Mi go bikpela long Rmaysh, em wanpela hap i stap klostu long boda bilong Israel na Lebanon. Long dispela taim i gat woa. Mi inap tingim yet, ol bom i pairap na planti man i kisim bagarap long bodi. Laip i hat tru na pasin raskol na pasin bilong pait i go bikpela tru.

Famili bilong mi i bilong lotu Maron, em wanpela bilong ol lotu Katolik. Mipela 12-pela long famili, olsem na papa i save wok strong long lukautim mipela na mama i save kisim mipela i go long lotu. Tasol mi pilim olsem lotu i wankain olsem ol narapela oganaisesen bilong graun, ol i no save helpim ol man.

Taim mi tineja, mi kirap lainim kung-fu. Mi kisim gutpela trening, olsem na mi kamap saveman long yusim han na lek long pait, na tu, mi save gut long yusim ol samting bilong pait. Mi tingting olsem, ‘Mi no inap long stopim woa, tasol mi inap stopim ol man bilong pait na bagarapim ol narapela.’ Taim mi lukim ol man i pait, hariap tru mi save stopim ol. Maski wanpela liklik hevi i kamap mi save belhat hariap. Olgeta man long hap saut bilong Lebanon i pret long mi, long wanem, ol i luksave olsem mi strong long daunim pasin bilong pait na wansait pasin.

Long 1980, mi joinim wanpela skul bilong kung-fu long Beirut. Mi save go long trening maski long olgeta de ol man i pait na tromoi ol bom. Mi save kaikai, slip, na bihainim pasin bilong Bruce Lee. Em wanpela man Saina husat i stap long Amerika olsem wanpela ekta na em i saveman tru long pait kung-fu. Mi bihainim pasin bilong em long wokabaut, stailim gras, na pasin bilong em long singaut taim em i pait kung-fu. Na mi no save smail.

Mi lainim kung-fu, long wanem, mi laik kamap saveman tru bilong pait kung-fu long Saina. Wanpela apinun, mi wok long trening bilong i go long wanpela pait bilong kung-fu long Saina, na mi harim wanpela man i nok long dua. Pren bilong mi i kisim tupela Witnes Bilong Jehova i kam long haus bilong mi. Mi tokim ol: “Mi nogat  save long Baibel.” Mi no bin ting olsem kirap long dispela taim i stap bilong mi bai senis olgeta.

Ol Witnes i soim mi long tok Baibel i mekim long as na ol man i no inap long pinisim wansait pasin na pasin bilong pait na bagarapim ol narapela. Ol i helpim mi long luksave olsem Satan em i as tru bilong ol hevi. (Revelesen 12:12) Mi kirap nogut long lukim pasin wanbel na pasin bilong toktok gut i stap namel long ol Witnes. Ol i lainim mi olsem God i gat nem na dispela i mekim mi amamas. (Song 83:18) Na tu, ol i soim mi long tok bilong Baibel long 1 Timoti 4:8, em i tok: “Pasin bilong kisim trening long bodi inap helpim yu liklik, tasol pasin bilong givim bel tru long God inap helpim yu long olgeta samting. Em i gat promis long laip bilong nau na long laip bilong bihain.” Ol dispela tok i senisim tru i stap bilong mi.

Tasol mi no bung moa wantaim ol Witnes, long wanem, famili bilong mi i stopim mi long stadi. Maski i olsem, mi pasim tok long bel olsem mi no ken insait moa long pait kung-fu, na mi mas kirap long stadi long Baibel. Ol brata bilong mi i no amamas long disisen bilong mi, tasol mi tingting strong long painim ol Witnes Bilong Jehova na bai ol i ken stadi wantaim mi long Baibel.

Mi wok long painim ol Witnes, tasol mi no bungim wanpela bilong ol. Long wankain taim, papa bilong mi i dai na dispela i mekim na mi bel hevi tru, na tu, ol narapela hevi i painim famili bilong mi. Mi wok long wanpela konstraksen kampani na wanpela taim wanwok bilong mi, nem bilong em Adel, i askim mi long as na mi save bel hevi. Em i stori long mi long tok promis bilong Baibel long kirap bek. Inap 9-pela mun, dispela Witnes husat i gat pasin laikim i stadi wantaim mi long Baibel.

Taim mi stadi, mi luksave olsem mi mas senisim ol pasin bilong mi. I hatwok long mekim olsem. Mi save belhat hariap taim wanpela i bagarapim bel bilong mi. Tasol Baibel i helpim mi long bosim pasin bilong mi long belhat na mi no ken pait hariap. Olsem, long Matyu 5:44, Jisas i tok: “Yupela i mas laikim yet ol birua bilong yupela na beten long ol man i save mekim nogut long yupela.” Na Rom 12:19 i tok lukaut olsem: “Ol pren tru, yupela i no ken bekim rong man i mekim long yupela, . . . Rait Holi i tok: ‘Jehova i tok, bekim rong, em wok bilong mi. Bai mi bekim.’” Ol dispela skripsa na ol arapela tok bilong Baibel tu i helpim mi long kisim pasin bilong i stap bel isi na amamas.

Nau famili bilong mi i rispektim ol Witnes Bilong Jehova, maski pastaim ol i no amamas long disisen bilong mi long stadi wantaim ol. Na tu, wanpela brata bilong mi i kamap Witnes, na mama i sapotim bilip bilong mipela i go inap long taim em i dai.

Mi amamas tu olsem mi gat gutpela poroman marit, em Anita. Mitupela i mekim wok bilong God fultaim. Long yia 2000, mitupela Anita i go sindaun long Eskilstuna, long Swiden. Long dispela hap mipela i skulim ol man i mekim tok Arabik long tok bilong Baibel.

Mi save bel hevi long lukim ol man husat i karim hevi long pasin bilong pait na bagarapim man. Tasol nau mi save long as na ol dispela pasin i stap, na tu, mi save olsem klostu nau God bai pinisim ol dispela pasin nogut. Dispela i givim mi bel isi na mi stap amamas.—Song 37:29.