Lain Israel long bipo i mas givim kontribiusen bilong helpim wok bilong lotu i tru, olsem na long olgeta wan wan yia ol i mas tilim ol samting ol i kisim long gaden bilong ol long 10-pela hap na wanpela hap ol i mas givim long God. a God i tokim ol: “Yupela i mas givim namba 10 hap [wanpela bilong ol tenpela hap, King James Verson] bilong olgeta kaikai em graun bilong yupela i kamapim long olgeta wan wan yia.”—Lo 14:22.

 Dispela lo bilong tilim ol samting long 10-pela hap na givim wanpela hap long God em wanpela bilong ol lo i stap long Lo Bilong Moses we God i givim long lain Israel bilong bipo. Ol Kristen i no stap aninit long Lo Bilong Moses, olsem na i no gat wok long ol i tilim ol samting bilong ol long 10-pela hap na givim wanpela hap long God. (Kolosi 2:13, 14) Olgeta wan wan Kristen i ken givim mani “ol i pasim tok long bel long givim. Ol i no ken bel hevi na givim na narapela i no ken fosim ol long givim bikos God i save laikim tumas man husat i amamas long givim samting.”—2 Korin 9:7.

•  Pasin Bilong Givim Namba 10 Hap​—“Olpela Testamen”

•  Pasin Bilong Givim Namba 10 Hap​—“Nupela Testamen”

 Long hap bilong Baibel, ol i kolim olsem Olpela Testamen, em i stori planti long dispela pasin bilong tilim ol samting long 10-pela hap na givim wanpela hap long God. Planti bilong ol dispela hap bilong Baibel i stori long ol samting i kamap bihain long God i givim Lo (o Lo Bilong Moses) long Moses bilong givim long lain Israel. Tasol sampela bilong ol i stap tu long stori bilong ol samting i kamap paslain long God i givim Lo Bilong Moses.

Paslain Long Lo Bilong Moses

 Fes man em Baibel i stori long em i tilim ol samting bilong em long 10-pela hap na givim wanpela hap long narapela man em Abram (o Abraham). (Stat 14:18-20; Hibru 7:4) I luk olsem dispela em wanpela taim tasol we Abram i mekim olsem taim em i givim presen long man i stap king na pris bilong Salem. I no gat narapela taim gen we Baibel i stori olsem Abraham o wanpela pikinini bilong em i bin tilim ol samting bilong ol long 10-pela hap na givim wanpela hap long naranpela man.

 Namba tu man em Baibel i stori long em i bin tilim ol samting bilong em long 10-pela hap na givim wanpela hap long God em Jekop, tumbuna pikinini bilong Abraham. Em i bin tok promis olsem sapos God i blesim em, orait “long olgeta samting” God i givim em, em bai “tilim long 10-pela hap, na givim wanpela hap long [God].” (Stat 28:20-22) Sampela saveman bilong Baibel i tok, i luk olsem Jekop i givim namba 10 hap long God long rot bilong ofaim ol animal long em. Jekop yet i truim tok promis bilong em, na em i no strong long famili bilong em i mas bihainim promis bilong em long tilim olgeta samting bilong ol long 10-pela hap na givim wanpela hap long God.

Aninit Long Lo Bilong Moses

 Lain Israel bilong bipo i mas tilim ol samting bilong ol long 10-pela hap na givim wanpela hap long helpim wok bilong lotu.

•   Taim ol Israel i tilim ol samting bilong ol long 10-pela hap na bringim wanpela kam i long tempel, dispela i helpim lain i stap fultaim long mekim wok bilong lotu—lain Livai, na ol pris—em ol i no gat graun bilong ol yet long planim kaikai. (Namba 18:20, 21) Lain Livai i save kisim dispela wanpela hap long ol manmeri, na ol i save tilim gen dispela wanpela hap i go long 10-pela hap na givim wanpela hap long ol pris.—Namba 18:26-29.

•   I luk olsem long olgeta yia i gat narapela namba 10 hap lain Israel i mas givim, na dispela i bilong helpim lain Livai na ol narapela. (Lo 14:22, 23) Ol famili Israel i save yusim dispela namba 10 hap long taim bilong ol spesel bung, na i gat wan wan yia stret we ol i save yusim dispela namba 10 hap bilong helpim ol rabisman.—Lo 14:28, 29; 26:12.

