Tru Baibel em i no wanpela buk bilong helt, tasol em i kamapim ol tok we i gutpela bilong helpim yumi. Ol dispela tok inap helpim man i karim hevi long sik bilong tingting. Skelim sampela bilong ol tok bilong Baibel.

“Ol man i no gat sik ol i no save go lukim dokta, tasol ol sikman ol i save go lukim dokta.”​—MATYU 9:12.

Baibel i kamapim klia olsem sapos yumi sik yumi mas go lukim dokta. Bel bilong planti manmeri i stap isi taim ol i kisim save long sik bilong ol long tingting na taim ol i go lukim dokta.

“Pasin bilong eksesais i gutpela bilong helpim bodi.”​—1 TIMOTI 4:8, Contemporary English Version.

Taim yumi mekim ol samting bilong helpim bodi bilong yumi long stap helti, dispela inap helpim tingting bilong yumi tu long stap gut. Yumi ken mekim ol kain samting olsem, eksesais long olgeta taim, kisim gutpela kaikai na yumi mas slip gut.

“Bel i save stap amamas, em i gutpela marasin, tasol sapos bel na tingting bilong man i bagarap, dispela i save pinisim strong bilong em.”​—PROVEP 17:22.

Taim yu ritim ol skripsa bilong strongim yu, na putim ol mak we yu inap winim, dispela inap helpim  yu long stap amamas. Sapos yu putim tingting long ol gutpela samting i kamap long laip bilong yu na bilip olsem ol samting bai kamap gutpela long bihain, dispela bai helpim yu long karim hevi long sik bilong tingting.

“Savetingting i stap wantaim ol man i gat pasin daun.”​—PROVEP 11:2.

Ating yu bai luksave olsem yu yet i no inap mekim olgeta samting, so yu mas amamas long kisim helpim long ol narapela. Ating ol pren na famili bilong yu i laik helpim yu, tasol ol i no save ol bai mekim wanem. Yu ken tokim ol long wanem ol samting bai helpim yu. Tingim olsem wanem wanem samting ol inap mekim bilong helpim yu, ol bai mekim na oltaim tok tekyu long ol i helpim yu.

“Mi pilim olsem mi no orait, so mi go lukim dokta. Em i painimaut long sik bilong mi na em i tokim mi. Dispela i helpim mi long kliagut long sik bilong mi, na long kisim save long wanem kain ol marasin samting mi inap kisim bilong helpim mi.”​—Nicole, a em i gat sik bilong tingting we i mekim na filings bilong em i save senis senis (bipolar disorder).

“Mi pilim olsem taim mi ritim Baibel wantaim meri bilong mi long olgeta moning, dispela i helpim mi long holim stretpela tingting na tingim ol gutpela samting. Na planti taim long ol de we mi hatwok long bosim tingting bilong mi, wanpela skripsa i save strongim mi.”​—Peter, em i gat sik dipresen.

“Em hatwok long mi tokim ol narapela long sik bilong mi bikos mi sem. Tasol wanpela gutpela pren bilong mi i putim gut yau long mi na i traim long kliagut long filings bilong mi. Em i helpim mi na mi pilim gutpela na mi no pilim olsem mi stap wanpis.”​—Ji-yoo, em i gat sik bilong tingting planti na wari na dispela i mekim na i hatwok long em i kontrolim pasin bilong em long kaikai (eating disorder).

“Tok bilong Baibel i helpim mi long balensim gut ol samting na holim stretpela tingting long wok na malolo. Savetingting bilong Baibel i helpim mi long karim hevi bilong sik bilong mi.”​—Timothy, em i gat sik bilong tingting we i mekim na em i save kisim kain kain tingting na tingting i no stap isi (obsessive-compulsive disorder).