I gat wanpela ves tasol bilong Baibel i stori long tatu em long Wok Pris 19:28, em i tok: “Yupela i no ken wokim tatu long skin bilong yupela.” God i givim dispela lo long lain Israel bambai ol i stap narapela kain long ol lain i stap klostu long ol em ol i save wokim ol tatu long skin bilong ol, na ol dispela tatu i gat nem o sain bilong ol god bilong ol. (Lo 14:2) Ol Kristen i no stap aninit long Lo em God i bin givim long lain Israel, tasol i stret long ol i ken skelim gut stiatok bilong dispela lo.

Olsem wanem? I stret long Kristen i kisim tatu o katim mak long skin?

 Ol dispela ves bilong Baibel inap helpim yu long skelim gut dispela samting:

•   “Ol meri i mas bilasim ol yet long . . . pasin daun.” (1 Timoti 2:9, New American Bible) Dispela stiatok i stret long ol meri na ol man tu. Yumi mas rispektim filings bilong ol narapela na no ken mekim ol samting bilong pulim ai bilong ol.

•   Sampela manmeri i laik kisim biknem, na sampela i laik bihainim ol stail we i mekim na ol i stap narapela kain long ol narapela, na ol narapela i wokim tatu bilong soim olsem ol i gat rait long mekim olgeta kain samting long bodi bilong ol yet. Tasol Baibel i givim dispela tok long ol Kristen: “Givim bodi bilong yupela olsem sakrifais i stap laip, na i stap holi, na God i orait long en. Dispela em wanpela wok bilong God yupela i mekim wantaim gutpela tingting.” (Rom 12:1) Yusim “gutpela tingting” long skelim gut wai na yu laik kisim tatu. Sapos yu laik bihainim wanpela kain stail bilong bilas o yu laik soim olsem yu stap memba bilong wanpela grup, orait tingim olsem filings bilong yu inap senis, tasol dispela tatu bai stap oltaim. Taim yu skelim gut wanem as na yu laik kisim tatu, dispela inap helpim yu long wokim gutpela disisen.—Provep 4:7.

•   “Ol plen bilong man i save wok strong bai kamapim gutpela samting, tasol ol man husat i save hariap long mekim samting, ol bai kamap rabisman.” (Provep 21:5) Planti taim ol manmeri i no tingting gut na ol i hariap tumas long kisim tatu, na bihain dispela i save mekim na ol i hatwok long pas gut wantaim ol narapela na putim hevi long ol taim ol i laik painim wok mani. Na taim ol i laik rausim tatu, ol bai tromoi bikpela mani na ol inap pilim bikpela pen long bodi. Wok painimaut—na wok bisnis bilong rausim tatu i kamap bikpela moa yet—i soim olsem planti lain i bin kisim tatu ol i ting olsem em bai gutpela tru sapos ol i no bin kisim tatu long bipo.