 Olsem wanem ol i makim stret dispela namba 10 hap? Long olgeta wan wan yia, lain Israel i save tilim long 10-pela hap ol kaikai i kamap long gaden bilong ol na givim 1-pela hap long Jehova. (Wok Pris 27:30) Sapos ol i laik senisim na givim mani, orait ol i mas givim pe bilong dispela 1-pela hap na putim 20 pesen moa antap long en. (Wok Pris 27:31) Na tu, ol i mas givim “1-pela bilong ol 10-pela bulmakau na sipsip.”—Wok Pris 27:32.

 Taim lain Israel i laik givim wanpela bilong ol 10-pela animal, ol i save makim namba ten animal i lusim banis na i go ausait. Lo i tok ol i no ken skelim o senisim ol dispela animal ol i makim bilong givim long God, na tu, ol i no ken senisim animal na givim mani. (Wok Pris 27:32, 33) Tasol long dispela narapela namba 10 hap we ol i save yusim long taim bilong ol bikpela bung bilong lotu i save kamap long olgeta yia, ol i ken senisim dispela na givim mani. Dispela i mekim na em isi moa long ol manmeri Israel we i save wokabaut inap longpela hap bilong i go long ol bikpela bung bilong lotu.—Lo 14:25, 26.

 Wanem taim lain Israel i save givim namba 10 hap? Long olgeta wan wan yia, ol i save tilim ol samting bilong ol long 10-pela hap na givim wanpela hap long God. (Lo 14:22) Tasol long olgeta namba seven yia, ol i no gat wok long mekim olsem. Namba seven yia em sabat, o yia bilong malolo, we lain Israel i no save planim ol nupela kaikai. (Wok Pris 25:4, 5) Olsem na taim ol i kisim ol kaikai i redi pinis long gaden, i no gat wok long ol i tilim long 10-pela hap na givim wanpela hap long God. Long olgeta namba 7 yia em yia bilong Sabat. Long pinis bilong namba 3 na namba 6 yia insait long dispela 7-pela yia, ol Israel i save yusim dispela namba 10 hap bilong helpim ol rabisman na ol Livai.—Lo 14:28, 29.

 Wanem panismen bilong man i no givim namba ten hap? Lo Bilong Moses i no kolim panismen bilong man i no givim namba ten hap. Ol Israel i save givim namba ten hap bikos ol i save olsem i stret long mekim olsem. Ol i mas tokaut long ai bilong God olsem ol i givim pinis namba ten hap, na ol i ken askim God long blesim ol long dispela samting ol i bin mekim. (Lo 26:12-15) Sapos man i no givim namba ten hap, orait long ai bilong God i olsem em i stilim ol samting bilong God.—Malakai 3:8, 9.

 Yu ting lo bilong givim namba ten hap i putim hevi long ol man? Nogat. God i tok promis long lain Israel olsem sapos ol i tilim ol samting bilong ol long 10-pela hap na givim wanpela hap long tempel, em bai blesim ol na ol i no inap sot long wanpela samting. (Malakai 3:10) Tasol taim lain Israel i no tilim ol samting bilong ol long 10-pela hap na givim wanpela hap long tempel, hevi i painim ol. God i no blesim ol. Na tu, taim ol i no bihainim dispela lo bilong givim namba 10 hap, dispela i putim hevi long ol pris na ol Livai, na ol i no mekim wok bilong ol.—Nehemia 13:10; Malakai 3:7.

 Taim Jisas i bin stap long graun, ol man i lotuim God i mas bihainim yet dispela lo bilong tilim ol samting bilong ol long 10-pela hap na givim hap long God. Tasol dispela lo i pinis bihain long dai bilong Jisas.

Long taim bilong Jisas

 Long hap bilong Baibel em planti man i save kolim olsem Nupela Testamen, Baibel i soim olsem ol Israel i bihainim yet pasin bilong givim namba ten hap olsem ofa taim Jisas i stap long graun. Jisas i tok olsem i stret long ol manmeri i givim namba ten hap, tasol em i givim strongpela tok long ol lida bilong lotu bikos ol i bisi moa long givim namba ten hap na ol “i no tingim ol bikpela tok bilong Lo, olsem stretpela pasin na pasin marimari na pasin bilong bilip.”—Matyu 23:23.

Bihain long dai bilong Jisas

 Bihain long dai bilong Jisas, ol manmeri i no gat wok moa long tilim ol samting bilong ol long 10-pela hap na givim wanpela hap long God. Jisas i dai na givim laip bilong em olsem ofa na dispela ofa i rausim, o pinisim, Lo Bilong Moses, na em i pinisim tu pasin bilong “kisim namba 10 hap bilong ol samting long ol manmeri.”—Hibru 7:5, 18; Efesus 2:13-15; Kolosi 2:13, 14.