Go Klostu Long God

Yu Inap “Save Gut Long God”

GOD JEHOVA i opim rot pinis long yumi inap kisim wanpela gutpela samting i dia tumas, na em i laik tru long yumi mas kisim dispela samting. Dispela samting i no inap bringim mani kago long yumi, nogat; em bai kamapim samting em mani i no inap baim​—⁠em bel isi, amamas, na laip i gat as tru bilong en. Em wanem samting? Tok bilong saveman King Solomon long Sindaun 2:​1-6 i stori gut long dispela samting.

Solomon i tok dispela gutpela samting em pasin bilong “save gut long God”​—⁠em stretpela save long God na ol samting em i tingting pinis long kamapim, olsem Baibel i stori long en. (Ves 5) Na i gat sampela samting moa i insait long en.

Ol tok i tru. Baibel i bekim ol kain askim olsem: Wanem nem bilong God? (Song 83:​18, NW ) Wanem samting i save painim man taim em i dai? (Song 146:​3, 4) Yumi stap laip bilong mekim wanem? (Stat 1:​26-28; Song 115:16) Ol bekim bilong ol dispela askim i olsem gutpela samting i dia tumas.

Ol savetok. Baibel i tokim yumi long nambawan gutpela rot bilong bihainim. Yu ken mekim wanem bilong strongim marit na bai marit i no ken bagarap? (Efesus 5:​28, 29, 33) Olsem wanem yu ken skulim ol pikinini bilong yu long mekim gut wok bilong ol? (Lo 6:​5-7; Efesus 6:⁠4) Olsem wanem yu inap i stap amamas? (Matyu 5:3; Luk 11:28) Orait, yu ting wanem​—⁠ol bekim bilong ol dispela askim i olsem gutpela samting i dia tumas, laka?

Sampela save moa long ol pasin bilong God. Baibel tasol i kamapim ol stretpela save long God. Em i gat wanem kain bodi? (Jon 1:18; 4:24) Tru em i save tingim yumi? (1 Pita 5:​6, 7) Wanem sampela bikpela pasin bilong em? (Kisim Bek 34:​6, 7; 1 Jon 4:⁠8) Ating yu wanbel olsem stretpela save long Man Bilong Wokim yumi, em i olsem gutpela samting i dia tumas, a?

Tru tumas, pasin bilong “save gut long God” em i olsem wanpela gutpela samting i dia tumas. Yu mas mekim wanem bilong kisim dispela samting? Yumi inap kisim helpim long tok i stap long Sindaun sapta 2, ves 4; Solomon i tok dispela save i wankain olsem “mani samting ol i bin haitim.” Tingim: Mani o gutpela samting ol man i haitim i no inap kamaut nating long ples hait bilong en na i kam stap long han bilong yumi, nogat. Yumi yet i mas wok strong long painim dispela samting. Na i wankain tu long save bilong God; dispela gutpela samting i stap hait insait long Baibel. Olsem na yumi yet i mas wok strong bambai yumi inap kisim dispela gutpela save.

Solomon i stori gut long ol samting yumi mas mekim bambai yumi inap “save gut long God.” Ol dispela hap tok olsem “harim tok” na “putim yau gut” na “wok strong long kisim gutpela save,” i soim olsem yumi mas i gat gutpela bel na redi long kisim ol tok. (Ves 1, 2) Ol dispela hap tok olsem “askim” na “wok hat long painim” i makim olsem yumi mas givim bel tru long painim save, na soim ples klia olsem yumi laik tru long kisim save. (Ves 3, 4) Bilong kisim dispela gutpela save long God, yumi mas i gat gutpela bel na yumi mas wok strong tru long stadi long Baibel.​—⁠Luk 8:⁠15.

Sapos yumi mekim olsem, Jehova bai helpim yumi long save gut long em. Ves 6 i tok, “Bikpela yet em i as bilong gutpela tingting.” God tasol inap helpim yumi long kliagut long ol tok i tru i stap long Baibel. (Jon 6:44; Aposel 16:14) Yu ken bilip tru olsem: Sapos yu givim bel tru long stadi long Baibel, yu bai “save gut long God”​—⁠na dispela save i olsem gutpela samting i dia tumas, na em bai helpim yu long mekim sindaun bilong yu i kamap gutpela moa.​—⁠Sindaun 2:​10-21. a

Baibel ritim bilong Oktoba:

◼ Sindaun 1-​21

[Futnot]