Fraide, Februeri 24, 2023, i makim wanpela yia aniveseri bilong woa i kamap long Yukren. Sampela ripot i tok inap olsem 300,000 soldia bilong Yukren na Rasia i dai o ol i kisim bagarap, na olsem 30,000 manmeri nating i bin dai long dispela woa. Tasol ating namba tru tru bilong ol man i dai o kisim bagarap i antap moa.

 Sori tru, i luk olsem dispela woa i no inap pinis hariap.

•   “Klostu wanpela yia bihain long ami bilong Rasia i go insait long Yukren, i luk olsem i no gat rot long dispela woa bai pinis. I klia tru olsem tupela sait wantaim i no inap winim dispela woa, na i luk olsem tupela sait wantaim bai i no gat rot bilong toktok wantaim na stretim dispela hevi.”​—NPR (National Public Radio), Februeri 19, 2023.

 Planti manmeri i pilim bikpela bel hevi tru long ol pen na hevi em dispela woa na ol narapela pait i bin kamapim long ol manmeri i no gat asua. Baibel i gat wanem gutpela tok? Yu ting woa bai pinis bihain?

 Baibel i stori long wanpela woa we bai seivim laip bilong ol manmeri na i no bagarapim ol. Dispela woa em Armagedon, na Baibel i stori long en olsem “pait [bilong] dispela bikpela de bilong God i Gat Olgeta Strong.” (Revelesen 16:14, 16) Long rot bilong dispela woa, God bai pinisim tru olgeta gavman bilong ol man em ol i save kamapim planti woa we i bagarapim tru ol manmeri. Bilong kisim save long hau Armagedon bai kamapim bel isi, ritim ol dispela atikol:

•   “Pait Bilong Armagedon Em Wanem Samting?”

•   “Armagedon Em Samting Bilong Amamas Long En!”