Yu laik save long samting bai painim yu bihain? Planti man i laik save long dispela. I gat planti man husat i save tokaut long ol samting bai kamap bihain, sampela taim tok bilong ol i kamap tru, tasol planti taim nogat. Skelim tok sampela i mekim:

• OL SAIENTIS i save yusim ol masin samting na tromoi bikpela mani bilong tokaut long samting bai kamap bihain, olsem samting polusen bai mekim long graun na tumora ren bai pundaun long hap yu stap long en o nogat.

• OL SAVEMAN BILONG SKELIM OL SAMTING i tokaut long ol samting bai kamap long wok bisnis na wok politik. Warren Buffett em wanpela bisnisman i gat planti mani tru na em inap tokaut long ol samting bai kamap long sait bilong wok bisnis, olsem na sampela i tok em i profet. Wanpela saveman, Nate Silver, i save skelim gut ol ripot na namba, na dispela i helpim em long tokaut long ol samting bai kamap long wok politik bilong Amerika na husat bai kisim ol muvi prais bilong Hollywood.

• OL RAIT BILONG BIPO i olsem ol tok profet. Sampela man i ting ol rait bilong Michel de Notredame (Nostradamus) long yia 1500 samting i kamap tru long nau. Kalenda bilong ol Maya i pinis long Disemba 21, 2012, na sampela i ting dispela i makim olsem ol bikpela bagarap bai kamap.

• OL BIKMAN BILONG LOTU i save tokaut long ol bikpela bagarap bai kamap bilong tok lukaut long ol man na bringim ol man i kam long sios. Harold Camping na ol disaipel bilong em i tokaut long planti hap olsem dispela graun bai bagarap long 2011. Tasol yumi save, dispela graun i stap yet.

• OL GLASMAN i tok ol i gat save long tokaut long samting bai kamap bihain. Edgar Cayce na Jeane Dixon i bin tokaut long sampela samting i kamap tru long yia 1900 samting. Tasol planti samting tupela i bin tokaut long en i no kamap tru. Olsem, Dixon i bin tokaut olsem Wol Woa 3 bai kamap long yia 1958, na Cayce i tokaut olsem solwara bai karamapim New York long 1975 samting.

Yu ting i gat wanpela gutpela rot bilong tokaut long ol samting bai kamap bihain? Em wanpela gutpela askim. Sapos yu save long ol samting bai kamap bihain, dispela bai senisim ol samting yu mekim long i stap bilong yu.