WANPELA man i mekim wok painimaut long winim 800 yangpela em ol bilong narapela narapela lotu. Em i askim ol sapos ol i bilip olsem Jisas i save harim beten bilong ol o nogat. Winim 60 pesen i tok, ol i bilip olsem Jisas i save harim ol beten. Tasol wanpela yangpela i tok God i save harim beten bilong em.

Yu gat wanem tingting? Yu ting yumi mas beten long Jisas o God? a Bilong bekim dispela askim, pastaim yumi laik stori long pasin Jisas i skulim ol disaipel bilong em long bihainim taim ol i beten.

Jisas i skulim yumi long pasin bilong beten, na tu, em i soim yumi long Man em yumi mas beten long em.

TOK EM I SKULIM OL MAN LONG EN: Taim wanpela disaipel i askim Jisas, “Bikpela, skulim mipela long mekim beten,” Jisas i tok: “Taim yupela i beten, yupela i mas tok: ‘Papa.’” (Luk 11:1, 2) Na tu, long Bikpela Tok Long Maunten, Jisas i kirapim ol man long beten. Em i tok: “Beten long Papa bilong yu.” Na tu, em i tok: “God, Papa bilong yupela, em i save long ol samting yupela i nidim paslain long yupela i askim em.” (Matyu 6:6, 8) Long laspela nait bilong Jisas long graun, em i tokim ol disaipel: “Sapos yupela i askim Papa long wanpela samting long nem bilong mi, em bai i givim long yupela.” (Jon 16:23) Olsem na Jisas i bin skulim yumi long beten long God Jehova, em Papa bilong em na Papa bilong yumi tu.—Jon 20:17.

PASIN EM I BIHAINIM: Jisas i bihainim wankain pasin olsem em i bin skulim ol man long en taim em i beten olsem: “Papa, Bikpela bilong heven na graun, mi litimapim nem bilong yu long ai bilong ol man.” (Luk 10:21) Long narapela taim, “Jisas i lukluk i go antap long skai na tok: ‘Papa, mi tenkyu long yu bin harim tok bilong mi.’” (Jon 11:41) Na klostu long taim Jisas i dai, em i beten olsem: “Papa mi putim strong bilong laip bilong mi i go long han bilong yu.” (Luk 23:46) Taim Jisas i beten long Papa bilong em long heven, em i tok: “Bikpela bilong heven na graun.” Na dispela em pasin olgeta man i mas bihainim taim ol i beten. (Matyu 11:25; 26:41, 42; 1 Jon 2:6) Yu ting ol disaipel bilong Jisas long pastaim i klia long pasin em i skulim ol long bihainim taim ol i beten?

Sampela wik bihain long Jisas i go long heven, ol birua i mekim nogut long ol disaipel bilong em na pretim ol. (Aposel 4:18) Olsem na ol i beten long husat bilong kisim helpim? Baibel i tok: “Ol i wanbel na beten long God,” na ol i tok long em i ken wok yet long helpim ol “long nem bilong Jisas, em wokman holi bilong [God].” (Aposel 4:24, 30) Olsem na ol disaipel i bihainim pasin bilong Jisas long beten. Ol i beten long God, na i no long Jisas.

Sampela yia bihain, aposel Pol i stori long pasin bilong em na ol poroman bilong em long beten. Em i raitim pas long ol wanlain Kristen na i tok: “Taim mipela i beten long yupela, oltaim mipela i save tok tenkyu long God, Papa bilong Bikpela bilong yumi, Jisas Krais.” (Kolosi 1:3) Na tu, Pol i raitim pas long ol wanbilip bilong em na tok: “Oltaim tok tenkyu long God na Papa bilong yumi long olgeta samting, na mekim long nem bilong Bikpela bilong yumi, Jisas Krais.” (Efesus 5:20) Tok bilong Pol i soim olsem em i laik kirapim yumi long beten long “God na Papa bilong yumi long olgeta samting,” na yumi mas beten long nem bilong Jisas.—Kolosi 3:17.

Olsem ol Kristen long taim bilong ol aposel, yumi ken bihainim pasin bilong Jisas long beten na long dispela rot yumi soim olsem yumi laikim em. (Jon 14:15) Taim yumi beten long Papa bilong yumi long heven wanpela tasol, bai yumi pilim tru tok bilong Song 116:1, 2, em i tok: “Bikpela i save harim singaut bilong mi. Olsem na mi laikim em tumas . . . Olgeta taim mi stap laip bai mi beten long em.” b