Ol pikinini i bikpela pinis, ol i gat bikpela wok long stretim gut ol samting bilong lukautim lapun papamama. Baibel i tok ol pikinini i bikpela pinis, ol i mas “bihainim lotu bilong ol na lukautim famili bilong ol yet na bekim dinau bilong papamama . . . , bikos dispela i gutpela long ai bilong God.” (1 Timoti 5:4, New International Version) Taim ol pikinini i bikpela pinis i mekim ol samting bilong lukautim lapun papamama, ol i bihainim tu tok bilong Baibel long onarim ol papamama.—Efesus 6:2, 3.

 Baibel i no kolim stret ol samting ol pikinini i mas mekim bilong lukautim lapun papamama. Tasol Baibel i stori long ol bilipman na ol bilipmeri i bin mekim dispela wok. Na tu, Baibel i gat ol gutpela edvais we inap helpim lain i lukautim lapun papamama.

•  Long taim bilong ol man i bin raitim Baibel, olsem wanem sampela long famili i bin lukautim lapun papamama?

•  Wanem gutpela edvais bilong Baibel inap helpim lain i lukautim lapun papamama?

•  Yu ting Baibel i tok yumi mas lukautim lapun papamama long haus bilong yumi yet?

 Ol i bihainim narapela narapela rot i stret long sindaun bilong ol.

•   Josep i stap longwe long lapun papa bilong em, Jekop. Taim rot i op, Josep i stretim rot long Jekop inap i go stap klostu moa long em. Na Josep i lukautim papa long sait bilong haus, kaikai, na ol narapela samting.—Stat 45:9-11; 47:11, 12.

•   Rut i lusim ples bilong em na em i go stap long kantri bilong tambu mama bilong em, na em i wok hat tru long lukautim tambu mama.—Rut 1:16; 2:2, 17, 18, 23.

•   Jisas, paslain long em i dai, em i makim narapela long lukautim mama bilong em, Maria, bikos ating long dispela taim Maria em i wido.—Jon 19:26, 27. a

 Baibel i gat ol stiatok we inap helpim lain i lukautim lapun papamama bikos sampela taim ol dispela lain inap pilim taiet na bel hevi.

•   Onarim papamama.

   Baibel i tok: “Yupela i mas onarim papa na mama bilong yupela.”—Kisim Bek 20:12.

   Olsem wanem yumi inap bihainim dispela stiatok? Yu inap onarim papamama taim yu larim ol long mekim sampela samting inap long strong bilong ol, na yu no kontrolim olgeta samting ol i mekim. Sapos inap, larim ol yet i wokim disisen long ol samting ol i laik bai yu mekim bilong lukautim ol. Na tu, givim ona long ol taim yu mekim ol samting inap long skel bilong yu long helpim ol.

•   Pilim tingting na fogivim rong.

   Baibel i tok: “Gutpela tingting bilong man i save pasim em long belhat kwik, na taim em i no tingim rong narapela i mekim long em, em i mekim gutpela pasin tru.”—Provep 19:11.

   Olsem wanem yumi inap bihainim dispela stiatok? Sapos lapun papa o mama i mekim wanpela tok i no stret o em i no pilim hatwok bilong yu long lukautim em, askim yu yet, ‘Mi bai pilim olsem wanem sapos mi olsem em na mi no inap moa long mekim ol samting mi laik mekim na mi pilim bel hevi?’ Taim yu pilim tingting bilong lapun na yu fogivim em, dispela bai daunim hevi na hevi i no inap kamap bikpela.

•   Kisim tingting bilong ol narapela.

   Baibel i tok: “Taim man i no toktok wantaim ol arapela bilong kisim tingting, ol plen bilong em i no inap kamap gut, tasol gutpela samting i kamap taim man i kisim tingting bilong planti edvaisa.”—Provep 15:22.

   Olsem wanem yumi inap bihainim dispela stiatok? Mekim wok painimaut long olsem wanem yu inap helpim papamama long sait bilong sik bilong ol. Painimaut sapos i gat sampela samting long komiuniti bilong yu we inap helpim yu long wok bilong lukautim papamama. Toktok wantaim ol narapela em ol i bin lukautim lapun papamama bilong ol. Sapos yu gat ol brata na susa, orait mobeta yupela i ken bung na toktok wantaim long ol samting papamama i nidim, na olsem wanem yupela bai lukautim ol, na wok wan wan bai mekim.

•   Bihainim pasin daun.

   Baibel i tok: “Savetingting i stap wantaim ol man i gat pasin daun.”—Provep 11:2.

   Olsem wanem yumi inap bihainim dispela stiatok? Luksave long ol samting yu no inap long mekim. Olsem, olgeta manmeri i gat mak bilong taim na strong bilong ol. Ol dispela samting inap mekim na yu no inap mekim olgeta samting yu laik mekim bilong lukautim papamama. Sapos yu pilim olsem wok bilong lukautim lapun papamama i daunim yu tru, orait askim ol narapela long famili long helpim yu o askim ol lain i gat save long mekim dispela wok.

•   Lukautim yu yet.

   Baibel i tok: “I no gat wanpela man i save heitim bodi bilong em yet, nogat. Em i save givim kaikai long en na tingim olsem samting i dia tumas.”—Efesus 5:29.

   Olsem wanem yumi inap bihainim dispela stiatok? Em tru olsem yu gat wok long lukautim papamama, tasol yu mas tingim tu yu yet long ol samting yu nidim na lukautim tu famili bilong yu sapos yu marit. Yu mas kisim gut kaikai. Yu mas malolo gut na slip. (Eklisiastis 4:6) Na sapos inap, narapela i ken lukautim papamama na larim yu mekim narapela samting inap sotpela haptaim. Sapos yu mekim ol dispela samting, bel, tingting, na bodi bilong yu bai stap gut na yu inap long lukautim papamama.

 Baibel i no kolim wanpela tok stret bilong makim olsem ol bikpela pikinini i mas lukautim papamama long haus bilong ol yet, nogat. Sampela famili i laik bai lapun papamama i stap wantaim ol long haus bilong ol. Tasol bihain, ol inap pilim olsem em bai gutpela moa long bringim lapun papamama i go stap long haus we ol i save lukautim ol lapun. Olgeta insait long famili, ol pikinini na lapun papamama tu i ken toktok wantaim na wokim disisen long wanem gutpela rot bilong bihainim bilong lukautim ol lapun papamama.—Galesia 6:4, 5.