Taim yu lukluk raun, ai na kru bilong yu i wok wantaim long kisim save long ol samting. Yu lukim wanpela prut na yu wokim tingting olsem bai yu kaikai o nogat. Yu lukim skai na yu luksave bai i no gat ren tude. Yu lukim ol wed nau yu ritim na yu save long mining bilong tok. Dispela i makim olsem kala i mekim sampela samting long yu.

Kala bilong prut yu lukim i helpim yu long luksave olsem prut i mau na i redi long kaikai. Kala bilong skai na ol klaut i helpim yu long save long weda. Taim yu ritim ol tok i stap long dispela atikol, long wankain taim ai bilong yu i luksave olsem kala bilong ol wed i narapela kain long kala bilong pes. Yu no luksave, tasol planti taim kala i helpim yu long kisim save long ol samting i kamap long dispela graun. Tasol kala inap mekim sampela samting tu long bel na tingting bilong yu.

Taim yu wokabaut i go insait long stua, yu bai lukim olsem i gat kain kain kaikai samting i gat kala bilong pulim ai bilong yu. Ating yu no luksave, tasol ol man bilong edvetaisim samting i save skelim gut na makim ol kala bilong ol samting ol i laik salim na bai i stret long ol man o ol meri, long laik bilong ol, na long krismas bilong ol. Ol man bilong bilasim haus, wokim disain bilong klos, na droim piksa, ol tu i save olsem ol kala inap kirapim man long baim samting.

Ol man i gat narapela narapela tingting long ol kala bikos long kalsa na kastam bilong ol. Olsem long Esia, sampela i ting kala ret i makim ol gutpela samting bai kamap bihain na taim bilong selebresen, tasol long sampela hap bilong Afrika, kala ret i makim taim bilong krai sori. Maski ol man i kamap bikpela long narapela narapela sindaun, i gat sampela kala we i save mekim wankain samting long bel na tingting bilong ol. Yumi ken skelim 3-pela kala na samting ol inap mekim long bel na tingting bilong yu.

RET em kala we isi tru long lukim. Planti taim kala ret i makim strong, woa, na samting nogut inap painim man. Em wanpela kala we i save mekim bikpela samting long bel na tingting bilong ol man, na i save mekim ol kemikal long bodi bilong man i wok hariap tru, klok i pam strong, na presa bilong blut i go antap.

Long Baibel, tok Hibru ol i tanim olsem “ret” i kam long wanpela tok i makim “blut.” Baibel i yusim kala ret bilong helpim ol man long tingim wanpela pamukmeri i werim pepol na retpela klos na sindaun antap long “wanpela retpela wel animal . . . i pulap long ol nem i tok bilas long God.”—Revelesen 17:1-6.

GRIN em kala we i save mekim ol kemikal long bodi bilong man i wok isi na dispela i mekim man i stap belgut na i stap isi. Grin em i gutpela kala na i save mekim man i stap bel isi. Yumi pilim bel isi taim yumi lukim ol gaden i grin na ol sait bilong maunten i grin. Buk Stat i tok God i wokim olgeta samting na i wokim gras na diwai samting i grinpela bilong ol man i ken amamas long en.—Stat 1:11, 12, 30.

WAIT em kala we planti taim i makim lait, seifti, na samting i klin tru. Na tu, em i makim gutpela pasin, no gat asua, na gutpela olgeta. Planti taim Baibel i stori long waitpela kala. Baibel i stori long ol driman we ol man na ol ensel i werim waitpela klos na dispela i makim stretpela pasin na  pasin i holi tru. (Jon 20:12; Revelesen 3:4; 7:9, 13, 14) Ol waitpela hos i gat ol man i werim waitpela klos i sindaun antap long en i makim stretpela pait. (Revelesen 19:14) God i yusim dispela kala wait bilong strongim yumi olsem em i redi long fogivim ol rong bilong yumi, em i tok: “Maski yupela i gat planti sin, na yupela i stap olsem waitpela laplap em retpela pen i bagarapim pinis, mi Bikpela, mi tok, bai yupela inap kamap waitpela gen olsem ais.”—Aisaia 1:18.

Baibel i kolim ol kala bilong soim olsem God i kliagut long samting ol man i pilim long bel na tingting taim ol i lukim ol kala. Olsem, Buk Revelesen i tok profet long ol samting i painim yumi long nau olsem woa, bikpela hangre, na ol man i dai long bikpela hangre na bikpela sik. Bilong helpim yumi tingim dispela, Baibel i stori long wanpela narakain driman we ol man i sindaun antap long ol hos—em ol hos i gat narapela narapela kala.

Pastaim i gat wanpela waitpela hos na em i makim stretpela pait bilong Krais Jisas. Bihain i gat narapela hos i kam em kala bilong em i retpela na em i makim pait namel long ol kantri. Narapela hos i kam bihain long dispela hos na kala bilong em i blakpela na i makim bikpela hangre. Na bihain i gat “wanpela yelopela hos. Na man i sindaun long en, nem bilong en Dai.” (Revelesen 6:1-8) Kala bilong ol dispela hos inap kirapim yumi long tingim ol samting em ol hos i makim. Em i isi long yumi tingim kala bilong ol dispela hos na samting ol dispela kala i makim we i kamap long taim bilong yumi.

Planti taim Baibel i kolim ol kala bilong helpim yumi long piksaim klia ol samting long tingting. Man Bilong Wokim lait, kala, na ai bilong ol man, em i yusim gut kala bilong mekim ol tok piksa bilong skulim ol man na bai isi long ol man i ken kliagut long en na holim long tingting. Kala i helpim yumi long kisim save na yusim dispela save yumi kisim. Kala i mekim sampela samting long bel na tingting bilong yumi. Na tu, kala inap helpim yumi long tingim bek ol bikpela samting. Kala em gutpela presen i kam long Man Bilong Wokim yumi na i bilong helpim yumi long kisim amamas long i stap bilong yumi.