God i givim wanpela gutpela presen long yumi—yumi inap toktok wantaim em na kamapim filings bilong yumi long em long rot bilong beten. Devit i beten olsem: “Yu Man Bilong Harim ol prea, olsem na olgeta manmeri i mas i go long yu.” (Buk Song 65:2) Tasol yumi inap beten olsem wanem na bai God i harim na blesim yumi?

Beten bilong yu yet i opim rot long yu autim olgeta tingting i stap long bel bilong yu long God—kamapim filings tru bilong yu. (Buk Song 62:8) God i Gat Olgeta Strong i laikim ol beten yumi pilim tru long bel.

God i gat planti biknem, tasol em i gat wanpela nem tru. “Mi Jehova. Dispela em nem bilong mi.” (Aisaia 42:8) Nem Jehova i kamap klostu 7,000 taim long Ol Skripsa Holi. Planti profet i kolim nem tru bilong God taim ol i toktok long em. Abraham i tok: “Plis Jehova, . . . mi laik mekim sampela tok moa [long yu].” (Stat 18:30) Yumi tu i mas yusim nem bilong God, Jehova, taim yumi beten.

God i kliagut long tingting na filings bilong yumi maski yumi toktok long wanem tokples. Tok bilong em i strongim yumi: “God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.”—Aposel 10:34, 35.

Tasol bilong God i ken blesim yumi, yumi mas beten, na tu, mekim sampela samting moa. Long neks atikol, bai yumi skelim samting yumi mas mekim.