Wanpela Man Em Jehova i Laikim Tru

YU GAT wanem tingting taim yu tingim Devit, em man Baibel i stori long em? Yu tingim dispela taim we em i bin kilim i dai traipela man Goliat bilong Filistia? O em i ranawe i go long ples drai nating taim King Sol i birua long em? O sin em i bin mekim wantaim Batseba na ol hevi em i kisim long dispela? O yu tingim ol gutpela stori em i bin raitim na i stap long Buk Song?

Planti samting i bin kamap long laip bilong Devit, olsem em i kisim ol gutpela wok, winim ol birua, na tu, ol bikpela hevi i painim em. Tasol nambawan samting i mekim na yumi laikim em tru, em samting profet Samuel i bin raitim long Devit olsem​—⁠em i “wanpela gutpela man i save bihainim pasin Bikpela i laikim.”​—⁠1 Samuel 13:⁠14.

Tok profet bilong Samuel i bin kamap tru taim Devit i yangpela mangi yet. Ating bai yu amamas long ol man i kolim yu olsem man God i laikim, a? Devit i bin mekim wanem ol samting long laip bilong em, na moa yet long taim em i yangpela mangi, na dispela inap helpim yu long kamap kain man olsem? Orait nau yumi ken stori long dispela.

Famili na Wok

Jesi, em papa bilong Devit na tumbuna pikinini bilong Rut na Boas, em i wanpela gutpela wokman bilong Jehova. Taim Devit na 7-pela brata na 2-pela susa bilong em ol i liklik yet, Jesi i skulim ol long Lo Bilong Moses. Long wanpela song, Devit i tok em i bin mekim wok bilong God olsem ‘mama bilong em i bin mekim.’ (Song 86:16) Dispela i mekim na sampela i ting olsem mama bilong Devit, em Baibel i no kolim nem bilong em, i bin skulim gut Devit long ol tok bilong God.  Wanpela saveman i tok: “Ating em long maus bilong mama bilong em, Devit i bin harim ol stori bilong ol strongpela wok God i bin mekim long lain bilong em,” na tu, stori bilong Rut na Boas.

Long namba wan taim Baibel i stori long Devit, em i wanpela yangpela mangi i was long ol sipsip bilong papa bilong em. Ating dispela wok i mekim na inap planti de na nait em i save stap wanpis long bus. Traim piksaim dispela samting long tingting.

Famili bilong Devit i sindaun long Betlehem, em wanpela liklik taun i stap antap na arere long wanpela maunten bilong Juda. Betlehem i gat graun i gat planti ston long en na i kamapim planti gutpela kaikai olsem rais na wit samting. Ol diwai prut, ol diwai oliv, na ol diwai wain i stap long ol liklik maunten na long ol ples daun. Long taim bilong Devit, ol ples i antap liklik we ol man i no wokim gaden long en ol i save yusim bilong lukautim ol sipsip na bulmakau samting. Baksait long ol dispela ples em ples drai nating bilong Juda.

Devit inap kisim sampela bagarap long wok bilong em. Em long ol dispela maunten we em i bin pait wantaim laion na bea, em ol i bin traim long kisim sampela sipsip long lain sipsip bilong em. a Dispela mangi i gat strongpela bel i ranim laion na bea na pait wantaim ol na kilim ol i dai na kisim bek sipsip long maus bilong ol. (1 Samuel 17:​34-36) Ating em long dispela taim Devit i lain gut long sut long katapel. Ples bilong lain Benjamin i no stap longwe long taun bilong Devit. Ol man bilong dispela lain “ol i save tumas long tromoi ston long katapel, na ol i save kisim mak tru.” Devit tu i bin sut stret long mak.​—⁠Hetman 20:​14-16; 1 Samuel 17:⁠49.

