Yes. Ol Witnes Bilong Jehova i bilip olsem “God em i as bilong olgeta tok i stap long Rait Holi, na ol i gutpela.” (2 Timoti 3:​16) Dispela i makim Olpela Testamen na Nupela Testamen wantaim, olsem planti man i save kolim. Ol Witnes Bilong Jehova i save kolim dispela 2-pela seksen bilong Baibel olsem Ol Hibru Skripsa na Ol Kristen Grik Skripsa. Long dispela rot, mipela i no givim tingting long ol man olsem sampela seksen bilong Baibel i olpela pinis o i no stret moa long taim bilong yumi.

 Holi spirit i kirapim Kristen aposel Pol long tok olsem: “Olgeta tok ol i bin raitim long bipo, ol i bin raitim bilong skulim yumi.” (Rom 15:4) Olsem na Ol Hibru Skripsa i gat ol gutpela tok bilong helpim yumi. I gat ol stori bilong histori we i stret long yumi long nau, na tu, i gat ol gutpela edvais we inap helpim yumi.

•   Histori i helpim yumi. Ol Hibru Skripsa i stori gut long hau God i bin wokim olgeta samting na hau Adam na Iv i bin mekim sin. Sapos i no gat rekod bilong ol dispela stori, yumi no inap kisim ol gutpela bekim long ol askim olsem: Yumi kamap olsem wanem? Wai na ol manmeri i save dai? (Stat 2:7, 17) Na tu, Ol Skripsa Hibru i stori gut long pasin God Jehova i bin mekim long ol manmeri husat i bin kisim amamas na karim ol wankain hevi olsem yumi.​—Jems 5:​17.

•   Gutpela edvais. Buk Provep na Eklisiastis i hap bilong Ol Skripsa Hibru, na ol i kamapim ol gutpela skultok we inap helpim yumi long laip bilong yumi. Ol dispela buk i kamapim ol edvais we inap helpim famili long stap amamas (Provep 15:17), hau long holim stretpela tingting long pasin bilong wok (Provep 10:4; Eklisiastis 4:6), na olsem wanem ol yangpela inap stap amamas (Eklisiastis 11:9–​12:1).

 Na tu, yumi inap kisim helpim taim yumi stadi long Lo Bilong Moses olsem i stap long Buk Tora (Buk Stat i go inap long Buk Lo). Maski ol Kristen i no stap aninit long dispela Lo, em i gat ol gutpela stiatok we inap helpim yumi long i stap amamas.​—Wok Pris 19:18; Lo 6:​5-7.