God Jehova a em God i gat olgeta strong na em i Krieta bilong olgeta samting, olsem na planti man i ting olsem Em i as bilong olgeta hevi i kamap long graun. Tasol skelim tok Baibel i mekim long God:

•   “God i save bihainim stretpela pasin.”—Song 145:17.

•   “Em [God] i olsem wanpela bikpela strongpela ston i no save senis. Oltaim em i save bihainim tok bilong en na em i no save giaman. Na pasin bilong en i gutpela na stretpela tasol.”—Lo 32:4.

•   “Jehova i gat pasin bilong sori tru na marimari.”—Jems 5:11.

God i no as bilong ol hevi i kamap. Yu ting em i save kirapim ol man long mekim pasin nogut? Nogat tru. Baibel i tok: “Taim traim i painim wanpela man, em i no ken tok: ‘God i traim mi.’” Bilong wanem? Long wanem, “ol samting nogut i no inap traim God, na tu, God i no save traim man.” (Jems 1:13) God i no save traim o kirapim ol man long mekim ol pasin nogut. Na tu, Em i no save kamapim ol hevi o kirapim ol man long mekim nogut long narapela. Olsem na husat i as bilong ol hevi?

Baibel i kamapim wanpela as na ol hevi i painim ol man, em i tok: “Taim nogut i save painim yumi olgeta.” (Saveman 9:11) Man i kisim bagarap long ol eksiden samting bikos long dispela taim stret em i stap long hap we eksiden i kamap. Klostu 2,000 yia i go pinis, Krais Jisas i stori long wanpela eksiden i kamap na i kilim i dai 18 manmeri. (Luk 13:1-5) Ol pasin ol i mekim i no as na ol i kisim bagarap, nogat. Ol i kisim bagarap bikos ol i stap aninit long taua taim taua i pundaun. Long Janueri 2010, wanpela bikpela guria i kamap long Haiti. Gavman bilong Haiti i tok winim 300,000 manmeri i bin dai long dispela taim. Olgeta dispela manmeri i dai maski ol i gat narapela narapela krismas na sindaun. Na tu, sik inap painim man long taim em i no ting long en.

Ating sampela bai givim kain askim olsem: ‘Yu ting God inap pasim ol hevi long painim yumi? Em inap lukautim ol gutpela man na hevi i no inap painim ol?’ Bilong God i ken helpim ol man, pastaim em i mas save long ol hevi bai kamap. Em tru olsem God i save long ol samting bai kamap bihain, tasol yumi laik skelim dispela askim: Yu ting God inap yusim strong na save bilong em long kamapim ol samting em i laik mekim?—Aisaia 42:9.

Baibel i tok: “God bilong yumi i stap long heven. Sapos em i laik mekim wanpela samting, orait em i save mekim tasol.” (Song 115:3) Tasol dispela i no makim olsem Jehova i save mekim  olgeta samting em i laik mekim, nogat, em i save skelim gut ol samting na makim wanem samting em i mas mekim. Dispela inap makim tu ol samting bai kamap bihain. Olsem, taim pasin nogut i go bikpela long Sodom na Gomora, God i tokim bilipman Abraham, olsem: “Bai mi go daun na lukim pasin ol dispela manmeri i mekim. Na bai mi ken save, ol dispela tok mi harim pinis, em i tru o nogat.” (Stat 18:20, 21) Inap sampela haptaim, Jehova i no tingim pasin nogut bilong ol man insait long ol dispela siti. Dispela i soim olsem Jehova inap wokim disisen olsem em bai no tingim olgeta samting i kamap. (Stat 22:12) Tasol dispela i no makim olsem God i gat sin na em i nogat strong, nogat. “Ol wok bilong em i nambawan olgeta,” olsem na God inap save long ol samting bai kamap bihain na ol samting em i tingting pinis long mekim, na em i no save fosim ol man long mekim ol samting. b (Lo 32:4, NW) Dispela i skulim yumi long wanem samting? God inap yusim save bilong em long ol samting bai kamap bihain long makim wanem samting em bai mekim.