Yusim Gut Taim

Taim wasman bilong ol sipsip i save mekim wok, planti taim em i save stap wanpis na stap isi. Tasol Devit i no larim dispela i mekim em i skin dai, nogat. Ples i stap isi na dispela i mekim na em i gat taim bilong tingim tingim ol samting long  bel. Yumi ken save olsem sampela tok Devit i kamapim long ol song em ol samting em i bin tingim long dispela taim we em i yangpela. Ating em long dispela taim we em i stap wanpis na em i tingim i stap bilong man long ai bilong God, na em i tingim tu ol bikpela samting bilong ples antap​—⁠olsem san, mun, na ol sta em Jehova “i bin wokim.” Na taim em i wok wasman klostu long Betlehem em i tingim gutpela graun, bulmakau, ol pisin, na “olgeta abus i stap long bus.”​—⁠Song 8:​3-9; 19:​1-6.

Yumi ken save olsem ol samting i painim Devit olsem wasman, dispela i mekim na em i pilim tru gutpela pasin sori Jehova i save mekim long ol gutpela wokman bilong Em. Olsem na Devit i tok: “Bikpela em i wasman bilong mi. Olsem na mi no inap sot long wanpela samting. Em i mekim mi i slip long gutpela gras. Na em i bringim mi i go long ol liklik wara na mi dring na mi malolo. God, maski mi wokabaut long ples nogut na bikpela tudak, mi no ken pret long samting nogut, long wanem, yu stap wantaim mi. Mi lukim yu i holim stik ol wasman bilong sipsip i save holim, olsem na bel bilong mi i stap isi. Mi no inap bagarap.”​—⁠Song 23:​1, 2, 4.

Ating bai yu tingting olsem, bilong wanem mi mas tingim dispela stori? Bekim em olsem: Devit i bin tingim tingim long bel ol samting Jehova i bin wokim na pasin bilong em long pas gut wantaim God, na dispela i bin helpim em long pren gut wantaim Jehova na stap olsem “gutpela man i save bihainim pasin Bikpela i laikim.” Yu tu i save mekim olsem?

Olsem wanem? Taim yu lukim ol samting Jehova i bin wokim, dispela i save kirapim yu long litimapim nem bilong Man Bilong Wokim olgeta samting? Yu pilim olsem yu laikim tru Jehova taim yu lukim ol gutpela pasin em i save mekim long ol man? Bilong pilim tru gutpela pasin bilong Jehova, yu mas lusim sampela haptaim bilong i stap isi na beten na tingim tingim long bel ol tok bilong God long Baibel na tingim ol samting em i bin wokim. Taim yu mekim olsem, dispela bai helpim yu long save gut long Jehova na bai yu laikim em tru. Ol yangpela na lapun wantaim inap kisim dispela pasin. I luk olsem Devit i bin pas gut wantaim Jehova kirap long taim em i yangpela yet. Olsem wanem yumi ken save long dispela?

God i Makim Devit

Taim ol samting i kamapim klia olsem King Sol i no bosim gut lain bilong God, Jehova i tokim profet Samuel olsem: “Oltaim yu save bel hevi long Sol. Wanem taim bai bel hevi bilong yu i pinis? Mi bin rausim em pinis, na long ai bilong mi em i no moa i stap king bilong Israel. Orait nau mi laik bai yu kisim wanpela kom bilong sipsip na pulimapim wel bilong oliv long en, na yu go lukim Jesi, wanpela man bilong taun Betlehem, long wanem, mi bin makim wanpela bilong ol pikinini man bilong en long kamap king.”​—⁠1 Samuel 16:⁠1.

Taim profet bilong God i kamap long Betlehem, em i tokim Jesi long singautim olgeta pikinini man bilong em. Samuel bai makim husat long kamap king? Samuel i lukim Eliap, namba wan pikinini man i gat naispela pes, na em i tok: “Ating  dispela man tasol.” Tasol Jehova i tokim Samuel olsem: “Yu no ken ting long em i longpela bun o long em i luk naispela na bai mi makim em. Nogat. Mi no laik bai dispela man i kamap king. Long wanem, mi no save skelim ol man olsem ol man i save skelim. Nogat. Ol man i save lukluk long bodi. Tasol mi save lukim tingting na laik bilong man na mi skelim ol.” Long wankain pasin, Jehova i sakim Abinadap, Sama, na 4-pela brata bilong ol. Stori i go moa: “Orait Samuel i askim Jesi olsem, ‘Olgeta pikinini man bilong yu em tasol, a?’ Na Jesi i tok, ‘Nogat. I gat wanpela yangpela i stap yet. Em i las bilong ol. Tasol em i wok long lukautim ol sipsip.’ ”​—⁠1 Samuel 16:​6, 7, 11.

