Yes. God i save tingim ol wokman bilong em husat i sik. Baibel i tok long ol gutpela wokman bilong God olsem: “Taim em i sik na slip long bet, Jehova bai lukautim em.” (Buk Song 41:3) Sapos yu gat wanpela sik i no inap pinis, dispela 3-pela rot bai helpim yu:

1.   Beten long kisim strong long karim hevi. Yu inap kisim “bel isi bilong God i winim tru tingting bilong man,” na dispela bai strongim na helpim yu long karim hevi bilong tingting planti.—Filipai 4:6, 7.

2.   Holim stretpela tingting. Baibel i tok: “Pasin bilong belgut i olsem marasin bilong mekim man i stap gut. Tasol sapos tingting bilong man i bagarap, dispela i olsem sik nogut i wok long bagarapim ol bun bilong en.” (Provep 17:22, Buk Baibel) Kisim pasin bilong amamas, long wanem, dispela bai helpim yu long karim hevi, na tu, helpim helt bilong yu.

3.   Strongim bilip bilong yu long ol samting bai kamap bihain. Bilip bilong yu long ol gutpela samting yu wetim inap helpim yu long stap amamas maski yu gat wanpela sik i no inap pinis. (Rom 12:12) Baibel i tok profet long wanpela taim bai kamap we “i no gat wanpela man . . . bai tok: ‘Mi sik.’” (Aisaia 33:24) Long dispela taim God bai pinisim ol sik we wok bilong saiens long nau i no inap pinisim. Olsem, Baibel i tok ol lapun bai kamap yangpela gen: “Orait bodi bilong dispela man i ken kamap gutpela gen winim bilong pikinini. Na bodi bilong em i ken kamap strongpela gen wankain olsem long taim em i yangpela.”—Jop 33:25.

 Tingim: Ol Witnes Bilong Jehova i amamas long helpim God i givim, na tu, ol i painim rot bilong kisim tritmen long sik we i no inap pinis. (Mak 2:17) Tasol mipela i no makim wanem kain marasin samting yu mas kisim; mipela i larim wan wan man yet i mas wokim disisen long helt bilong em.