Baibel i stori long Armagedon olsem, em i no wanpela pait we bai kamap long wanpela ples stret long graun, nogat, em wanpela pait we bai kamap namel long olgeta gavman bilong ol man na God.

•   “Ol spirit nogut i as bilong ol dispela tok . . . i go long ol king bilong olgeta hap graun bilong bungim olgeta long i go long pait long dispela bikpela de bilong God i Gat Olgeta Strong. . . . Ol dispela tok i bringim ol king i kam bung long dispela ples, long tok Hibru ol i kolim Armagedon.”​—Revelesen 16:14, 16.

 Dispela tok “Armagedon” i kam long tok Hibru Har Meghid·dohnʹ, mining bilong en “Maunten Bilong Megido.” Megido em wanpela taun long teritori bilong Israel bilong bipo. Bikos long dispela risen, sampela manmeri i bilip olsem pait bilong Armagedon bai kamap long Israel. Tasol taun bilong Megido o ol narapela ples long Midel Is, ol i no bikpela inap long “ol king bilong olgeta hap graun” na ol ami bilong ol.

 Ol i raitim Buk Revelesen “long rot bilong ol piksa,” o ol tok piksa. (Revelesen 1:1) Armagedon i no makim wanpela ples stret, nogat, em i makim wanpela samting i mas kamap long olgeta hap bilong graun we olgeta kantri bai bung wantaim bilong mekim laspela pait bilong ol wantaim gavman bilong God.​—Revelesen 19:11-16, 19-21.