▪ Ol man inap kamapim kain askim olsem, long wanem, i no gat wanpela lo stret long Baibel i kolim smok tabak. Yu ting dispela i makim olsem i hatwok long save long tingting bilong God long dispela samting? Nogat tru.

Baibel i tok: “God em i as bilong olgeta tok i stap long Rait Holi.” (2 Timoti 3:16) Baibel i gat ol stiatok na ol narapela tok we i kamapim klia samting God i laik yumi mas mekim bilong lukautim helt bilong yumi. Pastaim, yumi ken skelim tok em ol man bilong mekim wok painimaut i kisim save long en long samting smok tabak inap mekim long helt bilong ol man. Bihain, bai yumi skelim olsem wanem ol stiatok bilong Baibel i stret wantaim ol samting ol saveman i painimaut.

Tabak i save bagarapim helt bilong ol man i smok na em i nambawan samting i kilim i dai planti man. Long Amerika, smok tabak i save kilim i dai 1-pela long olgeta 5-pela 5-pela man. Wanpela ripot bilong lain National Institute on Drug Abuse i tok, long dispela kantri smok tabak i save kilim i dai planti manmeri long olgeta wan wan yia, “winim namba bilong ol man i dai long alkohol, drak, kilim i dai narapela man, suasaid, kar eksiden, na AIDS.”

Ol man i smok tabak ol i bagarapim ol narapela. Man inap kisim bagarap maski em i pulim bikpela o liklik smel tasol bilong smok. Ol man i no save smok, tasol sapos ol i pulim win bilong smok bilong narapela man, inap 30 pesen bilong kain man olsem inap kisim kensa bilong waitlewa na ol narapela sik bilong klok. Long ol yia i no longtaim i go pinis, ol dokta i painimaut olsem smok i pas long klos, dispela inap nogutim helt bilong ol man. Dispela i makim olsem wanpela kain kemikal nogut i save stap yet antap long klos, kapet, na ol narapela samting taim smok i pinis. Dispela kemikal nogut inap bagarapim moa yet helt bilong ol pikinini na mekim kru bilong ol i no wok gut long lainim samting.

Tabak inap kalabusim man. Smok tabak i mekim na man bilong smok i stap olsem wokboi nating bilong dispela pasin we inap bagarapim em. Ol man bilong mekim wok painimaut i kisim save olsem man i kalabus long nikotin, em wanpela kemikal long smok tabak, em bai hatwok tru long lusim dispela pasin.

Olsem wanem ol stiatok bilong Baibel i stret wantaim ol dispela tok em yumi stori pinis long en? Tingim ol dispela samting:

God i laik yumi mas rispek long laip. Long Lo em God i givim long lain Israel, em i kamapim klia olsem ol manmeri husat i laik mekim God i belgut, ol i mas rispektim laip bilong man. (Lo 5:17) Ol Israel i mas wokim wanpela banis i raunim arere bilong rup bilong haus bilong ol. Bilong wanem? Ol rup bilong haus i flet na em i ples we ol man i save sindaun long en. Dispela banis i lukautim famili na ol narapela bambai ol i no ken pundaun na kisim bagarap o indai. (Lo 22:8) Na tu, ol Israel i mas bosim gut ol animal bilong ol na bai ol i no bagarapim ol narapela man. (Kisim Bek 21:28, 29) Man husat i save smok, em i sakim ol stiatok i stap olsem as bilong ol dispela lo. Long laik bilong em yet em i bagarapim helt bilong em. Na moa yet, pasin bilong em long smok i bagarapim helt bilong ol man i stap klostu long em.

God i laik yumi mas laikim em na laikim ol arapela man. Jisas Krais i tok ol disaipel bilong em i mas bihainim tupela bikpela lo. Ol i mas laikim God long bel olgeta, laip olgeta, tingting olgeta, na strong olgeta na laikim ol narapela olsem ol i laikim ol yet. (Mak 12:28-31) Laip em i presen i kam long God, olsem na man husat i smok, em i soim olsem em i no gat rispek liklik long dispela presen na em i no gat pasin bilong laikim God. (Aposel 17:26-28) Pasin bilong dispela man i bagarapim ol narapela i stap klostu long em, olsem na sapos em i tok em i laikim ol narapela, orait dispela tok bilong em i no tru.

God i laik bai yumi abrusim ol pasin doti. Baibel i tokim ol Kristen long ol i mas rausim “olgeta pasin doti bilong skin na bilong tingting.” (2 Korin 7:1) Pasin bilong smok tabak i save mekim man i kamap doti. Ol manmeri em ol i laik lusim pasin bilong smok bambai ol i ken amamasim God, ol i save pilim olsem i hatwok tru long mekim olsem. Tasol God inap helpim ol long lusim dispela pasin doti em ol i kalabus long en.