Yu Ting Ol Bekim i Bikpela Samting?

“Yupela bai save long tok i tru, na tok i tru bai mekim yupela i kamap fri.”—JON 8:32.

BAIBEL i gat tok i tru bilong helpim yumi long kamap fri long ol bilip giaman ol man i mekim long Jisas. Tasol yu ting bilip yumi gat long Jisas em i bikpela samting? Yes. Em i bikpela samting long Jehova. Em i bikpela samting long Jisas. Na em i mas i stap olsem bikpela samting long yumi.

● Bilong wanem em i bikpela samting long Jehova? Long wanem, “God em i pasin laikim.” (1 Jon 4:8) Jehova i laik bai yumi mas i stap amamas inap oltaim oltaim. Jisas i tok: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap . . . kisim laip oltaim.” (Jon 3:16) God i salim Pikinini bilong em i kam olsem Man Bilong Baim Bek yumi na opim rot long yumi long i stap oltaim long Paradais long graun, olsem God i bin tingting pinis long mekim long pastaim tru. (Stat 1:28) God i laik tru long givim laip oltaim long ol manmeri husat i kisim stretpela save long Pikinini bilong em na mekim ol samting i stret wantaim dispela save.—Rom 6:23.

● Bilong wanem em i bikpela samting long Jisas? Jisas tu i laikim tumas ol manmeri. Em i daunim laik bilong em yet na i amamas long givim laip bilong em bilong baim bek yumi. (Jon 15:13) Em i save olsem dispela tasol em i rot bilong God i ken kisim bek ol manmeri. (Jon 14:6) Yu ting yumi mas kirap nogut long save olsem Jisas i laik bai planti man moa i kisim helpim long sakrifais bilong em? Dispela i as na em i givim wok long ol disaipel bilong em long skulim ol man long olgeta hap long laik bilong God na ol samting em i tingting pinis long mekim.—Matyu 24:14; 28:19, 20.

● Bilong wanem dispela i mas i stap olsem bikpela samting long yumi? Tingim ol samting i bikpela samting long yu, olsem helt na famili. Yu laik bai yu yet na famili bilong yu i gat gutpela helt na gutpela sindaun? Long rot bilong Jisas, Jehova bai givim yupela gutpela helt na laip oltaim long nupela taim we i no gat moa pen na hevi. (Song 37:11, 29; Revelesen 21:3, 4) Olsem wanem? Yu gat laik long kisim kain sindaun olsem? Sapos olsem, orait i gat sampela samting yu mas mekim.

Skelim gen tok bilong skripsa i stap wantaim het tok bilong dispela atikol, em i tok: “Yupela bai save long tok i tru, na tok i tru bai mekim yupela i kamap fri.” Tok i tru long Jisas na wok em i mekim bilong inapim ol samting God i tingting pinis long mekim, dispela inap mekim yumi i kamap fri long kalabus nogut tru yumi stap long en—em sin na indai. Tasol bilong kamap fri long dispela kalabus, yu mas “save long tok i tru.” I gutpela yu kisim sampela save moa long dispela tok i tru na save long olsem wanem dispela inap helpim yu na famili bilong yu. Ol Witnes Bilong Jehova bai amamas long helpim yu.