Ating bekim bilong Jesi i laik kamapim olsem: ‘Devit i no inap tru long i stap dispela man yu wok long painim.’ Devit em i las bon na em i no gat nem long famili, na em i gat wok long lukautim sipsip. Tasol em i dispela man God i bin makim. Jehova i save lukim samting i stap long bel bilong man, na em i lukim bel bilong dispela yangpela em i gutpela tru. Taim Jesi i salim wanpela man i go long singautim Devit, Jehova i tokim Samuel olsem: “‘Em dispela man tasol. Kisim wel bilong makim king na putim long em.’ Orait Samuel i kisim dispela wel bilong oliv em i bin bringim i kam, na em i kapsaitim liklik wel long het bilong Devit long ai bilong ol brata bilong en. Na long dispela de spirit bilong Bikpela i kam i stap strong long em na spirit i stap long em oltaim bihain.”​—⁠1 Samuel 16:​12, 13.

Baibel i no stori long Devit i gat hamas krismas long dispela taim. Tasol sampela yia bihain, 3-pela bikpela brata bilong Devit em Eliap, Abinadap, na Sama, ol i insait long ami bilong Sol. Ating ol narapela 5-pela brata bilong em ol i yangpela tumas long joinim ami. I luk olsem ol i no winim yet 20 krismas, em krismas man i mas winim bilong joinim ami bilong Israel. (Namba 1:3; 1 Samuel 17:​13, 14) Olsem na yumi ken save, Devit i yangpela tru taim Jehova i makim em. Tasol i luk olsem Devit i gat pasin bilong tingim tru ol samting bilong God. I klia tru olsem em i pas gut wantaim Jehova, na em i bin kisim dispela pasin long rot bilong tingim ol save em i gat long God.

Dispela i mas strongim ol yangpela bilong nau long mekim wankain pasin. Olsem na yupela ol papamama, yupela i save strongim ol pikinini bilong yupela long tingim tingim ol tok bilong God, amamas long ol samting God i wokim, na stadi long ol tok Baibel i mekim long Man Bilong Wokim olgeta samting? (Lo 6:​4-9) Na yupela ol yangpela, yupela yet i save mekim olsem? Ol nius bilong Baibel olsem Wastaua na Kirap! b ol i bilong helpim yupela.

Save Gut Long Pilaim Musik

Ol tok i stap long planti song bilong Devit i stori long taim em i mekim wok wasman, na ating ol musik bilong em tu i stori long dispela samting. Tru tumas, i no gat wanpela musik bilong ol song holi bilong em i stap yet long nau. Tasol yumi save olsem man i bin raitim ol dispela song em i save gut tru long pilaim musik. Ol i singautim Devit long lusim wok wasman na kam mekim wok bilong King Sol, long wanem, em i save tumas long paitim musik.​—⁠1 Samuel 16:​18-23. c

Devit i kisim pasin bilong paitim musik long wanem hap na long wanem taim? Ating long taim em i stap long bus na was long ol sipsip. Yumi ken save tru olsem taim em i yangpela yet, Devit i bin mekim ol singsing bilong litimapim nem bilong God. Tru tumas, Jehova i bin makim em na givim wok long em, long wanem, Devit i bin givim bel tru long God na tingim tru ol samting bilong lotu!

Dispela stori i kamapim ol samting Devit i bin mekim taim em i yangpela, na ol samting i kamap bihain long laip bilong em i soim tu olsem em i bin pas gut wantaim Jehova. Wok bilong Devit olsem wasman bilong sipsip long ol ples klostu long Betlehem i bin stiaim tru ol samting em i bin mekim long laip olgeta bilong em. Tingim singsing Devit i mekim long Jehova olsem: “Nau mi tingting gen long ol samting i bin kamap bipo. Na mi tingting long ol samting yu bin mekim na long ol gutpela wok bilong yu.” (Song 143:⁠5) Ol gutpela tok bilong dispela song na planti ol narapela song bilong Devit i bilong strongim tru ol man husat i laik bihainim pasin Jehova i laikim.

[Ol Futnot]