YU TING Jehova i luksave long ol hatwok ol wokman bilong em i mekim bilong amamasim em? Yes, em i luksave long dispela samting! Tasol em i lukim sampela samting moa na em i no lukim tasol gutpela pasin na ol tok ol i mekim bilong litimapim nem bilong em. Em i luksave tu taim ol i tingim tru ol gutpela samting em i mekim. Na moa yet, Jehova i no inap lusim tingting long ol manmeri bilong em na ol wok ol i mekim. Olsem wanem yumi save long dispela? Bekim bilong en i stap long ol tok bilong profet Malakai.—Ritim Malakai 3:16.

Long yia 400 B.C.E., taim Malakai i mekim tok profet, pasin na lotu bilong lain Israel i bin i go nogut moa. Ol pris i no mekim wok bilong ol na ol manmeri i kirap long mekim ol pasin i bagarapim nem bilong God olsem wok glasman, adaltri, na giaman na paulim mani bilong ol man. (Malakai 2:8; 3:5) Maski i gat ol dispela pasin nogut i stap, i gat sampela Israel i bin stap gut long God. Ol i bin mekim wanem?

Malakai i tok: “Ol manmeri i save stap aninit long Bikpela na i harim tok bilong en, ol i toktok long ol yet.” Pasin bilong aninit long God em wanpela gutpela pasin. Long dispela ves, Malakai i stori long lain Israel em ol i gat bikpela rispek tru long Jehova na ol i pret long mekim pasin God i no laikim. Baibel i tok ol manmeri i stap aninit long God i “toktok long ol yet.” I luk olsem ol i bung wantaim bilong stori long ol gutpela samting bilong Jehova, na long strongim narapela narapela bambai ol i no bel hevi o kisim ol dispela pasin nogut.

Ol Israel husat i stap gut long God i soim olsem ol i rispek long Jehova long narapela rot: Ol i “tingting long em oltaim.” Narapela Baibel i tok, “litimapim nem bilong Em.” Dispela ol manmeri i save aninit long Bikpela ol i onarim Jehova long tingting bilong ol tu. Long bel bilong ol, ol i save tingim tru o tingting long Jehova na biknem bilong em. Yu ting Jehova i save long samting ol i mekim?

Malakai i tok: “Bikpela i harim toktok bilong ol.” Long gutpela ples bilong em long heven, Jehova i putim gut yau na harim olgeta gutpela tok, em ol man i lotuim em i mekim long narapela narapela bilong litimapim nem bilong em. Na tu, em i save tingim tru samting ol i pilim long bel. (Song 94:11) Tasol em i no luksave nating long gutpela tok na tingting bilong ol, nogat, em i mekim sampela samting moa.

Malakai i tok moa olsem: “Long heven ol i raitim wanpela buk i gat nem bilong ol manmeri.” Dispela buk i gat olgeta nem bilong ol manmeri husat i mekim wok bilong Jehova na stap gut long em. Ol i kolim dispela buk olsem “buk i gat nem bilong ol manmeri.” a Dispela i kamapim klia olsem Jehova i no inap tru long lusim tingting long ol wokman bilong em na olgeta samting ol i mekim bilong litimapim nem bilong em, em olgeta gutpela pasin, toktok, na tingting bilong ol. I gat as na God i tingim ol. Em i tok promis long givim laip oltaim long ol manmeri em nem bilong ol i stap long buk bilong em. b—Song 37:29.

Yumi amamas tru long save olsem Jehova i save tingim tru olgeta samting yumi mekim bilong lotuim em long pasin em i laikim! Ol tok bilong Malakai 3:16 inap kirapim yumi long tingim gut pasin bilong yumi long pas gut wantaim Jehova. I gutpela yumi askim yumi yet olsem, ‘Nem bilong mi i stap long buk bilong God?’ Yumi ken tok yes sapos yumi traim bes long mekim ol samting na bai ol pasin, toktok, na tingting bilong yumi long olgeta wan wan de i stret wantaim laik bilong Jehova.