Mi bon long Bilbao long noten Spen. Famili bilong mipela i gat 4-pela pikinini, na mi namba 2 pikinini. Mipela i strongpela Katolik, na mi save go long Misa long olgeta de. Taim mi gat 23 krismas, mi kamap tisa—em wanpela wok mi laikim tru na mi mekim inap 40 yia. Mi amamas long skulim ol pikinini long bilip bilong lotu Katolik na ol narapela samting tu. Long nait mi mekim wok katekis—mi skulim ol pikinini meri long kisim fes komiunio bilong ol.

Mi bin marit inap 12-pela yia na man bilong mi i dai, olsem na mi gat wok long lukautim 4-pela pikinini meri bilong mi. Mi gat 33 krismas tasol! Mi traim long painim bel isi long lotu Katolik, tasol mi gat ol askim mi save tingting long en planti taim. Mi tingting: ‘Wai na ol man i dai sapos Krais i dai bilong baim bek yumi? Wai na yumi beten long Kingdom Bilong God i mas i kam sapos ol gutpela man i go long heven?’ Na bikpela samting moa, mi tingting: ‘Sapos God i skelim yumi taim yumi dai, bilong wanem bihain yumi mas lusim heven, klinpaia, o hel bilong God i ken skelim yumi long laspela kot?’

Mi kamapim ol dispela askim long sampela pris mi bungim. Wanpela i tok: “Mi no save. Askim bisop. Mi no ting dispela i bikpela samting. Yu bilip long God? Dispela em inap.” Tasol mi wok yet long painim ol bekim. Bihain, mi go harim tok bilong ol Jesuit, Pentikostal, na Nostik. Tasol i no gat wanpela husat inap bekim gut ol askim bilong mi.

Taim mi gat 65 krismas samting, wanpela sumatin i gat 7-pela krismas i singautim mi long kam long miting bilong ol Witnes Bilong Jehova. Mi laikim ol samting mi lukim na harim, tasol mi save bisi olsem na mi no bung moa wantaim ol Witnes long dispela taim. Inap 2-pela yia bihain, tupela marit Kristen em Juan na Maite, ol i paitim dua long haus bilong mi. Inap 3-pela mun, ol i bekim ol askim bilong mi, na bihain mi kirap stadi long Baibel.

Mi save luk fowad long olgeta taim bilong stadi! Mi mekim  gut wok painimaut long olgeta samting, mi yusim 3-pela narapela narapela Baibel bilong save olsem tok ol Witnes Bilong Jehova i lainim mi i tru o nogat. I no longtaim na mi luksave olsem inap planti yia tru tingting bilong mi i bin paul long ol samting bilong lotu. Ol bilip bilong mi long bipo na ol samting mi lainim long Baibel i narapela kain olgeta, na mi tingting planti long dispela. Mi pilim olsem mi mas senisim olgeta bilip bilong mi, i olsem mi kamautim wanpela diwai em ol rop bilong en i go insait tru long graun.

Bihain, namba 2 man bilong mi i kisim bikpela sik na em i dai. Long dispela taim, mi ritaia long wok bilong mi na lusim Bilbao inap sampela haptaim. Juan na Maite tu i go sindaun long narapela hap. Sori tru, mi no stadi moa long Baibel. Tasol long bel bilong mi, mi save olsem mi bin painim gutpela samting tru. Mi no inap lusim tingting long en.

Inap 20 yia bihain, taim mi gat 82 krismas, Juan na Maite i kam bek long Bilbao na ol i kam lukim mi. Mi amamas tru long lukim ol gen! Mi luksave olsem Jehova i no bin lusim tingting long mi, na mi kirap stadi gen. Juan na Maite i no les kwik long mi, maski planti taim mi mekim ol wankain askim. Mi nid long harim ol stretpela tok bilong Baibel planti taim bambai mi inap lusim ol olpela bilip bilong mi. Na tu, mi laik bai mi inap eksplenim gut tok i tru long ol pren na famili bilong mi.

Amamas mi pilim long de mi kisim baptais i winim olgeta narapela de long laip bilong mi. Mi gat 87 krismas long dispela taim na mi kisim baptais long wanpela kibung bilong ol Witnes Bilong Jehova. Wanpela elda Kristen i mekim tok bilong Baibel i go stret long ol lain i laik kisim baptais. Dispela tok i mekim mi krai. Mi putim gut yau long tok, na i olsem Jehova yet i toktok long mi. Bihain long mi baptais, planti Witnes i kam na tok amamas long mi, maski planti bilong ol i no bin bungim mi bipo!

Oltaim mi bin save olsem Jisas Krais em “rot.” (Jon 14:6) Tasol long rot bilong Baibel stadi mi kisim save long Jehova, em man Jisas i kisim yumi i go long em. Nau mi ken prea long God olsem gutpela Papa na Pren bilong mi. Taim mi ritim buk Go Klostu Long Jehova, a dispela i senisim tru laip bilong mi. Namba 1 taim mi ritim dispela buk, mi pinisim buk long wanpela nait! Mi pilim tru bikpela pasin marimari bilong Jehova.

Taim mi tingim bek long ol yia mi bin painim tok i tru, mi tingim tok bilong Jisas: “Wok yet long askim, na yupela bai kisim. Wok yet long painim, na yupela bai lukim. Wok yet long paitim dua, na dua bai op long yupela.” (Matyu 7:7) Mi painim pinis bekim bilong ol askim bilong mi, na mi amamas tru long serim ol dispela tok wantaim ol narapela man.

Mi gat 90 krismas, tasol i gat planti samting long Jehova mi mas kisim save yet long en. Olgeta miting mi go long en long Haus Kingdom i spesel tru—mi kisim gutpela save tru na bung wantaim ol brata na sista bilong mi. Mi gat bikpela laik long mekim wok tisa long Paradais em God i promis long kamapim. (Revelesen 21:3, 4) Mi wet long lukim ol famili bilong mi i dai pinis bai kisim laip gen, na mi ken skulim ol long tok i tru bilong Baibel. (Aposel 24:15) Mi gat bikpela laik tru long tokim ol long gutpela presen tru Jehova i givim long mi taim mi lapun!