kolektim ol dispela snek na palai na wem aninit long ol rup tail we ol i yusim olsem haptaim ples hait bilong ol dispela snek na palai, na muvim ol i go long narapela hap we i seif, longwe long hap bilong wok konstraksen. Long dispela nupela hap, i gat ol seksen bilong ol dispela snek na palai long malolo na slip long taim bilong kol, na i gat spesel banis bilong stopim ol long go long hap bilong konstraksen. Ol Witnes i sekim dispela banis klostu klostu, nogut ol snek o palai o wem i go bek long hap bilong konstraksen na ol inap kisim bagarap.

Ol blak bokis i save raun long nait, olsem na ol Witnes i tingim ol na ol i yusim ol lait we i no strong tumas. Sapos kar i kam, dispela bai mekim na lait i on, tasol sapos i no gat kar i kam, ples i save stap tudak na bai dispela inap helpim ol blak bokis. Planti taim long nait, ol blak bokis i save go painim kaikai namel long ol lain plaua i stap klostu long hap bilong wok konstraksen, olsem na ol Witnes bai larim planti bilong ol dispela lain plaua i stap yet, na ol bai planim ol nupela lain plaua long spes i winim 2 na hap kilomita. I gat nid long rausim sampela diwai long hap bilong konstraksen, olsem na ol wok lain i wokim sampela boks na putim long ol diwai na dispela inap kamap olsem haus bilong ol blak bokis.

Ol Witnes i lukautim laip bilong sampela diwai​—ol man i kolim olsem ol lapun diwai​—na ol i stiaim ol wokman na ol kar bilong wok konstraksen long abrusim ol hap we ol rop bilong ol dispela diwai i stap long en. Ol lapun diwai i stap olsem haus bilong planti kain liklik animal, na ol blak bokis, na ol pisin. Ol Witnes i mekim olgeta dispela samting bikos ol i tingting strong long lukautim yet ol wel animal long Chelmsford.