Long Baibel, pasin bilong tingim ol samting bilong lotu i makim strongpela laik tru bilong amamasim God na bihainim tingting bilong em. Man i tingim ol samting bilong lotu, em bai wok strong long bihainim ol lo bilong God na larim holi spirit i stiaim em. a—Rom 8:5; Efesus 5:1.

 Planti taim Baibel i stori long pasin bilong tingim ol samting bilong lotu i no wankain long pasin bilong i no tingim ol samting bilong lotu. Olsem, “man husat i tingim ol samting bilong skin, em i no inap kisim ol samting holi spirit bilong God i as bilong en,” em ol tok bilong God. (1 Korin 2:14-16) Ol man i save tingim ol samting bilong lotu, ol i no wankain long ol man i save tingim ol samting bilong graun, em ol i save “jeles na tok pait,” na ol i no save serim ol samting, na stap wanbel. (1 Korin 3:1-3) Na ol man em toktok bilong ol i save bagarapim gutnem bilong ol narapela na ol i save brukim pasin pren i stap namel long ol gutpela pren, Baibel i tok “ol i bihainim pasin olsem bilong ol animal na holi spirit bilong God i no stap wantaim ol.”—Jut 19; Provep 16:28. b

Long dispela atikol

• Pasin bilong tingim ol samting bilong lotu i kam long husat?

• Wai na pasin bilong tingim ol samting bilong lotu em i bikpela samting?

• Olsem wanem mi inap kisim pasin bilong tingim ol samting bilong lotu?

• Mi nidim lotu long helpim mi long kisim pasin bilong tingim ol samting bilong lotu?

• Ol tingting kranki long pasin bilong tingim ol samting bilong lotu

• Ol ves bilong Baibel i stori long pasin bilong tingim ol samting bilong lotu

 Yumi inap kisim pasin bilong tingim ol samting bilong lotu bikos God i wokim yumi i kamap olsem em yet. (Stat 1:27) Olsem na yumi no kirap nogut olsem planti manmeri i amamas na i gat bikpela laik long kisim save long ol samting we ol i no inap lukim long ai tru bilong ol.

 Yumi inap long kamapim ol pasin wankain olsem bilong Jehova c God, olsem pasin wanbel, marimari, na mekim wankain pasin long olgeta man. (Jems 3:17) Na tu, God i save givim holi spirit long ol man i wok strong long bihainim ol lo bilong God.—Aposel 5:32.

 Man i gat pasin bilong tingim ol samting bilong lotu, dispela bai helpim em long “i stap laip na i stap bel isi.” (Rom 8:6) Ol dispela presen i kam long God na ol i samting i dia tumas.

•   Laip: God i tok promis long givim laip oltaim long ol man i save tingim ol samting bilong lotu.—Jon 17:3; Galesia 6:8.

•   Bel isi: Dispela i makim pasin bilong stap bel isi wantaim God. Ol man i tingting tasol long ol laik bilong bodi, ol i stap birua bilong God. (Rom 8:7) Na tu, ol man i save tingim ol samting bilong lotu, God i save givim gutpela pe long ol, em “bel isi bilong God i winim tru tingting bilong man.” (Filipai 4:6, 7) Dispela bel isi i save helpim ol long i stap amamas.—Matyu 5:3.

•   Kisim save long ol lo bilong God na bihainim. Yu ken mekim olsem taim yu ritim Baibel we i gat ol tok bilong God long en, em ol tok we “holi spirit i kirapim” ol man long raitim. (2 Pita 1:21) Ol tok yu lainim bai helpim yu long lotuim God “long strong bilong holi spirit na long pasin i tru,” na holi spirit bai stiaim yu na ol samting yu mekim bai i stret wantaim laik bilong God.—Jon 4:24.

•   Beten askim God long helpim yu. (Luk 11:13) God bai helpim yu long kamapim ol pasin we i soim olsem yu man bilong tingim ol samting bilong lotu. (Galesia 5:22, 23) Na tu, beten inap helpim yu long kisim savetingting na bai yu inap karim ol hevi bilong laip.—Jems 5:14.

•   Bung wantaim ol man i tingim ol samting bilong lotu. Ol bai helpim yu long kamap strong long bilip. (Rom 1:11, 12) Tasol sapos yu poroman wantaim ol manmeri em tingting bilong ol i no stret wantaim tingting bilong God, dispela inap bagarapim yu long sait bilong bilip.—Jems 4:4.

 Maski man i stap insait long wanpela lotu, dispela i no makim olsem em i man bilong tingim ol samting bilong lotu, nogat. Baibel i tok: “Sapos wanpela man i ting em i wanpela lotuman, tasol em i no bosim gut maus bilong em, orait dispela man i giamanim bel bilong em yet na em i lotu nating tasol.”—Jems 1:26, futnot.

 Maski i olsem, Baibel i soim olsem ol man i tingim ol samting bilong lotu, ol i save lotuim God long pasin em i orait long en. Ol i luksave olsem “i gat wanpela holi spirit” tasol—holi spirit bilong God. Dispela spirit i kirapim ol olsem “wanpela bodi tasol,” o wanpela grup long lotuim God na wok bung wantaim long holimpas “pasin wanbel bilong holi spirit na stap bel isi, em pasin i save bungim yumi wantaim.”—Efesus 4:1-4.

 Tingting kranki: Olgeta samting i gat laip ol i gat pasin bilong tingim ol samting bilong lotu.

 Tok tru: Olgeta samting God i wokim i save givim biknem long em. (Buk Song 145:10; Rom 1:20) Maski i olsem, ol manmeri tasol inap long kisim pasin bilong pas gut wantaim God. Tasol ol animal i save bihainim ol lo i stap pinis long skin bilong ol na ol i no inap kisim pasin bilong pas gut wantaim God. Laik bilong bodi i stiaim ol samting ol animal i mekim. (2 Pita 2:12) Olsem na Baibel i soim olsem man i tingim ol samting bilong lotu i narapela kain long man i bihainim tingting na pasin olsem bilong ol animal.—Jems 3:15; Jut 19.