Baibel i tok laik bilong God em olsem ol manmeri “i mas sakim pasin pamuk.” (1 Tesalonaika 4:3) Long Baibel, dispela tok “pasin pamuk” i makim tu pasin adaltri, pasin bilong man i slip wantaim man na meri slip wantaim meri, na man na meri i slip wantaim na ol i no marit.

•  Wai na em bikpela samting long ai bilong God olsem man na meri i marit o nogat?

•  Olsem wanem long man na meri i sindaun nating wantaim paslain long ol i marit bilong skelim sapos ol inap stap gut wantaim o nogat?

•  Olsem wanem ol marit inap strongim marit bilong ol?

•   God yet i kamapim pasin bilong marit. Em i bin kamapim marit taim em i bringim fes man na meri i go long narapela narapela. (Stat 2:22-24) Em i no laik bai man na meri i sindaun nating wantaim sapos ol i no marit.

•   God i save long ol samting i gutpela bilong helpim ol manmeri. Taim God i kamapim marit, em i laik bai man na meri i stap wantaim inap oltaim, na dispela bai helpim na lukautim olgeta insait long famili. Skelim dispela tok piksa. Taim wanpela kampani i wokim ol wan wan hap bilong wanpela sia o tebol, ol bai givim instraksen long hau yu inap joinim gut olgeta wan wan hap bilong en, olsem tasol God i tokim yumi long wanem ol rot bilong famili i ken i stap amamas. Taim ol manmeri i bihainim ol lo bilong God, dispela i save helpim ol.—Aisaia 48:17, 18.

•   Bikpela hevi inap kamap sapos man na meri i slip wantaim na ol i no marit. Olsem, meri inap kisim bel, ol inap kisim sik bilong pamuk, na kisim bikpela bel hevi.

•   God i wokim man na meri na bai tupela inap kamapim pikinini taim tupela i mekim maritpasin. God i tingim laip olsem samting i holi, na pasin bilong kamapim pikinini em wanpela gutpela presen. God i laik bai yumi rispektim dispela presen taim yumi bihainim ol lo em i putim long sait bilong marit.—Hibru 13:4.

 Bilong marit i ken stap gut, i no olsem man na meri i ken sindaun nating wantaim pastaim inap sampela haptaim. Nogat. Taim man na meri i marit, tupela bai tingting strong long stap wantaim na mekim ol samting wantaim bilong stretim ol hevi. Marit bai strongim tingting bilong man na meri long stap wantaim na i no lusim narapela narapela.—Matyu 19:6.

 I no gat wanpela marit i gutpela olgeta. Tasol taim man na meri i bihainim ol tok bilong Baibel insait long marit bilong ol, marit bilong ol bai stap gut. Em hia sampela bilong tok bilong Baibel:

•   Tingim pastaim laik bilong poroman marit bilong yu.—1 Korin 7:3-5; Filipai 2:3, 4.

•   Kisim pasin bilong laikim na rispektim narapela narapela.—Efesus 5:25, 33.

•   Lain long kontrolim toktok bilong yu.—Provep 12:18.

•   No ken les kwik na redi long fogivim narapela narapela.—Kolosi 3:13, 14.