Ol man i as bilong sampela hevi i save kamap. Lukim tok Baibel i mekim long samting inap kirapim man long mekim pasin nogut. Em i tok: “Laik bilong bel bilong olgeta man wan wan i save traim ol, dispela laik i save giamanim ol na pulim ol. Na taim dispela laik i stap long bel i kamap bikpela, em i save kamapim sin, na taim sin i kamap pinis, em i save bringim dai i kam.” (Jems 1:14, 15) Taim ol man i bihainim ol laik nogut bilong bel, dispela inap kamapim hevi. (Rom 7:21-23) Ol samting i kamap long bipo i soim olsem ol manmeri yet i as bilong ol pen na hevi. Na tu, ol man nogut inap kirapim ol narapela long bihainim pasin bilong ol, na dispela i mekim na pasin nogut i go bikpela.—Sindaun 1:10-16.

Yu ting God i mas pasim ol man long mekim pasin nogut? Skelim tok bilong Baibel long hau God i wokim man. Baibel i tok God i wokim man olsem Em yet, olsem na ol man inap kamapim ol pasin bilong God. (Stat 1:26) Ol inap makim wanem samting ol bai mekim, olsem ol bai laikim God na stap gut long em o nogat. (Lo 30:19, 20) Sapos God i fosim ol man long bihainim laik bilong em, i kain olsem em i pasim ol long yusim dispela gutpela presen bilong ol long mekim disisen bilong ol yet. God i no wokim ol man olsem masin em ol i programim na bai ol i bihainim laik bilong em! Na dispela i wankain tu sapos God i makim pinis ol samting yumi bai mekim o ol samting bai painim yumi. Tasol yumi amamas olsem God i tingim yumi taim em i larim yumi long  mekim disisen bilong yumi! Dispela i no makim olsem ol hevi ol man i kamapim na ol disisen nogut ol i mekim bai givim hevi oltaim long ol.

Sapos yu givim dispela askim i stap long fran pes bilong dispela nius long wanpela man i bilong lotu Hindu o Buda, ating yu bai harim kain bekim olsem: “Ol hevi i painim ol gutpela man, long wanem, long narapela laip bilong ol, ol i bin mekim sampela pasin nogut olsem bilip Karma i makim.” c

I gutpela long skelim bilip Karma wantaim tok Baibel i mekim long samting i painim man taim em i dai. Long gaden Iden, taim God i wokim fes man na meri, Em i tokim Adam olsem: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:16, 17) Sapos Adam i no sakim tok bilong God, em bai stap laip oltaim. Tasol em i bikhet na long dispela rot em i mekim sin. Em as na “dai i painim olgeta manmeri.” (Rom 5:12) Olsem na yumi ken tok “pe bilong sin em dai.” (Rom 6:23) Na tu, Baibel i tok: “Man i dai pinis, em i bekim pinis pe bilong ol sin bilong em.” (Rom 6:7) Pe bilong sin em dai, olsem na taim man i dai, em i nogat sin moa.

Planti milion manmeri long nau i ting olsem bilip Karma i as bilong ol pen na hevi i painim ol man. Man i bilip long dispela em bai i no bel hevi taim pen na hevi i painim em. Tasol dispela bilip i no pinisim ol hevi. Na tu, ol man i bilip long Karma i ting olsem bilong ol man i ken stap gut ol i mas bon gen, dispela i makim olsem ol bai kisim nupela pasin na save. Tasol dispela tingting i no wankain long tok bilong Baibel. d

As tru bilong ol pen na hevi em Satan. Pastaim em i wanpela gutpela ensel bilong God, tasol bihain “em i no holimpas tok i tru” na dispela i kamapim sin long graun. (Jon 8:44) Em i kirapim fes man na meri long sakim tok long gaden Iden. (Stat 3:1-5) Krais Jisas i kolim em olsem “dispela man nogut” na “hetman bilong dispela graun.” (Matyu 6:13, futnot; Jon 14:30) Olsem na ol manmeri i bihainim pasin bilong Satan na sakim rot Jehova i makim. (1 Jon 2:15, 16) Long 1 Jon 5:19, Baibel i tok: “Dispela graun olgeta i stap long han bilong Satan.” I gat sampela ensel tu i bin bihainim Satan na kamap ol ensel nogut. Baibel i stori olsem Satan na ol spirit nogut “i save giamanim olgeta manmeri bilong graun,” na Baibel i tok tu olsem, “yu graun na yu solwara, yupela lukaut.” (Revelesen 12:9, 12) Olsem na yumi ken tok Satan i as tru bilong olgeta pen na hevi i painim ol man long nau.

I klia tru olsem God i no as bilong olgeta pen na hevi i save painim ol man. Em i tok promis olsem em bai pinisim ol pasin nogut. Atikol i kamap bihain bai stori long dispela.