EM MONING long wanpela hap bilong Wes Afrika. Win i karim smel bilong rais na bilong ol sos i boil. Ol meri i karim hevipela samting long het na wokabaut. Nois bilong ol man i lap na bilong ol man i singaut bilong salim ol samting. Kwiktaim san bilong moningtaim i kamap hat pinis.

Taim ol pikinini i lukim wanpela Yovo o waitman, ol i save singsing na danis. Ol i kirapim singsing olsem, “Yovo, Yovo, bon soir” na pinisim olsem, “Bai yu givim presen long singsing mipela i mekim?” Wanpela mangi i no singsing. Taim mi wokabaut i go, em i bihainim mi na wokim sain long han. I luk olsem em i mekim tokples sain. Long Amerika, mi lain long mekim tokples sain bilong Amerika (ASL), tasol Benin em kantri we ol man i save mekim tok Frans.

Mi hatwok long sainim 8-pela leta bilong nem bilong mi. Pes bilong em i lait na em i smail. Em i holim han bilong mi na kisim mi i go long wanpela liklik strit i go long haus bilong em, em wanpela brik haus i gat tupela rum slip. Famili bilong em i kam bung na olgeta i mekim tokples sain. Nau bai mi mekim wanem? Mi sainim nem bilong mi na raitim tok olsem mi misineri na mi save skulim ol man long Baibel na bai mi kam bek. Sampela neiba i no yaupas, ol i joinim mipela na ol i nodim het bilong ol bilong soim olsem ol i wanbel. Mi tingting, ‘Mi mekim wanem samting nau?’

Long haus mi wok long tingting, ‘I mas i gat wanpela man husat inap helpim ol dispela manmeri long kisim save long tok promis bilong God, olsem: “Ol yaupas bai ol i harim toktok.”’ (Aisaia 35:5) Mi mekim sampela wok painimaut. I no longtaim i go pinis, sensas i tok i gat 12,000 yaupas na ol man i gat hevi long harim gut tok long Benin. Mi kirap nogut tru taim mi save olsem ol i yusim tokples sain bilong Amerika (ASL) long skul bilong ol yaupas na i no tokples sain bilong Frans. Sori tru, i no gat wanpela Witnes Bilong Jehova long Benin i save long ASL. Mi tokim wanpela Witnes long hap olsem, “Mi laik bai wanpela husat i save long tokples sain bilong Amerika i ken kam na helpim yumi.” Em i tok: “Yu stap pinis ya!” Em i tok stret! Mi odaim wanpela buk bilong lainim mi yet na DVD bilong ASL em ol Witnes Bilong Jehova i wokim. I olsem mi  kisim bekim bilong beten bilong mi taim wanpela Witnes i save gut long ASL i lusim Kamarun na i kam sindaun long Benin.

Planti man i harim stori olsem mi lainim tokples sain. Ol i tokim mi long visitim Brice, em wanpela man bilong peintim ol sain. Ples wok bilong en em wanpela haus ol i wokim long ol lip bilong diwai pam em ol i samapim wantaim, na win i save ron gut long en long taim bilong san. Inap planti yia em i save rapim peint bras long wol bilong haus long klinim bras, olsem na wol i gat planti kain kala long en. Em i klinim ol sia na em i lukluk long mi, i olsem em i tokim mi long stat. Mi putim DVD long liklik pleia. Em i kisim sia bilong em i kam klostu long dispela DVD pleia. Em i mekim sain na i tok: “Mi save long dispela! Mi save long dispela!” Ol pikinini long neiba i kam na traim long lukim wanem samting i wok long kamap. Wanpela i tok: “Wai na ol i watsim muvi i no gat saun?”

Olgeta taim mi save go bek long lukim Brice, planti manmeri moa i save kam bilong watsim DVD. I no longtaim, Brice na ol narapela i kirap kam long ol miting Kristen bilong mipela. Mi traim long tanim tok long ol long tokples sain na dispela i helpim mi long lain gut moa. Taim grup i wok long i go bikpela, sampela tu i kam painim mi. Olsem: Wanpela taim kar bilong mi i bamim pothol na mekim bikpela nois taim mi laik abrusim ol meme na ol pik long rot. Bihain i gat bikpela pairap long sait bilong kar. Mi ting, ‘Ating kar i bagarap gen!’ Tasol nogat, em wanpela yaupas man husat i laik bai mi lukim em, olsem na em i kam paitim sait bilong kar!

I gat ol grup bilong ASL long ol narapela taun. Taim i gat hap bilong tokples sain long kibung bilong mipela, mi wanpela bilong ol lain i save tanim tok long ol yaupas. Taim mi go long pletfom na wetim man bilong mekim tok long kirapim tok, mi tingim fes taim mi bin lain long mekim tokples sain long hap mi wok misineri long en. Mi tingting, ‘Wanem samting moa mi inap mekim olsem wanpela misineri long Afrika?’ Mi lukim odiens na mi save long bekim bilong dispela askim—mi stap olsem misineri husat inap helpim ol yaupas. Mi no moa askim mi yet olsem: ‘Mi mekim wanem samting nau?’