Yu bilip olsem ol samting bilong graun bai kamap gutpela long bihain? Planti manmeri i bilip olsem ol samting bai kamap gutpela maski i gat ol bikpela hevi i painim yumi long nau. Tasol yu ting i stret long yumi bilip olsem ol samting bai kamap gutpela? Yes! Baibel i tok i gat ol gutpela samting bai kamap bihain.

•  Baibel i stori long wanem ol gutpela samting yumi ken wet long en?

•  Yu ting ol samting Baibel i tok promis long en i driman nating?

•  Hau bai ol gutpela samting Baibel i tok promis long en bai kamap?

•  Wanem taim ol dispela samting bai kamap?

•  Hau bai ol gutpela samting em Baibel i tok long en inap helpim yumi long nau?

 Baibel i kamapim klia olsem yumi ol man i save bungim ol bikpela hevi. Tasol em i tok promis tu olsem ol dispela hevi bai i no inap stap oltaim, nogat. Yumi skelim sampela bilong ol dispela hevi.

•   Hevi: Planti man i no gat haus

   Baibel i tok: “Ol bai wokim ol haus na stap long ol.”—Aisaia 65:21.

   Samting bai kamap long bihain: Ol man bai gat haus bilong ol yet.

•   Hevi: Planti man i no gat wok mani na stap rabis

   Baibel i tok: “Ol manmeri mi bin makim, ol bai amamas tru long ol wok em han bilong ol yet i mekim.”—Aisaia 65:22.

   Samting bai kamap long bihain: Olgeta man bai amamas na enjoim wok bilong ol, na kisim gutpela samting long wok bilong ol.

•   Hevi: Pasin i no stret

   Baibel i tok: “Ol hetman bai bosim ol manmeri na kamapim stretpela kot.”—Aisaia 32:1.

   Samting bai kamap long bihain: Bai i no gat pasin bilong mekim nogut long ol man bilong narapela skin kala o sindaun, na bai i no gat hevi bilong stap rabis. Bai i gat pasin fea long olgeta hap.

•   Hevi: Sot long kaikai na Hangre

   Baibel i tok: “Bai i gat planti wit samting long graun; na antap long ol maunten, ol wit samting bai pulap.”—Buk Song 72:16.

   Samting bai kamap long bihain: Olgeta manmeri bai gat planti gutpela kaikai. No gat man bai hangre o sot long kaikai.

•   Hevi: Pait na bagarapim man na pasin raskol

   Baibel i tok: “Olgeta wan wan bai sindaun aninit long rop wain na diwai fik bilong em yet, na i no gat wanpela bai mekim ol i pret.”—Maika 4:4.

   Samting bai kamap long bihain: Olgeta manmeri bai pilim seif na ol bai sindaun gut bikos i no gat ol man nogut i stap moa, na “ol stretpela man bai kisim graun olgeta.”—Buk Song 37:10, 29.

•   Hevi: Woa

   Baibel i tok: “Wanpela kantri i no inap apim bainat na pait long narapela kantri, na bai ol i no skul moa long pait.”—Aisaia 2:4.

   Samting bai kamap long bihain: Bel isi bai stap long olgeta hap bilong graun. (Buk Song 72:7) I no gat wanpela bai krai sori long wanpela em i laikim tumas i dai long woa o ranawe i go long narapela ples bikos long woa.

•   Hevi: Ol sik

   Baibel i tok: “I no gat wanpela man i stap long dispela ples bai tok: ‘Mi sik.’”—Aisaia 33:24.

   Samting bai kamap long bihain: Ol manmeri bai i no gat bagarap long bodi o kisim sik. (Aisaia 35:5, 6) Baibel i tok promis tu olsem “bai i no gat dai moa.”—Revelesen 21:4.

•   Hevi: Ol man i bagarapim ol samting long graun

   Baibel i tok: “Ples nating na ples em graun i drai, ol bai amamas, na ples drai nating bai amamas na ol plaua bai karamapim ples olsem plaua safron.”—Aisaia 35:1.

   Samting bai kamap long bihain: Graun olgeta bai kamap paradais na bai ol man i ken sindaun long en, olsem laik bilong God long pastaim.—Stat 2:15; Aisaia 45:18.

 Ating yu gat kain tingting. Tasol mipela i laik kirapim yu long skelim gut tok Baibel i mekim long ol samting bai kamap bihain. Bilong wanem? Ol tok promis i stap long Baibel i wankain long ol tok promis bilong ol man na ol samting ol i tok bai kamap long bihain. Ol tok promis i stap long Baibel i kam long God. Hia em as na ol tok promis bilong Baibel na bilong ol man i no wankain:

•   Yumi inap trastim God. Baibel i tok God “i no inap giaman.” (Taitus 1:2) Na tu, God wanpela tasol inap tokaut long ol samting bai kamap bihain. (Aisaia 46:10) Baibel i gat planti stori i kamapim klia olsem ol samting God i tok long en i save kamap tru. Bilong kisim sampela save moa, lukim vidio Olsem Wanem Yumi Ken Save Olsem Tok Bilong Baibel i Tru?

•   God i gat strong long stretim ol hevi bilong yumi. Baibel i tok God i gat strong long mekim ‘wanem wanem samting em i laik mekim.’ (Buk Song 135:5, 6) Dispela i makim olsem, i no gat wanpela samting inap pasim God long inapim ol tok promis bilong em. Na tu, God i laik helpim yumi bikos em i laikim yumi.—Jon 3:16.

 Ating yu laik save, ‘Sapos God i laik helpim yumi na em i gat strong long mekim olsem, wai na planti hevi i wok yet long painim yumi?’ Bilong bekim dispela askim, lukim vidio Bilong Wanem God i Larim Pen na Hevi i Stap?

 God bai yusim Kingdom bilong em, em gavman i stap long heven, bilong inapim ol tok promis bilong em. Em i makim Jisas Krais long stap King bilong dispela Kingdom, na em i givim namba long em bilong bosim graun na ol manmeri i stap long en. Taim Jisas i stap long graun, em i oraitim ol sikman, givim kaikai long ol man i hangre, bosim weda, na tu, kirapim bek ol man i dai. (Mak 4:39; 6:41-44; Luk 4:40; Jon 11:43, 44) Long dispela rot em i kamapim klia ol samting em bai mekim olsem King bilong Kingdom Bilong God.

 Lukim vidio Kingdom Bilong God Em Wanem Samting? bilong kisim sampela save moa long hau Kingdom Bilong God bai helpim yu.

 Klostu nau! Olsem wanem yumi ken bilip tru olsem ol dispela samting bai kamap? Baibel i tok profet long ol samting bai kamap we i soim olsem klostu nau Kingdom Bilong God bai kirap bosim dispela graun. (Luk 21:10, 11) Ol samting i kamap long nau i truim ol tok profet bilong Baibel.

 Bilong kisim sampela save moa, ritim atikol “Wanem Taim Kingdom Bilong God Bai Bosim Graun?”

 Wanpela man bilong raitim Baibel i tok ol samting yumi bilip na wet long en “i stap olsem anka bilong laip bilong yumi.” (Hibru 6:19) Wankain olsem anka inap holim strong sip na em i no trip long taim bilong bikpela win na ren, tok bilong Baibel long ol gutpela samting bai kamap bihain inap helpim yumi long karim ol hevi long nau. Ol samting yumi bilip na wet long en inap helpim yumi long stap isi na stap amamas, na i no tingting planti, na yumi stap gut.—1 Tesalonaika 5:8.