Long Ogas 2013, ol Witnes Bilong Jehova long Filipins i winim wanpela bikpela mak taim ol i pinisim wok na dispela i bringim namba bilong ol Haus Kingdom long Filipins i go long mak bilong wan tausen. Wankain olsem long planti narapela kantri, ol kongrigesen long Filipins i gat problem long sait bilong mani, na tu, ol yet i no gat konstraksen ekspiriens long wokim ol strongpela Haus Kingdom bilong ol yet. Inap planti yia, sampela i bung long wanwan haus bilong ol bratasista, na sampela i bung long ol liklik haus mambu.

Namba bilong ol Witnes Bilong Jehova long Filipins na ol narapela kantri tu i wok long i go bikpela moa, olsem na i gat bikpela nid long ol Haus Kingdom. Bikos long dispela bikpela nid, long 1999 Gavening Bodi bilong ol Witnes Bilong Jehova i setim wanpela program bilong wokim ol Haus Kingdom long ol kantri we i no gat planti risos. Aninit long dispela program, ol Witnes long ol dispela wan wan kantri i ken givim hamas liklik mani ol inap long givim na ol bai bungim dispela wantaim donesen i kam long ol narapela kantri. Ol lain i wok long konstraksen i kisim trening na ol i wok long ol wan wan grup na i save helpim ol kongrigesen long wokim Haus Kingdom bilong ol. Long Novemba 2001, dispela intenesenel program i kirap long mekim wok long Filipins.

Iluminado, em wanpela Witnes long Marilao, Bulacan, we ol i pinisim wok bilong sanapim namba wan tausen Haus Kingdom. Em i tok: “Mi pilim tru pasin Kristen bilong ol bratasista. Planti lain i volantia long helpim wok​—ol man na ol meri, ol yangpela na ol lapun. Mipela olgeta i wok wantaim aninit long san i hot tru. Maski mipela i pilim taiet long pinis bilong dispela longpela de, mipela i amamas tru taim mipela i lukim ol wok we mipela i bin wok bung wantaim long kamapim.”

Ol narapela lain i kirap nogut long wok bilong ol Witnes. Taim bosman bilong kar i bringim wesan na grevel i kam long ples wok, em i tok: “Yupela wok olsem ol anis​—yupela planti stret! Olgeta i helpim. Mi no bin lukim dispela kain samting long bipo.”

Ol volantia i pinisim Haus Kingdom insait long sikspela wik. Taim kongrigesen i hariap long pinisim Haus Kingdom, dispela i helpim ol na ol inap insait tru long mekim nambawan bikpela wok bilong autim gutnius bilong Kingdom Bilong God.​—Matyu 24:14.

Ellen, narapela lokel Witnes, i tok: “Mipela olgeta i no inap fit insait long olpela Haus Kingdom na planti bilong mipela i save sindaun ausait. Nupela Haus Kingdom i nais stret na i gutpela moa, na mipela olgeta inap putim gut yau long ol gutpela tok mipela i kisim long rot bilong ol miting.”